ladino  

 
Judeo espanyol
Contador:

Inicio >> ARTIKOLOS >> Yehuda Hatsvi >> Hannanel da Foligno
 

Hannanel da Foligno
Yehuda Hatsvi


Aze mucho ke bushkava informasion sovre Hannanel da Foligno,
un judio del siglo 16, ke era una figura sentral i influyente en la komunidad
judia de Umbria, Italia.
Lo ke savia yo fue ke en 1542 anunsio el Papa, Paulus II, una bula (dokumento autorizado i firmado por el Papa ke trata en kestiones de fe).
En esta bula prometio el Papa muchos benefisios ekonomikos a judios ke desiden konvertir al kristianizmo.

Entonses, Hannanel da Foligno, a la edad de 37 anyos, paso a ser un kristyano devoto, i un misionario muy aktivo, konosido agora komo Alessandro Franceschi. Este nombre se mensiona en un livro o dos de estoria, ma sin dar muchos detalios. Para mas frustrasion, ni mis bushkedas en la Internet no enkontraron koza. Nada. Niente, komo se dize en italiano.

I na ke en el mez pasado, en meldando el mensual ebreo "Segula", me se prezento un artikolo, ke su titulo "Un paso demasiado", eskrito por Yosef Edihay Cohen.  En este artikolo interesante topi al fin kaji todos los detalios ke me mankava a saver sovre uno de los konversos mas danyozos a muestro puevlo.

Dokumentos de la sivdad de Foligno en Italia, mos dan a saver ke Alessando Franceschi era el ijo del bankier judio Angelo ben-Mosto, uno de los mas distingidos judyos de la rejion. Entre otros miembros de la famiya topamos al Rav Moshe Nissim da Foligno. Otro sovrino, Mordehay, ensenyava la Tora, i era el parnas de la komunidad de Cuneo, en la rejion de Piamonte.

Un dokumento datado 16 de Novembre 1540, afirma la nominasion de Hannanel da Foligno komo el responsable por el arrekavdamiento de los impuestos entre los judios de Umbria, Spoleto i citta di Castello.
Naturalmente, ke kon este posto alto ganava Hannanel da Foligno mucho dinero, ma tambien prestijio i buenas relasiones kon las auotoridades de la
Iglisia.  

No savemos por seguro ke fue el motivo de Hannanel, un judio riko, i muy instruido en la Ley, a konvertise al kristyanismo i indemas dedikarse kon entuziazmo en aktividades misionarias, kon el eskopo de kavzar a los judios ke se konveirten al kristyanizmo.

Komo lo supimos de un dokumento del anyo 1547, fue esta su propia inisiativa (naturalmente apoyada por la iglesia) de "darsar en las sinagogas, enseniar el evanjelio a los judios, i tambien meldar en la Biblia i interpretarla".

Justa, la mujer de Hananel, se opozava a su konversion; i siendo ke estava
estonses prenyada, eya saviya bien ke la persistensia suya a kerer ser judia, va kavzar ke la iglesia va arrevatar a su rezin nasido. Dunke, eya fuyo, i bivio un sierto tiempo en otra rejion del paiz; ma su marido, (agora Alessandro Franceschi) se adreso al Papa Paulus III demandando su ayuda para lokalizar a su mujer Asi  ke Justa fue yevada a Roma i aya dyo luz a su ijo Otavio.
Segun  previsto, Otavio fue baptizado, kresido i edukado komo un buen kristiano; indemas, en su manseves, el se adjunto a la Orden Dominicana.      El parvino ser un kardinal i predikador muy renomado, i konsejero del Papa Clement VIII.

Ma tornaremos a Alessandro Franceschi el padre. Desde kuando fue baptizado (en 1542) el gano la amistad de Ignacio de Loyola, el shef de la Orden Jesuita. Una de las ovras misionarias  de estos dos aktivistas fue de konseder fasilitasiones materiales a los judyos ke ekspresavan alguna intension o veluntad de konvertirsen.

