ladino  

 
Judeo espanyol
Contador:

Inicio >> ARTIKOLOS >> Yehuda Hatsvi >> Al derredor de la Kehila
 

Al derredor de la Kehila
Yehuda Hatsvi


Las kostumbres nasen, kresen, (I komo kada koza en este mundo) mueren tambien. En mi artikolo vos do nada mas ke unas kuantas kostumbres de los Jidyos de Salonik, no todas konosidas, no todas ayinda egzisten. Naturalmente, en unas de eyas se enkontra similaridad a las kostumbres de los Sefaradim de otras partes del imperio otomano. Lo mas de los uzos i kostumbres ke eskoji por kontarvos, son los kual tyenen algun atadijo al derredor de la sinagoga.

Las sinagogas, no por nada son yamadas entre los sefaradim komo "kehila" ( = komunidad, en ebreo), o "Kahal" ( = publiko, en ebreo). La vida de los sefaradim en siglos pasados fue toda konsentrada en la kehila. Esta, funksyonava no solo komo un lugar en el kual se adjunta el puevlo por orasionar (dizir Tefila); la kehila era el sentro de todas las institusiones i de todas la aktividades de la komunidad Judia.
 
Segun el Talmud, en kada sivdad kale ke aygan "asara batlanim". RASHI, (en Bava Kama 82) mos da a saver ke¨eyos son "Diez ombres onestos, libres de sus lavoro, para okuparsen en las nesesidades del publiko, i para ke sean topados siempre en lafs oras de la tefila.
Estos "asara batlanim" resiviran sus salarios de la kasha de la sosiedad".

En la epoka del Talmud, estos diez "batlanim" eran lo mas djente de valor, o rikos, ke tiniyan la posibilidad de deshar sus negosyos i dedikarsen, kaji voluntaryamente, a las tarehas de la sosiedad.
Kon el tiempo, esta kostumbre se troko, i tal grupo de diez-libres-de- lavoro konteniya (en Salonik komo en otras vandas) ombres menesterozos, aunke relijiozos, ke la komunidad los apoyava kon una "mezada" umilda, ke a pena les abastava para mantener sus famiyas. Es muy posivle, ke esta kostumbre esta bazada en lo ke mos konta la Tora (Bereshit 18).
Al fin de tantas "negosyasyones" entre el Dio i Avraa Avinu sovre las sivdades malas de Sedom i Amora, Avraam resivyo la prometa del Dio: "No la destruire a la sivdad por amor de los diez djustos (tsadikim)".

La realidad mos dize, ke aunke aviyan "asara batlanim" en kada komunidad, no siempre era kolay de adjuntarse un "minyan" para las tefilot en los dias de la semana; muchas vezes avia de asperar asta se kumpliya el minyan de diez personas para empesar la tefila. En esto, el shamash o el hazan empesavan "azer kuento" si ya arrivaron los diez ombres nesesaryos segun la Alaha. Empero, syendo ke muestra kostumbre es de no kontar direktamente la dejente ke estan prezentes, (por myedo de "Ain Ara", ke es el "ojo malo"), entonses se empleava un Pasuk de diez byervos para uzarlo a saver kuantos ayinda faltan por venir
a la kehila. El pasuk popular (de Tehilim 28) era: "Oshia et ameha uvareh et nahalateha, ureem venaseem ad aolam"; dies byervos ebreos ke son en ladino "Salva a tu puevlo, i bendize a tu eredad; i apasyentalos, i sostenelos para siempre".

Despues de la ekspulsion de Espania i de Portugal, miles de Jidyos desidyeron de instalarsen en salonik; los muevos venidos toparon ayi ya kehilot de los Jidyos "Romanyotes" sivdadinos de muchos siglos en la teritoria de Gresia. Tambien avian kahales de Jidyos Askenazim venidos (o refujidos) de evropa-del-este, otras de Jidyos de provinsya (Fransya), Italia, i otros. Empero, naturalmente, ke se formaron mas i mas kehilot segun las rejiones o las sivdades de Portugal i Espanya tambien: Kastilia, Aragon, Lisbon, etc.
 
Lo kuryozo, i uniko, en las kehilot de salonik fue ke, aparte el nombre
 
"ofisyal" de kada kehila, esta tiniya un sovrenombre tambien. Por dos-tres egzemplos:

La kehila Aragon tiniya el sovrenombre de "gato"

La kehila Italia = "raton"

La kehila de Ashkenaz = "moshka"

La kehila Katalan = "figo loko"

La kehila Mayor (de Majorka) = "ladron".

Segun la rara kostumbre ke se uzava en salonik, los "yehidim"


(miembros) de alguna tala kehila, evitava todo el anyo de nombrar el sovrenombre de su kehila. Los yehidim de la kehila Mayor empleavan tal vez el byervo "bandido", o empleava una fraza komo "el ke aze rovos", ma nunka "ladron"; en una forma semejante, el yahid de la kehila de Aragon, por no mensyonar "gato", diziya "el animal ke se fuye del perro".
 
Es solo en Simhat Tora, el uniko dia del anyo ke fue "permetido", avrir la "serradura", i dizir ( a vezes dozenas de vezes) el sovrenombre del Kahal.
Los investigadores de este folklor mos dan unas kuantas supozisyones sovre la raiz de esta kostumbre: deformasyon de nombres de alkunya komo "gato"=gatenio, o nombres de flores o animales tipikos de los paizes spesifikos, etc., etc. Ma, parese, ke ninguna de eyas da la repuesta korekta o kompleta. En mi opinion, esta kostumbre, aunke un poko komika, fue un resto de rekuerdo leshano, de los tiempos de la inkizision en Espania: Los Jidios aya, komo tambien los "katolikos nuevos", devian de guadrar sus sekretos i de mantener una syerta kondokta de misterio. La libertad relativa ke gozaron los Jidyos en salonik del imperio otomano les permetio a komemorar rekuerdos amargos en una forma umoristika.

