ladino  

 
Judeo espanyol
Contador:

Inicio >> ARTIKOLOS >> Yehuda Hatsvi >> Enerjias Pozitivas
 

Enerjias Pozitivas
Yehuda Hatsvi


Talvez vos akodrash ayinda de Frank Sinatra, aktor i kantador, nasido en 12 de desembre 1915.
Un dia le demandaron a Sinatra si el kree en la astrolojia. El repondio kon su  tipika sonriza (mas italiana ke amerikana): "No; no kreo. Es bien savido ke los del sinyo de Capricorno no kreen en astrolojia"...

La lejenda mos konta, (i mozotros la kantamos en la salida de Shabat), ke el rey Nimrod mirava en el sielo i en la estreria ke avia de naser Avraam Avinu.
Sierto, (me digo de mi para mi): El rey nimrod era un ombre pagano

Ma, segun otra lejenda (bazada sovre lo ke eskrive en Bereshit 15). afilu Avraam Avinu, el primer monoteista en el mundo, tuvo un momento de duda kuando el Dio le avia prometido todo bueno.
- "Ke me daras", disho Avram, "siendo ke yo ando sin ijos?"
Estonses, el Dio "tuvo" de sakarlo a Avram afuera, mirar a los sielos, tratar de kontar las estreas i azerlo abandonar la "profesia" de los astrologos diziendo ke el va murir solitario, sin ijos.

Jeneralmente, para un kreente en el puro monoteizmo, es un poko defisil de akseptar las varias supertisiones (o, sea, las kreensias) populares en astrolojia, en "ayin ara", demonios, i mas.                                                          A mi, personalmente, me paresen ser un sedimento del paganizmo ke mos kedo en el alma. Pero, no puedo nyegar ke afilu muestros hahamim en el Talmud estan divizados en estas kreensias.

Ma, de toda manera, desharemos de avlar por las esferas altas de las estreas, i tambien por las onduras "de los de abasho", los diavlos.  Tornaremos al nivel mas simple, umano.. Ay bastante ke diskutir sovre males ke ay en este mundo, hazinuras i difikultades ekonomikas. Dunke, trataremos de bushkar ke rol i ke papel djuga aki el "ojo malo", el "Ayin ara".


En la Tora (en el livro de Devarim, kapitolo 7) mos dizen:
"I kitara Adonay de ti toda enfermedad; i todas las malas hazinuras de Ejipto ke tu konoses, no las pondra en ti, sino las metera sovre todos los ke te aborresen".

Me akodro de mi chikez, (en Erets Yisrael, antes de la Gerra Mondiala), kuando uno de los ninios de la famiya estava desrepozado, mi padre (a la rogativa de mi madre) metiya su mano sovre la kavesa del ninio i resitava este mizmo pasuk kon los teamim (kantilasion) al uzo sefaradi tan dulse.

Sovre este mizmo pasuk topamos un debate en el Talmud (Bava Metsia 107).
en el kual (entre otros partisipanes) disho Rav ke "99 de los males vienen por kavza de Ain aRa, i solo uno - por kavza de kostumbre de tierra".
En meldando estse dicho, me impresiona el fato ke ya antes 2000 anyos, kulaneo uno de muestros ilustre savios el sistema desimal. Ma, de la otra parte no la komo a esta guzma (egzajerasion) de 99%.

El termino "Ayin aRa" es un termino mistiko. Segun lo kreen muchos miliones de personas en todo el mundo, el destino del benadam puede ser afektado  por kavza de sentimientos de la djente verso el, i partikolarmente por  sentimientos de selo.

Oy egziste una tendensia de eksplikar el efekto del "ojo malo" en una forma
pseudo-sientifika. Agora ya no dizimos Ayin aRa sino ke es ondas de "enerjias negativas", ke son transemetidas mezo muestros amigos i enemigos los ke se selan de mozotros por lo ke tenemos (o ke les parese ke tenemos mas suerte i ke gozamos una vida mijor ke eyos). Estas olas de enerjia negativa, a vezes el benadan las traye el mizmo sovre su kavesa por ser arrogante o ke se alava a si mizmo por su saviduria o ermozura o su rikeza. Esto todo, kavza ke el de enfrente es apto (a vezes sin kerer o sin apersivirse) mandar estas enerjias danyadoras.                                                En esto rogamos siempre  – "Ayin aRa ke no mos apoze".

Ribi Yeoshua en Pirke Avot (2, 9) dize: "Ayin aRa i Yetser aRa (mal inklinasion), i aborresion de los seres umanos sakan a el ombre de el mundo"

Pero ke se aze para alesharmos de ojo malo? Komo evitar los danyos ke afitan por kavza de Ayin Ara?

El investigador Michael Molho, en sus eskritos sovre las kostumbres de los Judyos de Salonik, mos konta komo espesialmente miravan muestras madres a guadrar a los bebes de miradas de selo, i los djenitores se espantavan afilu entre eyos de avlar o alavar la ermozura de los chikos, sus sanedad o otras kalidades. En kada nada diziyan "Ainara no", "mashalla", o "Ben Porat Yosef". Kuando algun ninio has-vesalom kaiya hazino le azian espesial un kamea (talisman), o yamavan a la "karmadera" ke le aga algun prekante en murmureando nombres de andjeles o de muestros ansestros, padres i
madres.
Apropo, el biervo "karmadera" me sona muy kuryozo i enigmatiko. Me demando, i no tengo repuesta. Es ke tiene koza de ver kon el termino "Karma" en la kreensia del Hinduismo?

Para defendermos kontra el "Ayinara" ("nazar", en turko), me parese ke lo mijor es de evitar (a lo tanto posivle) tension, i presion en muestras vidas. Akavidarmos en muestro komportamiento de no evokar selo. De la otra parte, no rogar mal a ninguno, ni guadrar ensunia (renkor) afilu si alguno mos kavzo mal. No es para mozotros, sovre la tierra okuparmos de la "kontablita".           Ay de kuidar ke muestro ambiente sea yeno de ENERJIAS POZITIVAS.

Naturalmente, es bien savido, ke kontra el "ojo malo" se uzan varyas amuletes, sal i ajo en las faldukeras, la "hamsa" tan populara kolgada a la pared en kaza, o sovre el kueyo, i mas. Afilu sovre los kavayos ay ken los adorna kon ambarikas blu o kurdelas koloradas. Parese ke no kreen en el refran muestro: "Kavayo maldicho le arrelumbra el pelo".
.
Entre todos los mezos de proteksion tenemos i el konsejo de rabinos de meldar salmos de Tehilim, i espesialmente el salmo 31.
Yo ya lo meldi oy de manyana. 
Lo ke me aferro el ojo aya, es el pasuk numero 7:
"Yo aborresko a los ke esperan a nadas de vanidad (vanidades iluzorias);

i yo en Adonay me enfeuzio".

                                                                                                                                                                            
 


+ Añadir nuevo comentario
Traducciones enviadas por usted
Loading Cargando ...
+ Enviar Comentarios
+ Enviar contenidos sugeridos

לאדינו         Ladino


Artikolos de Matilda Koen Serano
      
Artikolos de Yehuda Hatsvi
    
Artikolos de Gad Nassi
  
Artikolos de Eliezer Papo
   
Sefaradi Taor

ladino
Fecha y hora
 

La Asosiasion Arkadash | Ladino | לאדינו | judeo espanyol |

אתר זה הוקם ע"י זום ייעוץ ומערכות מידע