ladino  

 
Judeo espanyol
Contador:

Inicio >> ARTIKOLOS >> Yehuda Hatsvi >> La fiesta de las frutas
 

La fiesta de las frutas
Yehuda Hatsvi


"Tu biShvat" es uno de los nombres de esta fiesta ermoza i savroza ke la selebramos en el kinze del mez de Shevat, kuando "la luna en kinze".
Esta data se fikso, en la epoka del Talmud, despues de aver una diskusyon entre bet Shamai i bet Hilel.
Estos dizen ke Rosh Hashana Lailanot (Rosh Hashana de los arvoles) tiene de ser en Rosh Hodesh Shevat, i Bet Hilel disheron: No. En el kinze del mez.

En jeneral, Rosh Hodesh komo ya lo savemos de lo ke eskrive en la Tora,
fue un dia de fiesta:
"…I en el dia de vuestra alegria, i en vuestros plazos, i en los prinsipios de vuestros mezes, tanyeresh kon las trompetas..."

I ya mos akodramos en lo ke eskrive en la biblia, en el Livro de Shemuel, por el rey Shaul ke aziya seuda (pranso) kon muchos konvidados en kada Rosh Hodesh.

Es posivle ke en dias antiguos, i en dias del  Bet- Hamikdash el primero, kada Rosh Hodesh era tambien un "Rosh Hashana chiko".
Muestros hahamim, despues del Horban se akodravan
solo de kuatro Rosh Hodesh ke eran Rosh Hashana.
Uno de eyos es el Rosh aShana de los Arvoles.

Es kuryozo, ke un dia sakro komo Rosh Hodesh, se troko
segun el "kapricho" de Bet Hilel, i el "Rosh Hashana Lailanot"
paso a ser en el kinze del mez.
La razon fue nada mas ke ekonomika: Bet Hilel reprezentavan a la agrikultores del Galil i de las montanyas de Erets-Yisrael, ke en el primo de Shevat ayinda aze ayi muy frio, i no konvyene de kontarlo komo anyada mueva. Tambien de muestros padres Sefaradim, bivyendo en el Imperio Otomano, mos akodramos ke diziyan "SHEVATe, ke la barva BATE".

Aun kon todo, no ay mucho de kontar sovre "Tu biShvat" asta el siglo 16, ke en akeyos tiempos, los kabalistas de Safed (el AR"I i su kompanyeros), kon el dezeo ke teniyan por la Geula, elevaron a este dia, i lo alevantaron al eskalon de fiesta, i ordenaron ke se koman en la fiesta frutas de la tierra santa, i también dizir kantes i alavasiones liturjikos sovre las frutas.  Esta kostumbre ke empeso enprimero entre los Sefaradim, se espandyo despues en todas partes del puevlo Judio en la diaspora, i se izo HAG en derechura.

El "seder" de Tu-biSHvat  toma mucho lugar en el libro "Hemdat Yamim" ke fue eskrito por mano de Natan de Gaza, el kual era el profeta de Shabetay Sevi, el Mashiah falso.

En el livro de "Hemdat Yamim",  la seremonia de "Tu-biShvat" era komo el seder de Pesah:  Se adjuntavan al derredor de meza endorada de flores i kandelas ensendidas, i komiyan las frutas, i meldavan parágrafos del TANAH, del Talmud i del Zohar.
Uno de los arreskovdados diziya Beraha sovre alguna otra fruta, los otros prezentes diziyan amen, i toda esta seremoniya estava akompanyada en bevyendo kuatro vazos de vino blanko i korelado, i mesklado, ets. ets.

Esta parte del livro  חמדת ימים fue despues imprimida en el livro פרי עץ הגן  ("Pri Ets aGan"), ke salyo a luz en Amsterdam en 1859), i ayi el redaktor, savyendo ke en realidad esta kostumbre tyene raizes de los donmes, eskrivyo:
"Kerido lektor, si toparas en el livro alguna "koza" ke no es ermoza, arrondja la kashka i kome la fruta de adyentro."

