ladino  

 
Judeo espanyol
Contador:

Inicio >> ARTIKOLOS >> Yehuda Hatsvi >> Argentina – un drama teatral
 

Argentina – un drama teatral

Yehuda Hatsvi

 
La entrevista ke ize la semana pasada kon el Sr. Boaz Gaon, no fue 
entrevista en el sentido orijinal de la palavra: avlimos por telefono, i mos
 kontaktimos mezo el korreo elektroniko. Pero, me dizen ke esto es bien kompativle kon el tiempo kontemporaneo, moderno.
 
Boaz Gaon nasio en 1971 (djemelo de su ermano Yoav).
Boaz es oy el presidente del Sentro Ladino al nombre de Moshe David Gaon en la Universidad Ben Gurion en Beer Sheva. Este Sentro Ladino fue
fraguado en 2004 por los djenitores de Boaz (Binyamin z"l, i Rahel, ke mos biva para muchos anyos). 
Yoav (el ermano de Boaz) dirije oy los negosyos de la famiya Gaon, i sige mantener el apoyo finansiario al Sentro Ladino.
 
Boaz Gaon es, antes de todo, un jurnalista investigador, ma tambien autor de
tres livros ke salieron a luz entre los anyos 2008-2009.
 
En el anyo 2000, el empeso (djuntos kon su espoza Efrat) estudiar en Eskuela de Komunikasiones en Londra. En el mizmo tiempo funksiono komo el reporter del jurnal ebreo "Maariv", i despues, (entre 2004-2006), era el reprter de este jurnal en los Estados Unidos.
 
Pero al pareser ke Boaz "dezerto" de su ofisio en favor del drama i del teatro.
Su repertorio inkluye ovras ke se okupan de kuestiones sosiales i politikos. 
Lo mas son dramas kontraversial ke evokan polemika.
 
Aze unos kuantos mezes ke su drama "Argentina" es djugada en la shena de 
Teatron Haifa. El drama mos konta por una djoven estudiante ke viene a vijitar a un ex-ambasador de Israel, kon el preteksto ke tiene de preparar un lavor akademiko sovre las relasiones Israel-Argentina en los anyos de la diktatura militar (la "Junta"). Pero, en realidad tala estudiante viniya para interrogar sovre la desparision misterioza de su padre, kuando eya era chika ayinda.
 
Aki empesa mi dialogo telefoniko kon Boaz:
 
Y.: Si bien me akodro, este drama ya lo eskuchimos en 2006 en el teatro    "Tsavta", komo una ovra de lektura. Porke agora komo una piesa de teatro?
 
B.: Verdad, ma desde 2006 este drama durmiya en el kashon porke estuve yo okupado kon otros dramas. En mientres, el direktor artistiko del teatro ke lo avia enkontrado kazualmente, me pregunto si tengo algun drama adekuado.
Le ofresi mi drama "Argentina". Me alegro ke mi propuesta fue akseptada.
 
Y. Komoes ke te paso en la idea de okuparte kon un tema tan izoteriko komo tal "Los judyos de Argentina en los anyos setenta"?
 
B. Antes mas de sesh anyos, eskrivi un amplio reportaje sovre una komision de investigasion nominada por la Knesset. Esta komision miro a ver si Israel izo algo para salvar a los judyos de Argentina en los anyos de la diktatura. 
El tema me fasino.
 
Komo jurnalista, me interesava saver nada mas ke los datos "sekos" i kien son los kulpavles. Ma, komo dramaturgo pude ver el potensial dramatiko tambien. Aki se trata de una epoka ke forsava a todos - sea las viktimas, los ambasadores o los jenerales- kometer kozas terrivles. Me intereso a egzaminar ke paso en la mente perversa de los torturadores. Komo es ke se forma una realidad tan eskura i kruela!
 
Sovre todo me intereso el imajen del ambasador de Israel. La konkluzion de la komision de la Knesset fue ke Israel lo abandono, i lo desho para luchar enteramente solo. Israel no kijo entremeterse por kavza de intereses politikos; Dunke, el ambasador fue ovligado de tomar sus desiziones morales en una realidad fea.
 
Y.: La figura del ambasador en el drama fue eskrita sovre algun personaje
     espesifiko?
 
B.: No nesesariamente. Entre 1976 i 1983, kuando la Junta dominva en Argentina, servieron algunos tres o kuatro personas en el posto de ambasador. Todos eyos se enfrentaron mas o menos kon mizma situasion intoleravle. Israel abastesio armas a la diktatura, ganando miliones de dolares, mientras los ambasadores no podian salvar a los radikales judyos
ke fueron arrevatados, torturados i asasinados por la Junta.
 
Y.: Tengo la impresion ke evitas a mensionar algun nombre espesifiko.
 
B.: Bueno, avia un ambasador, Ram Nirgad, ke en mi opinion fue el ke luchava mas ke los otros. El mandava  telegramas al ministerio de relasiones exteriores rekerendo i exijiendo de anular todos los negosyos kon Argentina. 
Pero, nada. El governo Israeli niego (o refuzo) las demandas del ambasador.
 
Y.: Por konklusion ke mos puedes dizir sovre el drama?
 
Esta piesa de teatro no es de ninguna manera una telenovela, aun ke konsiste muchos elementos emosionantes. Ma lo ke kiero apuntar es ke las dilemas ke en el drama no empesaron ni terminaron en Argentina de los anyos setenta. Asta oy egzisten kontaktos diplomatikos entre Israel i unos kuantos rejimenes eskuros. Esto es un fato ke a mi no me gusta deltodo.
 
***
 
Y.: Komo azer para topar el kamino derecho 
     entre pragmatismo politiko i utopia?...   
 
      
 
  
 

 

                                                                                                                                                                            
 


+ Añadir nuevo comentario
Traducciones enviadas por usted
Loading Cargando ...
+ Enviar Comentarios
+ Enviar contenidos sugeridos

לאדינו         Ladino


Artikolos de Matilda Koen Serano
      
Artikolos de Yehuda Hatsvi
    
Artikolos de Gad Nassi
  
Artikolos de Eliezer Papo
   
Sefaradi Taor

ladino
Fecha y hora
 

La Asosiasion Arkadash | Ladino | לאדינו | judeo espanyol |

אתר זה הוקם ע"י זום ייעוץ ומערכות מידע