ladino  

 
Judeo espanyol
Contador:

Inicio >> Kuentos del "Meam Loez" >> La muchacha del pozo
 

La muchacha del pozo
(Kuento de Hullí)

“Una muchacha se kayó en un pozo kuando kería ir en kaza de su padre.
Se aparó un mansevo en la boka de pozo, diziendo: “Si me aprometes de kazarte kon mí, aré modo a sakarte”.
Disho eya: “Muy bueno”.
I la sakó del pozo, i djuraron los dos ke él no tome otra mujer ni eya se kaze kon otro. I disheron: “Aunke no tenemos edim (testigos) , ma este pozo i esta nifisa ke va kaminando sean muestros edim”.
I se fue kada uno a su kamino. Eya mantuvo a su shevuá (djura) , ma él se fue a otra sivdad i se kazó kon otra, i el primer ijo behor (primodjénito)  ke le nasió lo modrió una nifisa i lo mató. El segundo ijo, siendo grandeziko, se kayó dientro del pozo i se murió. Se keshó la mujer kon él, diziendo: “Ke es la razón ke nos mueren los ijos mitá meshuná (muerte demudada) ? Sierto ke algún pekado mo lo kavza”.
Entonses se akordó dito kuento i le kontó a su mujer todo lo pasado. Eya le disho: “Siendo tienes shevuá de tomarla, devías de afirmarlo, i no me konviene tenervos por marido”.
I tanto izo, asta ke le dio su get (divorsio) , i se fue a la sivdad de dita muchacha i se kazó kon eya”.

Matilda Koén-Sarano

                                                                                                                                                                            
 


+ Añadir nuevo comentario
Traducciones enviadas por usted
Loading Cargando ...
+ Enviar Comentarios
+ Enviar contenidos sugeridos

לאדינו         Ladino


Artikolos de Matilda Koen Serano
      
Artikolos de Yehuda Hatsvi
    
Artikolos de Gad Nassi
  
Artikolos de Eliezer Papo
   
Sefaradi Taor

ladino
Fecha y hora