Todos konosemos la shakaika de "Bore peri….Ya me lo komi". Esto es porke no todos savemos el ritual de las bendisiones sovre varyas frutas o komidas.
Ma, en kaza de mi padre, komo en muchas kazas de los sefaradim, insistiyan ke kada uno de mozotros sepa ke tala fruta es "bore pri a-ets", i la otra es "bore pri a-adama", ets. Halis una lisyon de botanika en  "la fiesta de las frutas" (ke ansi se yamava la fiesta antes ke la konosimos en Erets Yisrael komo  "Tu biShvat).

Despues de la gerra mondiala primera, el nombre Tu biShvat ya fue konosido en la diaspora sefaradi. Parese, a traves de los SHLIHIM ke vinyeron de Palestina.

En ladino se kompozaron para Tu biShvat unas kuantas koplas  (o komplas), ma ke pekado ke ya no mos akodramos de la melodia de estas komplas.

En esta noche de las frutas se perkurava mucho de merkar, si solo aviya en el merkado, alguna fruta mueva, "trifanda" para dezir la bendision de "Sheehiyanu".   La dicha sefaradí dize ke "un Sheehiyanu vale mil dukados".

En el sentro de la meza de Tu biShvat bien kave el ASHURE.
La lejenda, mos konta ke el ashure fue enventado por Noah, ke en salyendo de la arka (de la Teva) despues del deluvio tomo de todas frutas i komanya ke le sovro, i izo todo un karishik, una meskla, ke se yama en turko Ashure

Otra una komida dulse ke se uza en Tu Bishvat es el "Trigito". Trigo buido i gizado asta ke se ablanda, kon asukar o miel, i kanela.

En dia de Tu biShvat se uzava una kostumbre de echar trigo o migitas de pan al kortijo por los pasharos ke koman.
La raiz de este uzo es una lejenda ke ay en el Talmud:

Kuando muestros padres en el dezyerto resivyeron el MAN, (ke lo yamamos en muestra lingua MANNA, o MAGNA), en dia de vyernes arrekojeron el puevlo dos tantos de MAGNA, i Moshe Rabenu los enkomendo al puevlo ke en Shabat, el dia de olgansa i repozo no van a topar la MAGNA en el kampo.

Ma ke izyeron los adversarios Korah, Datan i Aviram?
Eyos kijeron mostrar ke Moshe no avla la verdad. 
Salyeron en dia de Shabat, muy tempraniko de la manyana, i empesaron
a desparzir MAGNA en el kampo.

En mientres vinyeron un bulluk de pasharikos i komyeron todo el MAN ke estava en el kampo.  Kuando salyeron los ijos de Yisrael a bushkar la magna en el kampo, no toparon nada, komo ansi les avia dicho Moshe.

Por Zehut de este servisyo de los pasharos, les damos trigo para ke gozen i eyos en la fiesta de la frutas.

Syerto ke las fiestas Judias tienen atadijo a la relijion, ma también son una pauza de afalago i deskanso para el kuerpo i la alma. No menos importante en las fiestas es la manifestasion de konkordia entre los ijos de Yisrael en todo el mundo, komo también la unidad de los miembros de famiya al derredor de la meza festiva.

Kreo ke es konveniente  de sostener muestras kostumbres i muestra tradision.

Makare ke esta Fiesta de las frutas i de los arvoles aga kreser mas i mas alegrias, a nos i a todo Yisrael.

+ Añadir nuevo comentario
Traducciones enviadas por usted
Loading Cargando ...
+ Enviar Comentarios
+ Enviar contenidos sugeridos

לאדינו         Ladino


Artikolos de Matilda Koen Serano
      
Artikolos de Yehuda Hatsvi
    
Artikolos de Gad Nassi
  
Artikolos de Eliezer Papo
   
Sefaradi Taor

ladino
Fecha y hora