Una otra kostumbre rara entre los Jidyos de salonik, asta las ultimas jenerasyones, fue "La dulse", o "trokamyento de las sezones", ke ayinda esto yo en bushkida de su sinyifikado.
En el tiempo de "la dulse" (desde el prinsipyo del mez de Iyar asta Tisha- beAv) no se beviya agua entre las oras 3 i 3.30 despues de mediodia. Por muchos anyos avia en salonik una persona, empyegado de la komunidad, ke tiniya el kargo de pasar entre lofs kuartyes i pregonar sovre "la dulse", avizando al puevlo de no bever agua porke pasava en la agua üna vena de sangre"…
Despues de syerto tiempo, kuando se estreno "la halila" (el kalendario imprimido en salonik), los dias i las oras de "la dulse" fueron imprimidos en el kalendario, komo un servisyo al publiko.
"La halila" en si fue un fenomeno raro tambien. Aparte de dar en el kalendario las datas (dias, semanas, mezes), las oras de entradas i salidas de Shabat etc., la ¨halila¨ teniya la pretension de dar la previzyon del tiempo i de la klima por el anyo entero...

En dias de Shabat avia en salonik una kostumbre de adjuntarsen en la Kehila, despues de la tefila, i oyir kantes para-liturjikos de boka de paytanim, hazanim o afilu koros de ombres yamados ¨Los maftirim¨ (asta oy, al menos en Estambol). Este uzo empeso en primero en Edirne, i despues en Estanbol, kon los eleveos del poeta Jidyo famozo Ribi Yisrael Najara.
 
Entre los saloniklis, esta reunion mizikala es konosida komo la "tanda".
Tanda, ke es byervo kasteyano ke sinyifika torno, sira, rotasion, es un byervo olvidado en ladino, i kedo solo por deskrivir esta tala reunion En la kehila. En la tanda se serviyan tambien tratamyentos livyanos (komo borekas, guevos haminados, un poko de raki, etc), i fue muy "lojiko" ke kada miembro de la kehila o un grupo "yehidim", en su torno, en su ¨tanda¨, tome kargo de los gastes.
En salida de Shabat, i tambien en dia de alhad ay el uzo, si no la kostumbre, de no gastar dinero del todo, i en partikular (a lo mas posivle) de no merkar medikamentos en las farmasias, porke no es buen siman para el resto de la semana.

Los Ashkenazim tyenen una kostumbre antigua de dar a los chikos "moneda menuda" en la fiesta de hannuka. Esta kostumbre fue adoptada en las ultimas jenerasiones por los sefaradim tambien. En salonik se uzava lo mas de dar este regalo de moneda en purim ("purimlik") i no en hannuka. En Turkiya i en otros paizes, ma no en salonik, egziste asta oy una kostumbre semejante en la noche de Tu bi-Shvat (la fyesta de los frutas). En esta noche se da a los chikos talegas yenas de un asortimento de frutas, i tambien paras. Jeneralmente, el byervo ¨talega¨ se uza por deskrivir la bolsa en la kual metemos el talet en indo i venyendo de la kehila. Es kuryozo ke en salonik, komo tambien entre los Jidyos de Siria,


esta bolsa del talet, se yama ¨koracha¨ ke derive del byervo kasteyano ¨coraza¨. En la coraza/koracha, aun de ropa, yevamos el talet buen guadrado de todo mal.

Avlando por Tu-bishvat; en este dia tyenen muestros chikos la kostumbre de echar trigo en los kortijos para los pasharikos. La Raiz de esta kostumbre es una lejenda en el Talmud: kuando muestros padres andavan en el dizyerto, resivyeron (entre otros Milagros tambien) el MAN de los syelos, ke en muestra lengua konosemos komo manna o magna. En dia de vyernes, segun mos konta la Tora, arrekojeron el puevlo dos tantos de magna, i Moshe Rabenu los enkomendo al puevlo ke en Shabat, el dia de olgansa, no se topara la magna en el kampo.
Ma, ke izyeron Korah, Datan i Aviram, los rebeldes?
Eyos kijeron amostrar komo si Moshe no avla la verdad. Salyeron en la madrugada de Shabat i despartyeron magna en los kampos. En esto vinyeron muchos grupos de pasharos, i komyeron toda la magna ke en el kampo. Kuando salyeron los Ijos de Yisrael a verifikar si ay magna, no la toparon en el kampo.
Por zehut i por pagamyento a este servisyo de los pasharos, les damos trigo para ke gozen i eyos la fyesta de las frutas.
Es muy fasil de echar al kortijo i migitas de pan para los pasharos; ma, jeneralmente, los padres avizavan a los chikos ke muestra kostumbre
es de no menopresyar a las migas de pan, i no ay de arrojarlas entre la tierra.

Por darvos otra una kostumbre mas, vos akodro ke los sefaradim uzan de terminar kada karta, konversasion o artikolo kon palavras buenas. Entonses, vos sueto a todos lektores salud buena, beraha i azlaha.
 

                                                                                                                                                                            
 


+ Añadir nuevo comentario
Traducciones enviadas por usted
Loading Cargando ...
+ Enviar Comentarios
+ Enviar contenidos sugeridos

לאדינו         Ladino


Artikolos de Matilda Koen Serano
      
Artikolos de Yehuda Hatsvi
    
Artikolos de Gad Nassi
  
Artikolos de Eliezer Papo
   
Sefaradi Taor

ladino
Fecha y hora
 

La Asosiasion Arkadash | Ladino | לאדינו | judeo espanyol |

אתר זה הוקם ע"י זום ייעוץ ומערכות מידע