ladino  

 
Judeo espanyol
Contador:

Inicio >> ARTIKOLOS >> Yehuda Hatsvi >> De Ragusa a Jaffa
 

De Ragusa a Jaffa
Yehuda Hatsvi

La sivdad de Jaffa, ke de la Biblia la konosemos komo Yaffo, es una de las mas antiguas sivdades en el mundo. La lejenda judia mos konta ke es Yefet, el ijo de Noah el ke la fraguo despues del deluvio.

Talvez avran lektores ke insistiran ke Yaffo es al nombre de Casiopeia, la madre de Andromeda, porke ansi mos konta la mitolojia grega.
No diskutemos agora.
De toda manera, "dokumentos" ejipsianos de antes kaje 3500 anyos ya mensionan el nombre de esta sivdad i su puerto importante a la kosta de la mar Mediterannea.

Aunke en la konkista de la tierra de Kenaan (en el tiempo de Yehoshua Bin-Nun), no reusheron muestros padres a konkistar a Yaffo, siempre en toda la estoria, avian jidyos ke bivieron en esta sivdad de Goyim; al menos UN judio!Ribi Benjamin de Tudela, el famozo viajador judio, mos konta ke en 1173 enkontro un solo judio, sivdadino de Yaffo.

Shimon (el ermano de Yehuda aMaccabi) parvino a konkistar a Yaffo, ma 110 anyos despues, en el anyo 67, los romanos la konkistaron i la derrokaron.
Por komemorar esta viktoria sovre el Estado Judyo, eyos imprimieron monedas kon el titolo "Judea Navalis".
Nunka mas torno Yaffo a su grandeza de los tiempos antiguos.

Entonses, por djustifikar el titolo de este artikulo, me permeto saltar sovre muchos siglos, i kontarvos ke en el anyo 1832 yego de Ragusa (Dubrovnik) a Yaffo el Ribi Yehuda, ijo de Menahem Halevy. Kon sus pokos medios, el perkurava a lo tanto posivle ayudar a los judyos ke bivian en Yaffo.

Es interesante de notar, ke en akel mismo anyo, el filantropo judio sefaradi, Sir Moshe Montefiore, izo un enrejistramiento, el kual mostro ke biviyan en Yaffo 122 jidyos, venidos de Estambol, Salonik, Bulgaria i Ejipto.

En el anyo 1841, las autoridades (el governo turko) nominaron al Rav Avraam Hayim Gagen de Yerushalayim a ser el Haham Bashi de Erets Yisrael.

El Rav Yehuda Menahem Halevy fue entonses nominado el rabino de Yaffo.
De aki endelantre, el dediko toda su enerjia para estabilizar en Yaffo una komunidad firme i aunada, aun ke chika.

El istoriador Moshe David Gaon, en su livro "Los Judyos del Oriente en Erets-Yisrael", mos konta ke en akel mismo anyo vino a bivir en Yaffo un jidio riko de Oran (Aljeria), yamado Aaron Chelouche, ke kon el tiempo aparto en su kaza un apartamento para funksionar komo yeshiva. El senyor Chelouche se instalo en Yaffo kon su famiya: su mujer, dos ijas i dos ijikos. Un anyo
antes avian alkilado un vaporiko para deshar su pais natal i venir a bivir en Haifa. Malorozamente, muy serka al puerto de Haifa desbrocho una tempesta fuerte, i la nave se batereo.
18 almas, entre eyos dos ijos de Aaron se undyeron.

La famiya doloryoza bivio unos kuantos mezes en Haifa, despues en Shehem (Nablus), i en fin se desidieron a bivir en Yaffo, ke ya estava adelantandose mejor komo komunidad.

De akeos tiempos konosemos otros unos nombres de judios en la sivdad de Yaffo:
Hayim Amzaleg, Yosef Bey Moyal, Shelomo Baruh (ke era el Shohet), Meir Matalon (ke mos kontan ke era bankier), i el Sr. Aaron Uziel, ke al tiempo servio komo el traduktor de Napoleon Bonaparte.
Es solamente en 1855 ke meldamos por kuatro famiyas de ashkenazim ke se adjuntaron a la komunidad de Yaffo.

