ladino  

 
Judeo espanyol
Contador:

Inicio >> FestiLadino
 

Festiladino
La kantiga del korasón

Matilda Koén-Sarano

Finalmente el Festiladino tornó anoche sovre la shena kon la alegría de todos,  los organizadores,  los autores de las kantigas i el públiko, ke lo estávamos asperando kon grande empasiensia.  Los autores en todo el mundo estuvieron kompozando kantigas, kon la esperansa de poderlas mandar al Festiladino. 

En efekto apenas fue publikado ke el Festiladino se estava renovando, arivaron a la kompetisión kaje 50 muy ermozas kantigas muevas de Espanya, Italia, Gresia, Turkía, Estados Unidos, Canada, Argentina, Mexico, Brazil i, naturalmente de Israel.

En las kantigas ke arivaron este anyo notimos una puja en el livel de las palavras i la múzika, i la partisipasión de autores de fama mondial. A parte de esto apuntamos kon muncho plazer ke vinieron a kantar esta noche sovre la shena del Teatrón Yerushaláyim kantantes del estranjero también, komo Sarah Aroeste, ke vino de New York, i "Las Estreyikas d`Estambol" ke vinieron de Turkía. Eyos konfirman kon sus partisipasión el karakter enternasional del Festiladino, i el enteresamiento ke están demonstrando siempre mas autores i kantantes en Israel i al estranjero.

Esto demonstra ke el entereso jeneral sovre el ladino está pujando i se está difundiendo en el mundo, grasias al Festiladino también. 

El amor tomó este anyo el lugar predominante en los sujetos tratados en las kantigas prezentadas a la kompetisión. El amor tiene munchos aspektos: puede ser el primer amor, el deskarinyo de amor, el amor djoven o  el de la maturidad.

Otro sujeto, de no minor emportansa ke se nota en las kantigas, es el  amor por la Espanya i el regreto por la ekspulsión de los djudiós de eya. En las otras kantigas topamos la alavasión al Dio i un buen pranso de shabat.

Anoche tuvimos el plazer de ver i sintir kantantes ke ya konosemos i otros ke oyimos por la primera vez, ma no ay duda ke todos son de muy alto livel, i este Festiladino, komo los otros, izo deskuvrir estreyas muevas en el kampo del kanto en ladino.

Además a parte de las ermozas bozes, vimos sovre la shena kantantes djovenes i ermozas, vistidas kon grande elegansia, komo Hen Bar, Shira Kerner, Sarah Aroeste, Judy Bechar, Reut Rivka Shabi i Noa Godel, ke mos sorprendieron por sus grasia. Gila Beshari ke ya konosemos muy bien del pasado mos delisió kon su boz i su enterpretasión.

De la parte maskulina partisiparon tres kantantes, de los kualos Hadar Ben-Tzion i Refael Ben-Or son muevos para mozotros, mientres ke Tzahi Sitton ya partisipó kon éste a tres Festiladinos. I la grande atraksión para el públiko: "Las Estreyikas d`Estambol" dirijidas por Izzet Bana, ke no mankaron de tomar el sigundo premio de la nochada.

El programa artístiko intermedio mos prezentó, este anyo mas de siempre, ermozas i ezmovientes sorprezas: Baldi Olier kon sus dos ijos i sus gitarras mos regalaron de sus virtuozizmo muzikal.

La bayladera de flamenko Tania Vinokur no sólo bayló, ma i tanyó el violino. Mony Moreno Armoza kon el grupo muzikal de "Nahlaot" kantó una sería de kantigas tradisionales de boda, kon el alegre akompanyamiento de "las Estreyikas d`Estambol". Noa Godel, Tzahi Sitton i Judy Bechar  terminaron la parte artístika de la nochada kon una sería de kantigas de merkado, por el plazer del públiko entuziasta. El moderador de la nochada fue Eli Matitiahu, ke prezentó kon su maestría abitual.

Este anyo Eli Matitiahu i Mony Moreno Armoza otorgaron a Matilda Koén-Sarano, komo premio por su ovra  de vida, ke inkluye su aktividad en la organizasión del Festiladino, la arpa de oro, ke viene dada komo premio a la kantiga ke ariva al primer lugar en la kompetisión.  Matilda rengrasió kon palavras ezmovidas i ezmovientes.

La kantiga, ke arivó primera kon un grande konsenso del públiko fue "Primer amor", palavras de Haim Vitali Sadacca de Canada, i múzika de Reneta Sibel Yolak de Estambol, fue kantada por Noa Godel i Tzahi Sitton.

La kantiga ke arivó sigunda es "Ke lo bueno de savor" palavras de Amalia Baruch, múzika de Maty Levy de Mexico-City, i  fue kantada por "Las Estreyikas d`Estambol", dirijidas por Izzet Bana. La kantiga ke arivó tresera es "Deklarasión de amor", palavras de Issahar Avzaradel z"l, múzika de Baldi Olier, i fue kantada por Judy Bechar.

Tres arpas, una de oro, una de plata i otra de bronzo, fueron otorgadas a los kantante de la tres kantigas ke ganaron. La nochada se eskapó en grande alegría, entre los redondikos de papel multikolor, ke  estavan abashando de taván.

Enfín kero rengrasiar de todo mi korasón a los organizadores de este evenimiento, i antes de todos a Mony Moreno Armoza, Eli Matitiahu i Ziva Almagor, ke se empenyaron  por dos anyos para la reushita del Festiladino 2008.

Además rengrasio a todos los artistas ke prezentaron sus kantigas. Muestra rekonosensia va a los ke sus kantigas suvieron o no suvieron a la final en la mizma manera. 

Grasias a los maraviyozos kantantes ke  oyimos anoche, grasias al maestro de orkestra Rony Weiss i al aranjador Sergey Abir, ke mos akompanyan por el treser anyo, i grasias a la Orkestra Sinfónika Yerushaláyim de la Radio de Israel.

No mos ulvidaremos de rengrasiar al rejisor Shuki Wagner, i a todos los ke kontribuyeron en varias maneras a la reushita de esta nochada. Grasias también al Teatrón Yerushaláyim i a la Televizión Israelí, ke mos permeten de divulgar el Festiladino en todo el mundo.

Matilda Koén-Sarano

 


+ Añadir nuevo comentario
Traducciones enviadas por usted
Loading Cargando ...
+ Enviar Comentarios
+ Enviar contenidos sugeridos

לאדינו         Ladino


Artikolos de Matilda Koen Serano
      
Artikolos de Yehuda Hatsvi
    
Artikolos de Gad Nassi
  
Artikolos de Eliezer Papo
   
Sefaradi Taor

ladino
Fecha y hora
 

La Asosiasion Arkadash | Ladino | לאדינו | judeo espanyol |

אתר זה הוקם ע"י זום ייעוץ ומערכות מידע