En su lucha kontra los judyos i kontra el judaismo, Alesandro partisipo en un ekipo de teologos ke egzaminaron los eskritos del Talmud i salieron kon una akuzasion ke el Talmud esta yeno de maldisiones i abuzos kontra el kristianismo. A konsekuensia, la desizion de los kardinales fue de kemar todos los livros del Talmud; un akto barbariko ke okurio en 1553 en la plasa Campo di Fiori en Roma.

Savemos por muchos konversos, durante la estoria de muestro puevlo, ke pasaron a ser "mas katolikos ke del Papa"; sera, jeneralmente, por agrasiarse en ojos de los kristianos. Pero, en todas las aktividades de Alessandro Franceschi se nota el grande odio ke tuvo verso el puevlo judio.  Sea asi, podiamos suponar ke este konverso prendido o apasionado, iva sentirse satisfecho kon su eksito komo misionario entre los judios, i tambien muy kontente kon la apresiasion ke obtuvo entre los sirkolos de la iglesia en Roma.

Ma no. Sus sentimientos de fanatizmo i el odio loko de Alessando kontra los djudios ya traspasaron todos los limitos, i lo yevaron dar "un paso demasia".  Eventualmente, el termino kon un gran fiasko su "kariera kristiana":  

En un dia de Avril 1555, djustamante en salida de Pesah, fue topado en el semeterio judyo de Roma un kadavre de ninio kristiano, ferido i torturado.
Siertamente ke un tal asasinato salvaje izo revoltar los sentimientos del puevlo eksijente a saver kien fue el asasino.
En esto, pregono Alessandro Franceschi  ke "no ay duda ke un tal akto malo fue echo por mano de judyos, ke su kostumbre es de matar un ninio kristiano entre Purim i Pesah. Dunke, ay de enprezionar a todos los judios, torturarlos, i azerlos konfesar".

Alessandro Franceschi tiro aki una malevola kalumnia. Ma, siendo ke era konosido komo un eksperto en las leyes de los judyos, fueron sus palavras akseptadas entre la povlasion jeneral i tambien por los kardinales.

Fue un mazal ke el Papa Marcelo II ordeno de investigar bien kien fue el kulpable en el krime! No paso mucho tiempo, i un mediko ke vino a egzaminar el kadavre del povre ninio testimonio ke lo avia visto al ninio en la kaza de un tal dottor Sulim. En la interrogasion, konfeso este Sulim ke si, el fue el ke mato al ninio para danyar a los judyos.

Los judyos de Roma, sueltos i limpios de todas kulpas i akuzasiones, fiksaron la data de 3 del mez de Iyar para fiestarlo komo "Purim Segundo". Una megila espesial konosida komo "Igeret Nissim" se meldava en este dia para markar el nes de la salvasion de akea mala kalumnia.

Alessandro da Foligno murio en Fevrero 1556 a la edad de 51.
Su muerte supetania fue interpretada por los judios komo un kastigo de los sielos ke lo golpeo.

                                                 *** 
En avlando kon uno de los moradores en el Bet Avot Recanati (kaza de los ansianos), le konti sovre lo ke ambezi del artikolo sovre el konverso de Foligno.
Komo si a kambio, mi interluktor me dyo a saver ke Yosef Edihay Cohen,
el autor de este artikolo, es el ijo de muestra amiga, Matilda Kohen-Sarano...




eSefarad 143

+ Añadir nuevo comentario
Traducciones enviadas por usted
Loading Cargando ...
+ Enviar Comentarios
+ Enviar contenidos sugeridos

לאדינו         Ladino


Artikolos de Matilda Koen Serano
      
Artikolos de Yehuda Hatsvi
    
Artikolos de Gad Nassi
  
Artikolos de Eliezer Papo
   
Sefaradi Taor

ladino
Fecha y hora
 

La Asosiasion Arkadash | Ladino | לאדינו | judeo espanyol |

אתר זה הוקם ע"י זום ייעוץ ומערכות מידע