ladino  

 
Judeo espanyol
Contador:

Inicio >> ARTIKOLOS >> Yehuda Hatsvi >> Benyamin de Tudela
 

Benyamin de Tudela
Yehuda Hatsvi

La estoria de muestro puevlo empesa kon las palavras ebreas de "Leh Leha", las ke disho el Dio a muestro padre Avram: "Vate de tu tierra, i de tu patria, i de la kaza de tu padre, a la tierra ke te amostrare".
 
De ayi ayi, muestro puevlo kontunea a kaminar i a viajer. Abasha a Ayifto, va a Babilonya, despues en Roma, i ande no. En Espania, basho el reino de Roma, ya bivieron Judyos desde la destruksion del primer Bet-haMikdash.

El profeta Ovadia, ke toda su profesia en la Biblia es de un solo kapitolo, eskrivio: "I los kativos de Yerushalayim ke estan en Sefarad eredaran las sivdades del Negev".
Los investigadores de la Biblia mos dizen ke Ovadia eskrivio "Sefard" (ke es la sivdad antigua Sardis, konosida oy komo Sart, 90 kilometros de Izmir). Dunke, Ovadia no se refere a Espania; ma por una sierta "omision de pluma" se vokalizo komo "Sefarad", i agora todos mozotros mos yamamos sefaradis.
 
Todo bueno esta, ma ke lo pusha a un buen judyo, merkader de korales i de piedras presiozas en Espania, a salir de su sivdad en el anyo 1165 i viajar sin kedar en varyos paizes en Evropa i en el oriente, durante ocho anyos enteros?
Por akodrarvos, Marco Polo, el viajador, salio de Venezzia a su viaje en 1260. Sien anyos despues de este judyo, por el kual avlaremos oy.

Entre los judyos fue konosido komo Rabi Benyamin Bar-Yona (ijo de Yona) de Tudela.
El titolo "rabi" le dieron solamente komo un djesto de onor, ma el nunka fue rabino.

Benyamin nasyo, i muryo, en la sivdad de Tudela en el norte de Espania, a la oriya del rio Ebro. Tudela es una sivdad chika (oy biven ayi algunos 30000 abitantes), i ayinda una grande parte de la sivdad mantiene las binas del tiempo de Benyamin muestro amigo.
 
Al onor de Benyamin, (Benjamin), sivdadino de esta sivdad de Tudela, ay una pared grande en el buro de informasion para turistas kon un dezenyo de Benyamin el viajador. El dezenyo esta pintado sovre una superfisia de letras ebreas.
En la parte antigua de esta sivdad, en la plasa de San Salvador, ay un otro monumento en forma de statua moderna, aun ke chika, i abasho en la baza eskrive en ebreo i en espanyol kuatro linias kurtas ke las traduizi a muestra lingua:

Adios al rio de Ebro,
Ande ti tornar tornare
Aunke, afilu, sera solamente
Por murir serka de tu oriya.

Tambien ay de noter ke el governo de Espania kito en 1998 una seria de timbres memorando la estoria judia en el pais; un pul de esta seria fue dedikado a Benjamin de Tudela.

Benyamin eskrivio un livro (en ebreo) kontando todas sus pasadias.
Desde el siklo 16, este livro fue tresladado a varias lenguas, i el nombre de este judyo fue renomado en el mundo.
 
En kurto vos do el itinerario del kamino de Benyamin: empesando de Katalunia, Provance, Italia, Gresia, los Balkanes, las izlas de la mar Mediterannea, Erets Yisrael, Siria, Babilonya, Yemen, Persia, India i Ayifto.

El livro es un manadero muy importante sovre la jeografia i la etnografia de la Edad Media. Naturalmente, syendo ke el viajador se interesava en kada sivdad por los judyos ke biven ayi, su livro es tambien una fuente de informasion sovre la estoria de muestro puevlo.
Espesialmente en Erets Yisrael, kamino Benyamin de Tudela de sivdad en sivdad komo kaminando kon la Biblia en la mano, identifikando sitios i lugares mensionados en el Livro de los Livros. Dunke, Benjamin reusho a darmos un relato de espesial interes para el konosimiento de Erets Yisrael de akea epoka (basho el reino de los Kruzados) inkluye la vida de los judyos, los samaritanos i los karaitas, komo tambien las otras varias minorias etnikas en el pais.l

Benjamin de Tudela no desho ninguna pista darmos a saver ke fue el buto de su viaje. Ay investigadores ke kreen ke simplemente el salyo al kamino kon eskopo komersial i nada mas. Ma, muchas vezes topamos a Benyamin en lugares izolados, leshos de portos i nada de negosyos.
Otros dizen ke talvez Benyamin era un embiyado de alguna komunidad judia en Evropa ke bushkava posibilidad de imigrar a algun pais mas trankilo i seguro. No tenemos en mano ningun haber sovre tala komunidad.
Otros van ayinda mas leshos supozando ke Benyamin salyo a su viaje kon la esperansa de topar a los dies trivos perdidos de Yisrael.
 
Ke kuryozo, ma no tenemos nada de datos sovre la famiya i la vida personal de Benyamin de Tudela. Sera ke toda su vida bushkava este ombre a su "alma djemela" en las leshanias?
Benjamin de Tudela murio poko tiempo despues ke retorno a su sivdad natal. Es ke parvino kumplir su eskopo? No lo savemos...
 
Es ke kada uno i uno de mozotros tiene algun buto klaro i seguro en la vida? A vezes me demando i lo dudo.
 

                                                                                                                                                                            
 


+ Añadir nuevo comentario
Traducciones enviadas por usted
Loading Cargando ...
+ Enviar Comentarios
+ Enviar contenidos sugeridos

לאדינו         Ladino


Artikolos de Matilda Koen Serano
      
Artikolos de Yehuda Hatsvi
    
Artikolos de Gad Nassi
  
Artikolos de Eliezer Papo
   
Sefaradi Taor

ladino
Fecha y hora