ladino  

 
Judeo espanyol
Contador:

Inicio >> ARTIKOLOS >> Yehuda Hatsvi >> El invento del futuro
 

El invento del futuro
Yehuda Hatsvi

Los paleontologistas, i otros investigadores i sientistas kon el prefikso de "paleo",  mos ensenyan ke antes de no mas de sesh miliones de anyos, se separaron de un padre antepasado las dos famiyas: Los Chimpanzes i los Humanoides, (los umanos ke mos konosemos oy en dia)..
A mi, personalmente, me viene muy defisil de admeter o de akseptar esta teoria, o sea este fato. Komo puedo kontinuar a bivir kon este sekreto familial,
i konfesar ke mis bisnonos eran maymonas?

Bueno, "en lo ke estamos - bendigamos"...
De todas maneras, es muy evidente  ke los Chimpanzes no trokaron mucho en este "kurto" instante de evolusion, mientras ke los Umanos reusheron azer un sendero muy largo i diverso para parvenir a el estado lo ke yamaremos desde agora "Benadam".

Ma, en realidad, ke es el Benadam, i en kualo se difere de los otros animales del mundo?

Me parese ke fue el filozofo grego Platon el ke dyo una definision divertida del Benadam, dizendo ke es "una kriansa sin plumas, i ke kamina en dos piezes".
Sierto ke una tala definision es un buen egzempio de una verdad parsial, porke, en el mezmo tiempo puede ser adaptada a una gayina eskorchada tambien.

Otro filozofo, yamado Daniel Shabetay Milo, izo un eksperimento interesante kon sus elevos, i en un kurto tiempo resivio muchas repuestas a la demanda de "el Benadam es el uniko animal ke....."
Ya vos imajinash ke entre las repuestas ke deskriviyan en kualo semos "unikos", se kontavan las kapasidades de gizar, dezenyar, riir, avlar, las kalidades de altroizmo komo tambien la violensia,  i asta el fenomeno de sonrujir (de azerse kolorado).

Daniel Milo, filozofo i biolojista, es nasido en Israel en 1953. Desde 1983 bive en Fransia, ma ayinda pasa una parte de su tiempo en Israel kuando se eskarinya de su nieta ke bive aki. No me preguntesh sovre su punta de vista en la politika, porke no esto de akodro kon el de nada, ma este fato no tiene  de impedir a gozar de su saviduria. El eskrivyo siete livros en Franses (lengua ke kaje no konosko), i un livro muevo kon el titolo "El invento del futuro" (esta vez en ebreo !).

Ya mensioni aki arriva ke Daniel Milo tiene una nietika ke bive en Israel. En uno de los enkontros de Daniel kon la chika (no se en ke edad), eya le disho:
"Al vermos amaniana". De aki, de este evento tan simple i trivial, topo el filozofo la repuesta ke puede eksplikar la partikularidad del benadam en komparizon a todos loa animales del mundo: la kapasidad de planear por el avenir, la konosensia ke egziste ke ay futuro, la kapasidad a dezir el uno al otro "al vermos amaniana".

Es verdad ke los lonsos, por un egzempio, saven aprontarsen para pasar el envierno durmiendo en sus kuevas. Tambien las bezbas (avijones) o las formigas tienen un senso de planeamiento, ma este senso no viene del fondo de algun pensamiento sino de un instinkto, i nada mas.
Agresion i violensia egzisten tambien entre muestros primos ermanos, los chimpanzes, i tal vez ay siertos animales ke empesan a riir si les azemos koskias, pero –komo ya lo dishimos- es solamente el benadam el ke es kapas de tomar el avenir en sus manos. (Sierto ke la baza del entendimiento del termino "futuro" es la lengua, i naturalmente ke la kondision de aver lingua es antes de todo el selevro/meoyo umano dezvelopado).

Aparte del "invento del futuro", Daniel Milo  es konosido en el milyu de la akademia komo el inventor del termino "trop-iette" ke me parese traduizirlo komo "tira (arrondja) demaziado". Milo ve un obstakolo grande en la kondukta del "Homo sapiens" en los milenios de alkavo. Mos konvertimos a ser un tipo gastador, ke las mientes tenemos en konsumir mas i mas kozas de luso, komidas muevas i mil i una koza de bavajadas, ke realmente no las nesesitamos.

No es mi intension de entrar aki a los aspektos pozitivos ke tambien egzisten en esta tendensia. Ma segun mos konseja el filozofo, devemos –toda la umanidad- entrar en una "dieta kulturala", un rejim ke meta frenos a este fenomeno negativo.

Una prezentasion (PowerPoint) interesante yamada www.TooMuch.Us 
vos puede dar un poko mas de material para pensar sovre este tema.

En konsekuensa del "invento del futuro" kiero yo anyadir una koza :
Es verdad, ke en diferensia de todos los animales (ke biven solamente en el "prezente"), savemos mozotros, las personas, planear el futuro. Ma, no mos olvidemos ke parvenimos a este estado solamente kuando reushimos a obtener la konosensia del "pasado". La persona, la komunidad, la nasion, o afilu toda la umanidad en jeneral, no puede reushir en planeando "futuros" sin ke tenga alguna baza en la kultura i en la sensia del pasado. Mozotros, komo Judyos, lo tenemos de save mijor de todos. El sekreto de la vitalidad de muestro puevlo esta en guadrando i edukando muestra karga kultural del pasado kolektivo, al enkontro del avenir.
 

                                                                                                                                                                            
 


+ Añadir nuevo comentario
Traducciones enviadas por usted
Loading Cargando ...
+ Enviar Comentarios
+ Enviar contenidos sugeridos

לאדינו         Ladino


Artikolos de Matilda Koen Serano
      
Artikolos de Yehuda Hatsvi
    
Artikolos de Gad Nassi
  
Artikolos de Eliezer Papo
   
Sefaradi Taor

ladino
Fecha y hora
 

La Asosiasion Arkadash | Ladino | לאדינו | judeo espanyol |

אתר זה הוקם ע"י זום ייעוץ ומערכות מידע