ladino  

 
Judeo espanyol
Contador:

Inicio >> Kantadores en Ladino >> G-I >> Gila Beshari
 

Gila Beshari
(Moshav Ishi, Israel)

Gila Beshari nasió en el kartié Ben Tzion en Natania de djenitores orijinarios  del Yemén. De sus primeros anyos de vida la fasinaron las melodías i los vokalizmos de los imnos i las orasiones del kal yemenita. Sus djenitores la enkorajaron a kantar de muy chika edad i su padre la izo mizmo entrar en el mundo serrado del "diuán", ke es el kanto de los ombres, ke Gila konose muy bien, komo el kanto de las mujeres, ke es el kanto ferial de los yemenitas. Eya fue deskuvierta  en el 1976 en el festival "Dror La-Menatzéah Shir Mizmor" 5737, ande interpretó la kantiga de Yair Avi-Amir i Bezalel Aloni "Tfilá" (Orasión). Eya tornó a este festival i en el 1982. En este anyo interpretó un kante de amor yemenita tradisional, ke fue integrado en la ópera orkestral del kompozitor Mark Kopitman "Lekol Hazihronot" (A la boz de los rekordos), ke la izo ganar el premio Kosivitzky, le trusho un sukseso mondial, i ke eya interpretó por la primera vez kon la orkestra sinfónika Yerushaláyim de "Kol Israel". Kon el pasar de los anyos Gila Beshari tuvo munchas performansias de kantes yemenitas en Israel i sovre todo al estranjero. Gila aparesió entre otras kon la orkestra filarmónika israeliana dirijida por Zubin Metha en konsertos ke tuvieron lugar en Evropa,   los Estados Unidos,  Rusia i  el Leshano Oriente. Eya produsió en una enrejistrasión personal dos kasetas ke enkluyeron el kanto yemenita integrado a múzika pop i múzika étnika. En el 1998 empesó a realizar su viejo suenyo: la produksión de un album de múzika yemenita orijinal, i empesó a lavorar sovre el album "Zafa", ke salió en el 2001 i tuvo reaksiones entuziastas. En este album eya ekluyó lo mijor del kanto yemenita popular i tradisional kon el aranjamienyo de  Yossi Madmoni i el akompayamiento de munchos múzikos, kon un koro de mujeres i uno de ombres, ande kanta i su marido Eli Beshari, ke es i él kantador.  El amor de Gila por la múzika en munchas sus nuanses la trusho a la shena del kanto en ladino. En ségito a su enkontro kon Aharon Cohen, akel tiempo direktor jeneral de la Autoridad del Ladino i su Kultura, i kon el ayudo de Matilda Koén-Sarano, ke le izo oyir viejas enrejistrasiones de su madre, Gila empesó a enterpretar kantigas en ladino i dedikó mizmo una nochada en el Sentro Etniko "Suzan Dallal" a la memoria de Diana Sarano, madre de Matilda.  Además eya aparesió en una nochada de ladino en los "Días de leche i miel" en el Yam Amélah. En el 2005 Gila partisipó al Festiladino, i kon la kantiga "Ojos" de Horacio Lovecchio i Rita Gabbai-Simantov resivió el treser premio. En el 2007 eya aparesió en un festival emportante en Tokyo en kantes yemenitas i ladino. En el 2008 suvió a la final del Festiladino kon la kantiga "Ayde ayde" de Liliana Treves Alcalay.  Además Gila aparese en toda Israel en nochadas de solo ladino.

Matilda Koén-Sarano

                                                                                                                                                                            
 


+ Añadir nuevo comentario
Traducciones enviadas por usted
Loading Cargando ...
+ Enviar Comentarios
+ Enviar contenidos sugeridos

לאדינו         Ladino


Artikolos de Matilda Koen Serano
      
Artikolos de Yehuda Hatsvi
    
Artikolos de Gad Nassi
  
Artikolos de Eliezer Papo
   
Sefaradi Taor

ladino
Fecha y hora
 

La Asosiasion Arkadash | Ladino | לאדינו | judeo espanyol |

אתר זה הוקם ע"י זום ייעוץ ומערכות מידע