ladino  

 
Judeo espanyol
Contador:

Inicio >> Kantadores en Ladino >> A-D >> Betty Klein
 

Betty Klein
Kantadera i kompozitora
(New York - Yerushaláyim)

Betty Klein, kantadera de folklor enternasional, gitarrista, pianista, arpista i akordeonista, orijinaria de New York, estudió kon Marta Schlamme en el Mannes College  i resivió su B.A. en la Universidad de Boston, su master en la Columbia University. Kontinuó sus estudios en el Hunter College en New York i en el Montclair College in New Jersey. A parte de ser kantante, es  múziko-terapista diplomada. Eya empesó a okuparse del kanto en ladino en New York por enfluensa del Haham Cardozo. Izo programas en la área de New York en sentros de adultos  i  de viejos. Izo su aliyá a Israel en el 1987. Eya kanta en munchas liguas del inglés al grego, del ebreo al yidish i sovre todo al ladino,  i aparese frekuentemente en Yerushaláyim  i en toda Israel. Partisipó al Festival muzikal de Akko i al Folk Festival en la  Horshat Tal. En el 1990 partisipó al Llangollen Eiseddfod, Wales, ande ganó el 2° premio en la kompetisión de kanto folk solo. Betty Klein aparesió en la BBC, en la TV de Béljika  i en munchos radioprogramas, i sus konsertos en ladino i yidish fueron tranzmetidos por "Kol Israel", la Radio "Communaute" de Fransia i la Radio Extserior de Espanya. Además eya aparesió en munchas eskolas en todo Israel komo miembra de la "Moréshet hamusika".Sus aparisiones son numerozas, de Ribadavia (1994) a Sicilia (1995,2003), de Salonik (1991-2) a Roma, de Brussels a Sevilya  (1992), de Detroit a Praga (1993), de Dubrovnik a Almania, i en munchos otros lugares,  inkluzo programas de radio i TV en Israel i al estranjero. En el 1999 eya dio un konserto en el Vaticano. Betty Klein aparesió en la Orkestra Andaluza de Israel, i kanta kon la kantante Shuly Nathán.   Kanta  en las nochadas de la Autoridad Nasionala del Ladino, i en las Universidades de Israel. Kantó en la Kaza el Prezidente de Israel (2008), en Yad Vashem, en Yad Ben Tzvi i en Bet Hatfutzot.  Kon la eskritora Matilda Koén-Sarano tiene de 16 anyos en Yerushaláyim el klub "Viní kantaremos", ande ambeza a kantar en ladino. Es envestigadora también, i aze búshkedas en el mundo del kanto en ladino, ke la traen a deskuvrir kantigas ulvidadas, ke eya aze tornar a la luz kantándolas kon su boz ermoza en sus programas. Betty Klein publikó 4 remarkables CDs: "Yerushaláyim de oro", "Yiddish Favorites",  "Classic Israeli Folk Songs" i "Suvenir". Su último CD, ke salió este anyo, inkluye kantigas muevas en ladino, kompozadas por eya sovre palavras de Moshé David Gaón, Miriam Raymond, Margalit Matitiahu,  i Matilda Koén-Sarano, i mas, endjuntos a kantigas tradisionales. En okazión de la salida de este CD, tuvo lugar una nochada en Bet Avihay en Yerushaláyim. Betty Klein es una kompozitora ekléktika muy dotada.
Akodraremos algunas de las kantigas kompozadas por eya: "Nostaljía del pasado" (palavras de Ester Hoter), "La djoya", "Don Kishot"," Belgrado" (palavras de Matilda Koén-Sarano); Sivdá de m i chikés, Dos gitarras, Esklava i reyna, En suenyo te vi (palavras de Miriam Raymond), ke ganó el treser premio en el Festiladino del 2003.

Matilda Koén-Sarano

                                                                                                                                                                            
 


+ Añadir nuevo comentario
Traducciones enviadas por usted
Loading Cargando ...
+ Enviar Comentarios
+ Enviar contenidos sugeridos

לאדינו         Ladino


Artikolos de Matilda Koen Serano
      
Artikolos de Yehuda Hatsvi
    
Artikolos de Gad Nassi
  
Artikolos de Eliezer Papo
   
Sefaradi Taor

ladino
Fecha y hora