ladino  

 
Judeo espanyol
Contador:

Inicio >> ARTIKOLOS >> Gad Nassi >> LA KARIERA DE MONTAIGNE I SUS RAISES SEFARDIS: UN ATADIJO NON REKLAMADO
 

LA KARIERA DE MONTAIGNE I SUS RAISES SEFARDIS: UN ATADIJO NON REKLAMADO
Gad Nassi

Michel Eyquem de Montaigne (1533-1592) es una de las figuras importantes de la Renesansya. Su ovra literaria – konosida entanto ke ensayos (essais) –  se remarka por su valor filozofika. En proklamando la relatividad de las kreensyas, esta ovra se adapta al espirito revolusionario de su tiempo.
Markadas por valores umanistas, sus ideas tuvieron una influensa konsiderable en la evolusion de la pensada filozofika i literaria.
Montaigne nasio en el kastilio Montaigne, allado de la sivdad de Bordeaux en el Sud-Ueste de Fransia. Su padre, Pierre Eyquem de Montaigne, era un komersante prospero i fue governor de la sivdad. Su madre, Antoinette  Lopez (de Louppes) de Villanueva, apartenia de la parte de su padre a una familia de asendensia djudia de Toledo, ke se avia aresentado mas tadre en Portugal. Uno de sus avuelos, Meir Paragon de Calatayud, fue konvertido forsiblamente al Katolisismo en tomando el nombre Lopez de Villanueva. Miembros de esta familia fueron persekutidos por la Inkizision. Tres de eyos, inkluido su bizavuelo, Pablo Lopez, fueron egzekutidos en el auto-da-fe. Su padre, Juan Lopez de Villanueva, ke avia fuyido la Inkizision se avia establisido en la sivdad de Toulouse.
Montaigne estudio en el Kolejio de Guyenne en Bordeaux, ke era dirijado por konversos de Portugal, i probablamente en la Universitad de Toulouse, ke era un sentro de disidensia relijioza, i ande los konversos eran aktivos.
Aunke Montaigne i su padre fueron katolikos, su madre i doz de sus ermanos se avian konvertido al Protestanismo. Fue edukado por su padre, i al pareser, su madre no tuvo una influensa direkta  en su formasion. De todos los miembros de su familia, es solo su padre ke es relatado en su ovra.
Despues de aver terminado sus estudios de ley, Montaigne fue miembro del Parlamento de Bordeaux. Es solo en 1571, ala edad de 38 anios ke se retiro en su kastilio para redaktar su ovra.