Rabi Yehuda M. Halevy no solo perkuro de mantener una vida judia en la sivdad, ma tambien a topar medios de parnasa para los judyos. Poko a poko se agregavan a la komunidad mas djente, muevos venidos del Imperio Otomano, de Evropa, o tambien de otras sivdades de Erets Yisrael.

Parese un poko ironiko, ke antes de todo, el rabino perkuro a estabilizar un semeterio judyo en Yaffo. Ma ya lo savemos ke "la muerte es una parte de la vida". Asta akel tiempo (1841) enterravan a los muertos judyos de Yaffo,solamente en Yerushalayim.

Tornaremos una vez mas a la vida:

Durante algunos 10 anyos, desde el anyo 1839, Yaffo estuvo soto los ejipsianos. El governador en esta kurta epoka era Ibrahim Pasha, el ke planto al derredor de Yaffo muchas verjeles de pertukal (naranja). En estos verjeles (ke en arabo, i en el ladino de Erets Yisrael, se yaman "bayaras"), kresieron las pertukales mas buenas del mundo. (Es muy posivle, ke muchos de vozotros vos akodrash ayinda del nombre renomado "Jaffa Oranges".
Oy ya no kedaron mas akeyas "bayaras", ke se arrankaron antes mas de 50 anyos; i akeyas frutas kon savor de paradizo ya no se topan el los merkados. Ke pekado !
Israel desidyo -aze tiempo- de abandonar a "JAFFA", i se konsentra oy en JAVA (komputadoras, hi-tech, etc.).

En el anyo de 1855, kon el esfuerso del rabino de Yaffo, merko el Gevir Montefiore una bayara grande para dar parnasa a los judyos de la sivdad.
Esto mos amostra a tanto fue el rabino aktivo para formar una vida esperta de
judyos en Yaffo.

En el anyo 1856 vino a Yerushalayim un poeta judyo yamado Ludvig August Frenkel. El era bien konosido en la Evropa, ma tambien era muy atado a las ktividades judias en su pais, Austria. Dunke, el fue embiyado kon la inisiativa (i el dinero) de Elisa Lemel, una noble, rika mujer . El buto de su mision fue de fondar en Yerushalayim una eskola moderna, en la kuala se ensenyara no solamente Tora, ma tambien i otros estudios. Los rabinos ashkenazim
estavan muy en kontra del Sr. Frenkel. Ma, kon el apoyo de los rabinos sefaradim (entre eyos Ribi Hayim Nissim Abulafia), el parvino a avrir (en 1856) la eskola "Lemel".

Todos los estudios en la eskola "Lemel" se enenyavan en muestra lingua, el
judeoespanyol.
Despues de tiempo, el alman i el fransez tomaron el lugar del ladino.
Ludvig Frenkel se enkontro unas kuantas vezes kon Ribi Yehuda M. Halevy, el rabino de Yaffo, i admirava mucho sus ovras. En uno de estos enkontros, Frenkel lo konsejo al rabino ke sea su nombre en kurto: "Rabi Yehuda de Ragusa" (en ebreo: Yehuda meRagusa).
Raguasa, komo ya lo savemos, es el nombre italiano de Dubrovnik.
Kon el tiempo, el fundador de la komunidad judia de Yaffo fue konosido kon
este nombre, i kon este nombre esta gravado en la istoria de Erets Yisrael.

Oy, desde 1974, Yaffo es una parte integral de Tel Aviv.


 

                                                                                                                                                                            
 


+ Añadir nuevo comentario
Traducciones enviadas por usted
Loading Cargando ...
+ Enviar Comentarios
+ Enviar contenidos sugeridos

לאדינו         Ladino


Artikolos de Matilda Koen Serano
      
Artikolos de Yehuda Hatsvi
    
Artikolos de Gad Nassi
  
Artikolos de Eliezer Papo
   
Sefaradi Taor

ladino
Fecha y hora