ladino  

 
Judeo espanyol
Contador:

Inicio >> Kantadores en Ladino >> K-L >> Kohava Levy
 

Kohava Levy
(Yerushaláyim)
 
Kohava Levy nasió i bive en Yerushaláyim. Después de sus estudios de liseo, estudió dezvelopamiento de la boz i solfej en la Akademia de Múzika a nombre de Rubín en Yerushaláyim, onde la maestra Juliette Medioni Garuso de bindicha memoria. Eya konosió a Isaac Levy de bindicha memoria en el kuadro de su lavoro en "Kol Israel" komo direktor de la Seksión de ladino i de múzika popular. Eya se prezentó a un programa en la Radio yamado "Karas Muevas", i fue deskojida a partisipar al programa mizmo. Ayá se namoró de Isaac Levy, ke eya definió  "un djigante", ke  era mas aedado de eya de 27 anyos.  Ma su edad no la deranjó i se kazó kon él. Les nasieron 5 kriaturas, una de las kualas se murió de puntada kuando era bebé.
Isaac Levy se murió muy presto i Kohava engrandesió sola a sus 4 kriaturas "kon el ayudo del Dio" (palavras suyas). Sigún el orden de su marido, todos sus ijos estudiaron piano de la edad de 5 anyos en la Akademia de Múzika, endjuntos a sus estudios akadémikos. Sus dos ijos son injenieres, su ija Smadar es avokata, i la mas djoven, Yasmín es una kantadera muy famoza ke aparese en el mundo entero, kantando kantes del rekolio de su padre i kantes ke kompoza eya mizma en espanyol. Isaac su marido le dizía siempre ke sus ijos deven tener antes de todo una profesión, i sólo después viene la múzika, ke es para la alma, koza ke Kohava sigió a la letra.
Después de la muerte de su marido, Kohava aparesió en munchos programas de radio i de televizión, kantando kon su ermoza boz kantigas, romansas i imnos de los livros de Isaac Levy. Su ijo Yuval le produsió el CD "El Kanto de los Levitas", ke enkluye muy ermozos imnos litúrjikos interpretados por eya, i entre poko saldrá otro CD kon el ayudo de Yuval kon 5 kantigas en ebreo de Yuval mizmo.
Kohava kontinúa su lavoro en el Buró de Matrikulasión en Yerushaláyim i viene envitada a apareser en Israel i al estranjero sola o kon su ija Yasmín.
El estil de Kohava Levy reflekta el kanto tradisional en ladino, komo vinía tramandado de madre en ija, ke es la mijor manera de salvaguadrarlo para el futuro.
 
Matilda Koén-Sarano

                                                                                                                                                                            
 


+ Añadir nuevo comentario
Traducciones enviadas por usted
Loading Cargando ...
+ Enviar Comentarios
+ Enviar contenidos sugeridos

לאדינו         Ladino


Artikolos de Matilda Koen Serano
      
Artikolos de Yehuda Hatsvi
    
Artikolos de Gad Nassi
  
Artikolos de Eliezer Papo
   
Sefaradi Taor

ladino
Fecha y hora