ladino  

 
Judeo espanyol
Contador:

Inicio >> Kantadores en Ladino >> G-I >> Hadás Pal-Yardén
 

Hadás Pal-Yardén
(Yerushaláyim)

Hadás Pal-Yardén es una kantadora israeliana ke kanta en ladino (djudeo-espanyol) i una doktorante de etnomuzikolojía. Durante sus estudios de máster eya investigó las performansias kontemporáneas del corpus de los kantes en ladino en Yerushaláyim, i dedikó sus teza a este sujeto. Eya fue lisensiada en el 2002 por el Departamento de Múzika de la Universidad "Bar Ilán" en Israel.
Eya pasó dos anyos en el Konservatorio de la "Tchnical University (Departamento Vokal)" de Estambol, komo envestigadora, estudiando folklor, múzika klásika turka, múzika otomana i  makam.  Se perfeksionó onde Reha i Selma Sagbásh, muzisianas de la Radio Turka TRT, i partisipó kon eyas a un konserto en Israel en el atelié de múzika "Síah Yam Tihoní" (Diálogo Mediterráneo).
En el 2002 empesó los estudios de doktorado en la seksión de etnomuzikolojía en el programa de studios muzikales avansados (MIAM) de la "Technical University" de Estambol.
Hadás aparesió kon la kantadera de ladino Ruth Yaakov en unos kuantos espektalos en Israel, i kon la enformante, nasida en Turkía Berta Aguado. Aparesió en Salonik, en Turkía i en Israel i kolaboró kon muzisianos turkos muy famozos. Partisipó a varios projektos muzikales kon Djiat Ashkin, i entre eyos kantó komo solista en su albom el zaybek turko "Farahi" (2000). Además partisipó al CD de Inón Muálem
 " Regahim Mishtaním" (Momentos variantes) komo solista en la kantiga "Kante al djasinto) (2003). En estos últimos tiempos eya produsió i realizó kon Stelyo Berber la kantiga "Kanariyo" en ladino, en grego i en turko en un CD ke reprezenta  la divizión de múzika de la Universidad Téknika de Estambol.
Sus reprezenasiones a solo son: "De Salonik a Izmir – Kantes djudeo-espanyoles"  (Estambol, 2002-2203); "I tú en las flores" – Omenaje al envestigador i kompozitor de ladino Isaac Levy  (Yerushaláyim, 2003); "Vinyas i kampos" – kon el aktor Vitali Ferera (Israel, 2002); Ladino del Maroko Espanyol (Muzeo de Israel, 1999).
El CD publikado por Hadás Pal-Yardén, entitolado "Yahudice" (ke es uno de los nombres dados al djudeo-espanyol en el tiempo otomano), inkluye un repertorio de kantes arrekojidos por  Hadás mizma de diferentes enformantes, ke eya "tuvo el mazal de enkontrar" (palavras suyas), i por oras de investigasión en varios archivos de diskos de múzika. Sus enformantes prinsipales son Berta Aguado (Chanakkale), Jozeppo Burgana i Victoria Hazan (Izmir), i David Saltiel (Salonik). Su repertorio konsiste en múzika djudeo-espanyola de 4 sentros del tiempo otomano: Estambol, Izmir, Salonik i Yerushaláyim. Para la realizasión muzikal Hadás deskojó enstrumentos muzikales  tradisionales del tiempo otomano i aranjamientos ke ekspresan el karakter orijinal de kada kante i kante.

Matilda Koén-Sarano

                                                                                                                                                                            
 


+ Añadir nuevo comentario
Traducciones enviadas por usted
Loading Cargando ...
+ Enviar Comentarios
+ Enviar contenidos sugeridos

לאדינו         Ladino


Artikolos de Matilda Koen Serano
      
Artikolos de Yehuda Hatsvi
    
Artikolos de Gad Nassi
  
Artikolos de Eliezer Papo
   
Sefaradi Taor

ladino
Fecha y hora