ladino  

 
Judeo espanyol
Contador:

Inicio >> Kantadores en Ladino >> A-D >> Dorit Reuveni
 

Dorit Reuveni
(Israel)

Dorit Reuveni fue una de las solistas mas sovresalientes de la"Laakat Pikud Hamerkaz"  (el "Grupo del Komando Sentral") en el prinsipio de los anyos `70. Eya nasió en el kibuts Sháar Haamakim en el 1952 de una famiya sefaradía, orijinaria de Yugoslavia. En su chikez se fue a la Argentina kon su famiya ke salió en mision. Ayá fue enfluensada por la múzika sud-amerikana. Tornando a Israel kontinuó a okuparse de múzika i izo su servisio militar en la "Laakat Pikud Hamerkaz . Endjuntos a un trío kantó las kantigas "Ayom ayom" (Oy oy) i "Yesh prahim" (Ay flores), ke tuvieron un grande sukseso. En el 1971 su grupo se adjuntó al Ekipo del Folklor de los Parashutistas, i en este kuadro kantó la kantiga "Misaviv Lamedurá" (Al derredor del fuego), ke tuvo i él un grande sukseso. En el 1972 su grupo produsió el programa "Shar misheshar aharón" (Kanta ken kanta por último). En akel tiempo se adjuntó al grupoYaakov Mándel, kon el kual eya mas tadre se kazó. En el kuadro del programa Dorit rejistró en veste de solista "Shabhé ahósheh" (Lores a la oskuridad) i "Aísh min a-Bik`á" (El ombre de la vaye). En el 1973  kitó su primer albom, enteramente muzikado por Moni Amarilyo. Akel anyo eya arivó tresera en el "Festival Azémer Veapizmón" (Festival del kanto i del  refrén)  kon la kantiga "Rakévet Aémek" (El treno de la vaye) . Un anyo después partisipó a una nochada de kantes de la poetesa Rahel, ande kantó kon Dani Katz i Chanán Yovel . En el mizmo anyo partisipó también en el espektaklo "Nihohé Azir" (Golores del foraje), espektalo dedikado a los kompozitores de la kolonizasión lavoradora. En este periodo Dorit Reuveni partisipó al programa de la Kompanía "Isradisk", i en su kuadro rejistró unas kuantas kantigas de kriaturas. En el 1978 kitó un albom kon su rekolio de kantigas i tornó a lavorar kon Yair Rosenblum, kuando izo suvir a la shena el espektalo "Lakum beshés babóker" (Alevantarse a las sesh de demanyana) kon Dudu Zakay. En los próksimos diez anyos Dorit menguó su aktividad muzikal. Eya tornó en el 1987 kitando su albom "Shinuim" (Trokamientos) kon el ayudo de Ilan Virtzbeg i Chava Alberstein. Entre las kantigas reushidas en este albom "Kah kol ma she-Eloim notén" (Toma todo lo ke el Dio te da), eskrita i muzikada por Shimon Galbatz, i "Adam tzover zihronot" (La persona akumula rekordos), ke muzikó Galbatz sovre palavras de Yona Vólach.  En este periodo eya partisipó kon Dudu Fisher en el espektaklo de kantes de la famiya  Melavsky. En el 1993 Dorit kitó su albom "Bait Bekatzé Akéshet" (Kaza a la punta         del arko en sielo). La kantiga "Lo ivtihu li gan vradim" (No me prometieron una guerta de rozas), ke aparesió en el CD, fue interpretada por eya en la kompetisión de Pre-Eurovizión. En el mizmo anyo eya rejistró la kantiga de la kantadera argentina,  adorada en su chikez, Mercedes Sosa, "Shir Ahava Ledrom Amérika" (Kante de amor al Sud Amérika), tradusido  al ebreo por Ehud Manor. En los anyos `90 eya empesó a lavorar komo maestra de dezvelopamiento de la boz.
En el 2000 Dorit kitó su último albom de kantes, entitolado "Ladino", i eskrivió estas palavras en el livriko del CD: "Komo ija de padres yugoslavos de orijen sefaradita, ke el idioma del ladino era su idioma de infansia i las kansiones su idioma del alma - yo dediko estas  kansiones para mi padre Avraham (Bato) i por la memoria de mi madre Esther (Estika)."

Matilda Koén-Sarano

                                                                                                                                                                            
 


+ Añadir nuevo comentario
Traducciones enviadas por usted
Loading Cargando ...
+ Enviar Comentarios
+ Enviar contenidos sugeridos

לאדינו         Ladino


Artikolos de Matilda Koen Serano
      
Artikolos de Yehuda Hatsvi
    
Artikolos de Gad Nassi
  
Artikolos de Eliezer Papo
   
Sefaradi Taor

ladino
Fecha y hora