ladino  

 
Judeo espanyol
Contador:

Inicio >> Kantadores en Ladino >> J >> Jill Rogoff
 

Jill Rogoff
Kantandora i Kompozitora
(New-Zealand – Yerushaláyim)

Jill Rogoff nasió en New Zealand i bive en Israel del 1979. Eya trae a su públiko una  rika tradisión muzikal de todo el mundo, o akompanyándose kon la gitarra i una chika arpa, o kantando a kapela. Su spesialitá es la múzika popular, la múzika antika i la múzika djudía sigún diferentes tradisiones, i sovre todo sigún la tradisión djudeo-espanyola. Kompoza kantigas eya mizma, i mete en múzika kantigas de otros poetas.
En el 1998 Jill fue envitada a kantar un "lider" de Schubert en el kuadro de los konsertos en Israel. Eya kontinuó sus estudios klásikos kon Judi Axelrod, Neil Jenkins, Poppy Holden i Margaret Peckham. Jill partisipó a ateliés de múzika antika sea en Israel i sea al estranjero kon maestros muy reputados.  Aparesió por munchos anyos en el festival "Sulam Yaakov", i aparese agora en programas de radio en Israel i al estranjero, lo mas sola, ma en pasado kon munchos varios muzisianos en Israel, en las Izlas Británikas i en Evropa.Todas las turnés de konsertos ke izo en los Estados Unidos, en Evropa, en Australia i en New Zealand tuvieron muncho sukseso. Jill fue envitada a partisipar a Festivales, sea en Israel (inkluzo el Festival de Abu Gosh i el Festival de la Renesans en Ihiam), i al estranjero. En el 2007 eya arivó primera en la kompetisión de arpa en el Richmond Highland Games and Celtic Festival. En septembre 2010 irá a Praga para kantar en el famozo Kal "Sefaradí".
Asta oy Jill Rogoff  publikó 6 rejistrasiones komo solista:"Through An Open Door"     (Atraverso una puerta avierta) (1990); "The Celtic Cradle" (La kuna séltika) (1994), ke resivió dos premios en los Estados Unidos; "Across de Narrow Sea" (Mas ayá de la mar estrecha) (1996); "The King`s Well" (El pozo del rey) (2003); "In the Heart of Winter " (En medio del invierno) (2005). Su CD del 2006, entitolado "The Voice of de Wanderer" (La boz del vagabondo) es una rejistrasión únika de kantes tradisionales djudiós de todo el mundo. En este CD eya kanta no sólo en ebreo,  ma en ladino i en yidish,  i en aramaiko, en árabo, en persiano i en dialekto kurdistano. Además eya  tiene la entansión de publikar una seria de broshuras sovre sujetos varios de kantes populares ke fueron ulvidados kon el tiempo.
En el  2002 eya kantó 5 muevas kantigas en ladino en el CD "Di ke no es tadre" de Matilda Koén –Sarano i Avraham Reuveni, ke tuvo muncho sukseso. Komo muzikologa eya editó un rekolio spesial de kantes yakobitas (kantes del movimiento de liberasión eskosez del siglo 17 en delantre), ke se está aprontando a publikar en futuro. En estos últimos anyos lavoró a la prezervasión de kantes populares fransezes.
 Jill fue una de los fondadores de la organizasión nasional para la múzika popular en Israel, i de "Nevel: Reshet Anevel Aisraelit" (La Red de la Arpa Israeliana). Ay sesh anyos ke es arpista terapeútika, i tanye kon la arpa en el ospital Shaaré Tzédek en Yerushaláyim, múzika para hazinos terminales i  bebés prematuros. "Jill kanta komo un esuenyo" disho un jurnalista, topando todos de akordo.

Matilda Koén-Sarano

                                                                                                                                                                            
 


+ Añadir nuevo comentario
Traducciones enviadas por usted
Loading Cargando ...
+ Enviar Comentarios
+ Enviar contenidos sugeridos

לאדינו         Ladino


Artikolos de Matilda Koen Serano
      
Artikolos de Yehuda Hatsvi
    
Artikolos de Gad Nassi
  
Artikolos de Eliezer Papo
   
Sefaradi Taor

ladino
Fecha y hora
 

La Asosiasion Arkadash | Ladino | לאדינו | judeo espanyol |

אתר זה הוקם ע"י זום ייעוץ ומערכות מידע