Su Ovra

La Renesensya es karakterizada por la ekspansion i el enrikisimiento  de la pensada. Montaigne es una de sus figuras importantas ke orientaron i formaron a este periodo. La forma literaria de su ovra, el ensayo, es una kreasion de su otor. Esta forma se adapta de una manera remarkable ala ekspresion direkta de la pensada, sin ke posibles eksperiansas intimas, ke fueron involvadas sean reveladas. Su ovra fue konsiderada entanto ke una otobiografia, portanto la unika, ke fue redaktada en su djenero. Una biografia, ke no reporta los evenemientos en sus orden kronolojiko, i ande son dispersadas konsiderasiones sovre la politika, la istoria, la relijion, la edukasion i otros sujetos. Su otor parese  adresarse a un amigo serko en una forma de dialogo. 
"Yo mismo so el sujeto de mi lvro; no vale  ke pedresh vuestro tiempo sovre una koza  tan simple i tan vana." Ansi se eksprime Montaigne kon umilitad. "La mas grande koza en este mundo es de konoserse si mismo." Akseptar la kondision umana es akseptar muestras doz partes: el puerpo i la alma. No entanto ke esklavo i mestro, ma entanto ke doz partes relativamente iguales ke deven koegzistir pasiblamente. Asigun Montaigne, la persona no puede ser muncho diferente de lo ke es naturalmente; si akseptamos muestras limitasiones sin sanyo, puederemos rekonoser muestra dinyitad de ser un krio umano, i tomar plazer de la vida.
El septisizmo es un otro aspekto de su filozofia. El sulinya la valor arbitraria i relativa de las kreensias, de las leyes i  de los kustumbres. Montaigne es selebro por la fraza  “Que sais-je?” ke eksprima la inkapachidad de la pensada umana de djuzgar de una manera djusta i de konoser la verdad absoluta. 
Aparte la influensa de su konsepsion sovre ka realitividad de las kreensyas, sus esforsos de konoserse, para mijor konoser la natura umana, reprezentan los primeros pasos verso la introspeksion de la vida psishika, ke se desvelopara en la Evropa en los siglos vinideros.
"Formar muestro karaktero es muestro dever, i no kompozar livros, i venser, no batalios i no provinsios, ma orden i trankilidad en muestro kondukto." Montaigne es kontra el dogmatismo relijioso, kontra la intolerensia verso las kreensias i de sus opresion. En kondanando la vanitad de las gerras i de las persekusiones, la ideolojia de Montaigne se konfronta kon la ideolojia de la Eglisia katolika de su tiempo.
La Renesensya es en mismo tiempo karakterizada por una revolta kontra el absolutismo del Katolisismo. Este absolutizmo es impreniado por las atrosidades de la Inkizision. Protestantes ke so opozan ala supremasia del Katolisismo, son i eyos persekutidos i masakrados. El anio 1572, kuando inisia su ovra, esbrocha el masakro San Bartolomeo. Miles de protestantes son salvajamente matados. Sovre esto Montaigne se eksprime: "No egziste ostilidad ke depasa la ostilidad Kristiana".
Montaigne konseiva el Dio entanto ke un Dio djusto, ma distante. La relijion i la vida de kada diya deven de ser doz kozas distenktas, i separadas. Aunke era katoliko, Montaigne fue grasias a su moderasion el konsejero de Henri IV, el lider de los protestantes. De mismo es nominado mas tadre governor de Bordeaux, porke se nesesitava a este posto un katoliko respektado por los protestantes, ke estavan menasando la sivdad.

Su Atitudo verso los Djudios

Montaigne en sus eskritas se eksprime de una manera favorable o neutrala verso los djudios. Kualifia de atrosidad las persekusiones de la Iglesia katolika en Portugal, de ande mas, por ser kometidas al nombre de la Fey. En uno de sus ensayos(*)  se remarka este pasajo:
"…A ser ke los Reyes de Kastilia avian arondjado de sus tierras, alos Djudios, el Rey Juan de Portugal, les vendio por ocho kruzeros un refujo por un sierto de tiempo; kon la kondision ke kuando viendra el tiempo eyos devren de kitarlo, i les prometio de darles naves para yevarlos ala Afrika. Kuando el diya fiksado arivo, les izo saver ke los ke no obeisaran seran esklavos; las naves  fueron de las mas pekenias; i los ke se embarkaron fueron tratados de una manera muy mala i kruela por los marineros, ke, aparte de otros aktos de indinyitad, los azieron navigar adelantre i  atras  fin a  ke konsumaron todas sus komanias, i fueron obligados de merkarlas de eyos kon un presio tan karo i durante  tan muncho de tiempo ke estos se kedaron solo kon sus kamizas. Una ves ke la novedad de esta inumanidad fue reportada alos ke avian kedado en el payis, la mas grande parte de eyos se rezolvieron al esklavaje; otros se izieron komo ke avian  trokado de relijion. Imanuel, el suksesario de Juan, kuando fue kuronado, en primero los libero, ma despues troko su  idea i les ordeno de kitar el payis, en asiniando tres portos para sus pasaje. Kon esto, espero… (mismo) ke la  favor de la libertad avia faltado de konvertirlos al Kristianismo, la difikultad de kometersen al rovo de los marineros, de abandonar un payis, alakuala se avian uzado, kon grandes rikezas, para ekspozarsen en rejiones non konosidas i  estranjeras, los iva azer tornar atras. Portanto, en viendose desevado de su esperensa, i ke todos eran desidados para viajar, serro a doz de estos portos prometidos, para ke la largor i la inkomotidad del trajekto reduise a siertos de eyos; o para ke tenga la oportunidad, en amonselando a todos en un lugar, de egzekutir kon grande komotidad la egzekusion de loke les avia destinado: lo ke era  de ordenar de arankar a todas las kreaturas, manko de la edad de katorze anios, de transportarlas leshos de sus vista i de konvertirlas, a un lugar ande estas seran edukados asigun la  relijion muestra. … esto produizo un spektaklo orible: la afeksion naturala entre los padres i sus kreaturas, i de mas, la fervor a sus kreyensas viejas, luchando kontra este dekreto violente. Padres i madres se dieron la muerte, i dando un egzemplo fuerte mas, en echando sus kreaturas a los pozos, para evitar esta ley…"
El enseyo kontinua en referandose alos djudios de Portugal ke se konvertieron al Kristianismo:
"Kon tiempo kuando el limito de tiempo ke les fue akordado ekspiro, estos se rendieron en esklavaje. Siertos de eyos se izieron kristianos; de la fey de estos, o de sus prosperitad, ainda en muestos diyas, sien anios despues, muy poko de Portugezos se pueden asigurarsen; mismo ke el kustumbre i la largor del tiempo son los konsejeros los mas efikasos por este modo de trokamientos, ke todo modo de obligasion…"
En su "Diario de Viaje" (Journal de Voyage), ke es su ultima ovra,  Montaigne se refera munchas vezes alos djudios de la Italia, esta vez de una manera neutrala i detashada. El fakto ke vijita alas sinagogas, ke estuvo prezenta en siertas de sus seremonioas relijiozas i ke konverso kon munchos de eyos atira muestra atansion. Un diya de Februar 1581, es testigo de un karnaval burlesko en Roma, ande djudios, ijikos, viejos medio dezmudos i infirmos son rempushados kon aznos, kavayos i palos de una manera umiliante para ke korren en la kaye, yamada El Corso a esta okazion. Los ke arivan los primeros ala fin de esta korida resivan una rekompensa de pedasos de ropa. Este evenemiento es reportado de una manera muy breve, en presizando ke no se toma dingun plazer en viendolo.(**)

