ladino  

 
Judeo espanyol
Contador:

Inicio >> Kantadores en Ladino >> J >> Judy Frankel
 

Judy Frankel
Kantadera i kompozitora
(Boston, U.S.A, 1943 – San Francisco, U.S.A. 2008)
De Artist direct Music, HRmusic i
Society for Crypto Judaic Studies  - Internet
 
Judy Frankel nasió en Boston en el 1943 en una famiya de desendesia ashkenazía. Empesó a kantar en las noches de Séder familiares. De la edad de 13 anyos  empesó a kantar en bodas i bar-mitsvás. Estudió múzika rok i djaz en la Universidad de Boston,  ma su amor se topava en la múzika folk, i después de unos kuantos anyos en Hawaii, se establesió en San Francisco. Kon el tiempo  empesó a entervistar personas ansianas de la Komunitá djudía de California del Nord, para arrekojer kantes tradisionales de los Sefaradís - los djudios espanyoles, ekspulsados de sus kazas en la Peninsula Ibérika en el 1492 -, i a kantar estos kantes en sus lingua orijinal, el ladino. Eya izo también traduksiones de las palavras de estos kantes al inglés, i kompozó melodías a palavras de poetas kontemporáneos en ladino. Estudió en la Harvard University en Cambridge, en la Berklee School i en la Boston University, i tuvo emportantes maestros de múzika. Durante un largo periodo de tiempo fue la solista vokal en el "Sant Helena" ensamble de kámera en el "San Francisco Consort", dedikado a la envestigasión i la performasia de múzika de la Edad Media i de la Renesans, i arivó a munchos paízes, inkluzo Yerushaláyim, el Portugal i Makao, en búshkeda de múzika tradisional djudía. Kon el tiempo  arrekojó kantes en 20 diferentes linguas, i se spesializó en performasias a kapela i konferensias-konsertos en múzika djudia, yidish i spesialmente djudeo-espanyola. Aparesió en munchos  programas de radio i televizión en Estados Unidos i en Evropa, i enrejistró varias kasetas, videos i DVDs sovre todo de kultura sefaradía. En el 1989 eya fue a Belmonte en Portugal, ande tornó en el 1995 i dio konsertos delantre del Prezidente de Portugal i su dama, i en el semeterio ande está enterrado Arístides de Sousa Mendes, el defunto djusto    portugés, desendiente de los djudiós ke fueron forsados a konvertirsen al kristianizmo. En el 1989 fue envitada a Santa Fé, ande dio un konserto delantre de 500 personas: munchos  kripto-djudiós i otros ke kerían ambezarsen de sus propia erensia. El livro de Judy Frankel "Sephardic Songs in Judeo-Spanish" es akompanyado por un CD de kantigas en ladino. Sus kantigas son frekuentemente akompanyadas por gitarra, ut i panderos.
Eya murió, después de una larga malatía, el 20 de Marso del 2008 en San Francisco ande morava, deshando un lugar vazío en el ámbito del kanto djudeo-espanyol.
  
Matilda Koén-Sarano

                                                                                                                                                                            
 


+ Añadir nuevo comentario
Traducciones enviadas por usted
Loading Cargando ...
+ Enviar Comentarios
+ Enviar contenidos sugeridos

לאדינו         Ladino


Artikolos de Matilda Koen Serano
      
Artikolos de Yehuda Hatsvi
    
Artikolos de Gad Nassi
  
Artikolos de Eliezer Papo
   
Sefaradi Taor

ladino
Fecha y hora