ladino  

 
Judeo espanyol
Contador:

Inicio >> ARTIKOLOS >> Yehuda Hatsvi >> Entre Erets Yisrael i la Diaspora
 

Entre Erets Yisrael i la Diaspora
Yehuda Hatsvi


Antes algunos 15 dias selebrimos el Moed de Shavuot, aunke (siendo ke no tenemos el Bet aMikdash) no podimos fiestarlo kompletamente segun lo ke mos enkomenda la Tora:
"I selebraras la Fiesta de las Semanas (Shavuot) la de las primisias
de la segada del trigo" (Shemot 34, 22).

Pero, segun muestra tradision, este Moed de Shavuot es tambien el tiempo en el kual los Ijos de Yisrael  akseptaron, sin ninguna ezitasion, a resivir la Tora.

En diferente de todos los puevlos, los fundamientos de muestra kultura no fueron kreados en ningun pais natal; i ayinda en estando en el dezierto, antes de entrar a la Tierra Prometida, oyeron los trivos de Yisrael las palavras de Moshe: "En este dia te izites puevlo a Adonay tu Dio" (Devarim 27,9).

Es kuryozo tambien, ke durante toda la estoria, muestro puevlo gozo muy muy pokas epokas de independensia politika. En mi opinion, fue solo el reinado de los reyes David i Shelomo el kual ke se puede konsiderar komo una epoka de independensia kumplida. En todas otras epokas tuvimos en Erets Yisrael una independensia limitada, o mijor dizir una sierta otonomia kulturala ke mos permetio mantener muestra relijion i dezvelopar mas muestra kultura.

Mas ayinda, es interesante de notar: Nunka durante la Galut no sezo de egzistir vida Judia en Erets Yisrael. Pero, siempre, desde al menos 2500 anyos, egzistiya
- paralelmente- una diaspora Judia en Babilonia, Persia, Ejipto, i mas.

Estos fatos istorikos fueron una de las razones porke no kresio en muestro puevlo una teoria governamental semejante al rejimen demokratiko de la Antigua Atenas.

Personajes komo Shemuel el profeta preferian la teokrasia, ma el puevlo en su tiempo insistio dizyendo:
"Konstituyenos agora rey para djuzgarnos komo (tienen) todas las nasiones".

El dominio absoluto de un solo rey tiene muchos aspektos pozitivos, segun la saviduria del rey, su karakter i su devosion verso su puevlo. De la otra parte, la estoria mos ensenia por inumerables kavzos de krueldad i pervirtio de la djustisia de parte de muchos reyes, o diktatores, durante los siglos, inkluye –malorozamente- i reyes djudyos tambien, empesando de David, Ahav, i otros mas.

En los siglos de al kavo, ay  una tendensia en el mundo, de pasar, komo "menor de dos males" i estabilisir governos demokratikos, "governos del puevlo", en los kual la masa total de todos los sivdadinos del pais elijen a sus lideres.

El Rey Faruk, el ultimo rey de Ejipto predizio en su ultimo anyo al poder (1952):
"En el futuro, solo avra sinko reyes: los kuatro de las kartas de djugo, i la Monarkia Britanika".  (no se por ke, ma tengo la impresion ke Faruk konosiya el pekenyo poema de Federico Garcia Lorca: "Los reyes de la baraja")…

Kon todo el respekto a la demokrasia, un tal rejimen no pudo evitar en 1933 el dezastre mondial kuando suvio al poder, mezo eleksiones demokratikos, el partido Nazi en almania.
Sin komparizon, naturalmente, ma en miniatura, ay i otros peligros ke esperan a la puerta de kada pais demokratiko. Por un solo egzempio vos dire ke veo kon mucha dolor kuando, (kon el nombre de la "libertad de la ekspresion"), en un pais ke konosko muy bien, el governo apoya finansialmente a produktores de filmos, yenos de kritika-sin-frenos kontra la politika del pais; i klaramente amostrando al mundo, el punto de vista de los enemigos. Verdad, muchas vezes los produktores de los filmos lo azen esto por razones de "mijor vendida" en todo el mundo. Ma, ni este argumento no amaha la dolor.

Lo ke kiero apuntar es ke afilu sin tomar en konsiderasion los dos egzempios espantozos ke vos prezenti, uno de los defektos del sistem demokratiko, indemas en los tiempos de la televizion,  es el fato ke el publiko sera muchas vezes influensado de la aparensia eksterior, o sea la karisma, de los kandidatos, i no nesesariamente de sus saviduria o sus dono i sus talento de dirijir el governo.  La konfrontasion entre Nixson i Kennedy, prezidentes de los Estados Unidos, en la televizion (en 1960),  me parese ke demostra un poko a esta kavza.

A vezes me demando, de mi para mi, si es ke Moshe Rabenu, aedado de 80 asta 120 anyos, "pezgado de boka i pezgado de lengua", gano la admirasion de muestro puevlo kaji durante 3500 anyos, por su karisma personal o por los ideales ke puzo delante de mozos.  Despues de todo, keridos lektores, ya savesh la repuesta.

Malgrado todas mis remarkas arriva, podemos ser kontentes ke la mayoria de muestro puevlo bive oy en dia, en paizes demokratikos.  Sierto ke en esta atmosfera liberala avran personas de los muestros ke toparan oportunidades de ser embolvidos en la politika, kada uno en su paiz. Bueno, es natural. Pero lo ke trato yo a dizir aki es ke la politika no es la parte mas importante en la vida de muestro puevlo. Nunka fue. Lo espesial, i el sekreto del arrebivimiento de muestra nasion, kada vez de muevo, es en el mantenimiento i el dezvelopamiento de muestra kultura, djuntos kon la solaridad ke egziste, (i ay de enforteserla), entre todas partes del puevlo Judyo donde kiera ke esten, sanos i rezyos.

                                                                                                                                                                            
 


+ Añadir nuevo comentario
Traducciones enviadas por usted
Loading Cargando ...
+ Enviar Comentarios
+ Enviar contenidos sugeridos

לאדינו         Ladino


Artikolos de Matilda Koen Serano
      
Artikolos de Yehuda Hatsvi
    
Artikolos de Gad Nassi
  
Artikolos de Eliezer Papo
   
Sefaradi Taor

ladino
Fecha y hora