Un Atadijo Non Reklamado

El fakto ke miembros de su familia avian preferado el Protestanismo al Katolisismo, es probablamente un kompromiso kontra la koersion relijioza. Las konsiderasiones de Montaigne sovre la Inkizision en Portugal, revelan su piedad, i mismo una sierta empatia verso los persekutidos. Portanto, asigun ke fue remarkado mas ariva, aparte de su padre, Montaigne no relata en su ovra, a dingun miembro de su familia. Las razones de este silensio fueron el objeto de siertos komentarios. Una ipoteza pretende ke no es siguro ke Montaigne supo bastante sovre su asendensia maternala i se intereso sovre esto. En konsiderando la kuriozidad intelektuala ke karakterizo a Montaigne, esto no parese probable. Asigun una segunda ipoteza mas repandida, esto es la prova ke Montaigne era profundamente preokupado kon su identidad djudia, i se empidio de eksprimirse sovre esto achakes de la aversion avierta ke egzistia en akeos tiempos kontra los djudios i los konversos.
Probablamente, konversos en el enturaje de Montaigne, kontinuaron a konservar elementos del Djudaismo, i Montaigne lo avia konstatado. Munchas de sus ideas son kompatibles kon la vida spirituala i intima de los konversos(***). Todo en konsiderando ke un sentimiento de apartenensia al Djudaismo se avia developado en Montaigne, no es posible de determinar su signifikansa egzakta, i la manera ke pudo influensar la orientasion de su pensada.                               
---------------------------------------------------------------------------------------------------

(*) "Que le goust des biens et des maux despend en bonne partie de l'opinion que nous en avons", Livre I, Ch. XL.
(**)  Zinguer, Ilana, "Montaigne et le carnaval de Rome", Les Cahiers du Judaïsme, 11, (Paris: 2001-2002), 4 -10.
(***) Jama, Sophie, l'Histoire Juive de Montaigne, Flammarion, Paris, 2001. Esta ovra trata de diversos aspektos de Montaigne ke pueden ser referados a sus atadijos kon el Djudaismo.

                                                                                                                                                                            
 


+ Añadir nuevo comentario
Traducciones enviadas por usted
Loading Cargando ...
+ Enviar Comentarios
+ Enviar contenidos sugeridos

לאדינו         Ladino


Artikolos de Matilda Koen Serano
      
Artikolos de Yehuda Hatsvi
    
Artikolos de Gad Nassi
  
Artikolos de Eliezer Papo
   
Sefaradi Taor

ladino
Fecha y hora