ladino  

 
Judeo espanyol
Contador:

Inicio >> Kantadores en Ladino >> A-D >> Dganit Daddo
 

 Dganit Daddo
 (Acco, Israel)

Dganit Daddo nasió i kresió en Acco en una famiya alegre i yena de vida de orijín irakiana. De la edad de dos anyos eya bayla i djuga en teatro. Kuando estava en la kuartena klasa fue engajada en un projekto de elevos superdotados ke la mandó a estudiar en kursos de enrekesimiento (istoria, komputadora, arte i mas) en Shlomi una vez a la semana. Kuando arivó a la edad del liseo, se eskrivió a la fakultad de biolojía en el liseo lokal "Bersky". La maestra de teatro deskuvrió por kavzo ke eya save kantar i la konvensió a kantar en las seremonías de la eskola i a pasar a la fakultad de teatro. En la dodjena klasa ganó en la kompetisión "Kolot Utzilim (Bozes i sones)" del Ministerio de la Edukasión kon Sharón Siletzki. Esto la ayudó a entrar en un grupo de la armada. Eya sirvió por dos anyos en este grupo kon Ola Sechor (oy aktrís en el "Kameri"), ke se izo su amiga, i kon Yuval Kedar, oy su marido. Después del servisio militar Dganit kumplió su esuenyo i estudió resitasión en "Bet-Tzvi". "Este era mi esuenyo de kuando vidi la foto del kurso  del 1990, i yo eskapí en el 2000", eya kontó. Dganit no fue nominada entre las estreyas, i lavoró duramente. Después de "Ben-Tzvi" fue resivida en la "Habima", i de entonses no abasha de la shena. Al prinsipio  fue resivida en la "Habima" para djugar el rolo prinsipal en "Habarvazón Hamechoar' (El pato feo).  Imediatamente despues  fue adjuntada al ekipo del "Bustán Sfaradí", komo remplasante de Galit Giat en el rolo de la ermoza Viktoria. Por medio de la popular komedia muzikal, ke ya tiene la shena por 10 anyos, Dganit deskuvrió la lingua i la kultura del ladino, i kon su marido, el muzisiano Yuval  Kedar kitó un CD de romansas i kantigas, entitolado "(Daddo) The Ladino Voice". Después de este CD eyos kitaron un otro CD kon muevos arajanmientos, entitolado "Daddo, The Ladino Voice Live". Kon el muevo disko eyos tienen un espektaklo en Israel i al estranjero, ke se yama "Mimizrah Lashemesh" (A Oriente del sol). Eyos ya aparesieron en Ukraina, Rusia, India, Inglitierra, Olanda, Fransia, Amerika, Canada i Argentina. En Argentina la vivensia fue muy fuerte. El publiko no kería desharlos abashar de la shena. El públiko estuvo asentado asta las 2:00 de la noche kantando i kontado kuentos sovre Israel. Kuando estuvieron en Ukraina, eya kijo ir a Umán, a ziarar a la tomba de Reb Nahman, ande meldó el tikún i dio sedaká". Dganit aparese i en kantigas de Eretz Israel (kon Amos Etinger), i en kantigas de la Eurovizión. En el 2006 Dganit partisipó al Festiladino kon la kantigas "Dos leones", kon su melodía sovre las palavras de Miriam Raymond, i su katiga suvió a la final de la kompetisión. Dganit esta muy atada a su marido, kon el kual lavora, i agora tiene un ijiko. Eya veye el kanto komo una misión.

Matilda Koén-Sarano

                                                                                                                                                                            
 


+ Añadir nuevo comentario
Traducciones enviadas por usted
Loading Cargando ...
+ Enviar Comentarios
+ Enviar contenidos sugeridos

לאדינו         Ladino


Artikolos de Matilda Koen Serano
      
Artikolos de Yehuda Hatsvi
    
Artikolos de Gad Nassi
  
Artikolos de Eliezer Papo
   
Sefaradi Taor

ladino
Fecha y hora
 

La Asosiasion Arkadash | Ladino | לאדינו | judeo espanyol |

אתר זה הוקם ע"י זום ייעוץ ומערכות מידע