ladino  

 
Judeo espanyol
Contador:

Inicio >> Kantadores en Ladino >> J >> Joaquín Díaz
 

Joaquín Díaz
(Zamora, Espanya, 1947)

Joaquín Díaz nasió en Zamora (Espanya) en el 1947. En el 1951 se transferó a Valladolid ande izo sus estudios medios i superiores. A la metad de los anyos `60 empesó a dedikarse kompletamente al estudio i a la divulgasión de la kultura tradisional, dando konsertos i konferensias en kuaje todas las universidade espanyolas  i munchas otras en Portugal, Fransia, Italia, Almania, Olanda i Estados Unidos. Además dio a konoser la múzika tradisional espanyola en programas de radio i televizión de Evropa, Asia i Amérika. En el 1976 abandonó las aparisiones en públiko, para dedikarse kompletamente a la investigasión de la kultura popular, sovre todo de la komunitás de Castilla i de Leon. Publikó mas de 50 livros i mas de 200 artíkolos. Tiene gravados mas de 70 diskos, i dirijó otros tantos, kon numerozos interpretes i grupos de múzika tradisional. En el 1975 el Ministerio de la Kultura de Espanya publikó  dos kasetas de kantes djudeo-espanyoles en ladino i haketía, entitolados "Temas Sefardíes"  enterpretados por la ermoza boz de Joaquín Díaz, ke fueron difundidos en el mundo por el Ministerio mizmo, i siervieron i sierven asta oy de gía para los kantantes en ladino ke vinieron después de él. Las kasetas son akompanyadas por una broshura del  Instituto Arias Montano, ande son reportadas las raízes de los kantes prezentados por Joaquín Díaz en las kasetas mizmas.
El es prezidente de la Revista de Folklor, ke él mizmo kreó en el 1980 i ke yeva su nombre, ke tiene sede  en la villa de Urenya. El tiene munchos otros títolos onorífikos en Espanya i al estranjero, i  es sivdadino onorario del Estado de Texas. En el 2002 resivió de las manos del Rey de Espanya la Medalya de Oro al mérito de las Beyas Artes. En el 2005 la Universidad de Valladolid le otorgó el títolo de doktor Honoris causa por la Fakultad de Filozofía i Letras. En el 2008 la Akademia de Múzika le otorgó el "Premio a toda una vida", ke le fue entregado  en la Gala de los premios de Múzika del 2008.

Matilda Koén-Sarano

                                                                                                                                                                            
 


+ Añadir nuevo comentario
Traducciones enviadas por usted
Loading Cargando ...
+ Enviar Comentarios
+ Enviar contenidos sugeridos

לאדינו         Ladino


Artikolos de Matilda Koen Serano
      
Artikolos de Yehuda Hatsvi
    
Artikolos de Gad Nassi
  
Artikolos de Eliezer Papo
   
Sefaradi Taor

ladino
Fecha y hora
 

La Asosiasion Arkadash | Ladino | לאדינו | judeo espanyol |

אתר זה הוקם ע"י זום ייעוץ ומערכות מידע