ladino  

 
Judeo espanyol
Contador:

Inicio >> ARTIKOLOS >> Yehuda Hatsvi >> Hasday Crescas – un filozofo olvidado
 

Hasday Crescas – un filozofo olvidado
Yehuda Hatsvi


El refran sefaradi mos dize ke "todo dependiente al mazal,
afilu Sefer  Tora ke en el ehal".

En las proximas linias tratare de irradiar luz sovre Hasday Crescas, un filozofo judio luminozo, pero kaji eskondido en la solombra de la estoria.

Ribi Hasday Crescas (1340-1411) nasio en Barcelona, i fue el lider de la komunidad judia de Saragosa durante dos dekadas. Malgrado su alto posto, el  -kon otros dirijentes de la komunidad- fueron arrestados (en 1367) por kavzo de una kalumnia;  ma, visto ke eran inosentes, fueron liberalizados despues de muy poko tiempo.

En 1373, Ribi Hasday mantuvo negosiasiones kon Pedro IV, Rey de Catalunia, sovre los Derechos Siviles de los judios. Despues, en aserkandose komo konsejero al Rey Juan, Ribi Hasday fue nominado a varios postos importantes.
En los pogromes ke desbrocharon en Barcelona en 1391, sufrio Ribi Hasday
i una trajedia personal kuando su ijo regalado fue matado durante akeos pogromes, i fue destruida la komunidad de esta sivdad.

Sierto ke la filozofia de Ribi Hasday Crescas era una filozofia teolojika,
komo ansi pasava en akea epoka. Ma. antes de entrar al debate teolojiko,
el insistio a komensar kon los temas filozofikos de la epistemolojia
(ke es parte de la filozofia ke estudia los fondamientos i los metodos del konosimiento sientifiko). La primera pregunta de la epistemolojia es si es posivle alkansar un konosimiento verdaderamente sientifiko de la realidad.

Segun Ribi Hasday no podemos okuparmos en el konosimiento del Kriador
si no estudiamos antes de todo la konosensia misma. Esta regla la topamos en las fiksasiones de Immanuel Kant, el filozofo aleman ke nasio mas de 300 anyos despues de la muerte de Ribi Hasday.
Lo ke disho Immanuel Kant es ke no es posivle diskutir la ontolojia (ke es parte de la metafizika ke estudia el ser i sus propiedades transedentales) antes de investigar al fondo KE es la persepsion umana; i KOMO es muestro konosimiento de la realidad. 

Lo kuriozo es ke Ribi Hasday Crescas era un gran filozofo, ma el ke detestava la filozofia. El  se okupava mayormente en la filozofia, kon el klaro propozito de deskuvrir sus vulnerabilidades i su destruksion.
La kritika de Ribi Hasday i sus atakes fueron apuntados kontra los prinsipios de la filozofia grega i aristotela,  De una manera, esta kritika fue en muchos kavzos  una kritika verso varios prinsipios ke el RAMBAM avia adoptado i eskrito en sus livros.

El livro klasiko "Or Adonay" ("La Luz del Dio") de Ribi Hasday es muy importante no solamente en el kampo de la filozofia en jeneral, ma tambien, i espesifikamente, de parte de la filozofia de la siensia moderna. Rabi Hasday, kon su kritika revulosionaria  reusho kevrar muchas de las "axiomas" de Aristo (322 aC – 384 aC) en el kampo de la fizika i de la metafizika.               El averiguo ke estavan bazadas sovre supozisiones yerradas. Esta kritika de Ribi Hasday antisipo la persepsion moderna del universo, i  -eventualmente- inspiro a las teorias de sientistas komo Gallileo i Isaac Newton.

En vista de los yerros de la sensia aristotela, Ribi Hasday predika de apartar
(por razones metodolojikos) entre las okupasiones sientifikas i entre la kreensia relijioza. La kreensia no nesesita provas sientifikas. La fe derive de un sentimiento relijiozo interno.

Una parte de sus eskritos es dedikada al tema de "la libre eleksion".
Segun muestros savios antiguos, bazandosen a la Tora, el benadam es libre a elijir su kamino en la vida. Ribi Akiva en Pirke Avot (3, 21) lo disho en un pasuk muy konsizo: "Lo todo previsto, i la lisensia es dada". Esta kreensia ke tenemos en el judaismo es al kontrario del determinismo. El determinismo es una konsepsion filozofika segun la kual todos los akontesimientos del universo (i en las vidas de las personas) estan sometidos a las leyes naturales i previstas de adelantado por el Dio, el Todopoderozo.

Es verdad, ke en la idea de "libre eleksion" ay komo una kontradiksion;
porke si todo ya esta previsto, ke mos keda a mozotros umanos de elijir?
Una de las konsekuesias de Ribi Hasday Crescas en este tema teolojiko es ke el espasio de la libre eleksion de la persona egziste en su propia veluntad  i non nesesariamente en el rezultado final. Es por esto ke en muestra relijion el benadam es djuzgado, i rekompensado, por su veluntad internal afilu kuando no avia reushido a realizar lo ke bushkava para bueno.   

Aki agrega Ribi Hasday sus pensamientos sovre el amor del Dio a su kreasion, sovre el infinito, i sovre las posibilidades infinitas ke en las manos de la persona, i ke todas por todas son inkluyidas en el pensamiento  divino eterno i infinito.                                                                                                    
Estas ideas de Rabi Hasday Crescas penetraron eventualmente a los eskritos de Baruh Spinoza (1632-1677).

Merese Ribi Hasday Crescas ser mijor rekonosido por su grande kontribusion a la filozofia i a los pensamientos sientifikos en jeneral.

+ Añadir nuevo comentario
Traducciones enviadas por usted
Loading Cargando ...
+ Enviar Comentarios
+ Enviar contenidos sugeridos

לאדינו         Ladino


Artikolos de Matilda Koen Serano
      
Artikolos de Yehuda Hatsvi
    
Artikolos de Gad Nassi
  
Artikolos de Eliezer Papo
   
Sefaradi Taor

ladino
Fecha y hora
 

La Asosiasion Arkadash | Ladino | לאדינו | judeo espanyol |

אתר זה הוקם ע"י זום ייעוץ ומערכות מידע