ladino  

 
Judeo espanyol
Contador:

Inicio >> Kuentos i konsejas >> La prova de Avraam Avinu en Turkía
 

La prova de Avraam Avinu en Turkía?
 

Durante mi estada en Ankara en okazión del Kongreso sovre Nasr-a-din Hodja, organizado por la UNESCO en el 1996, enkontrí al Doktor Dursún Ayán, ke me kontó la sigiente lejenda, komo la oyó de su nono i de su papá en turko, naturalmente. A mí me la kontó en inglés.
Kuando el rey Nimrod vino a saver ke Avraam kreía en el Dio úniko, i avía rompido los ídolos de su padre, desidió de azerlo kemar en un fuego.
Nimrod izo aprontar un fuego spesial, echo de dos arimas de pedasos de lenya de la dos partes, kon en medio el lugar ande ivan a ensender el fuego i echar adientro a Avraam, katapultándolo de afuera, para ke dinguno no pudiera aserkarse i kitarlo.
Ma para poderlo katapultar en el fuego de afuera, de leshos, se tenía demenester de un sortilejio diabóliko, provokado por un insesto entre un ermano i una ermana.
Nimrod izo azer esto por los zínganos, ke son los únikos ke akseptan de azer este modo de koza. I ansí reushó a azer katapultar a Avraam adientro del fuego de leshos, i ya estava siguro ke se iva kemar.
Apenas Avraam arivó adientro del fuego, el lugar se trokó en un kampo vedre, i los pedasos de lenya se izieron pishkados. De vista el kampo se trokó en un chiko lago, i Avraam salió de ayá sano i salvo.
El lugar, ke se topa en la rejión de la sivdad turka de Urfa, se yama oy "Halil Rahman Gölür", ke es uno de los nombres de Avraam Avinu en turko.
En este lugar ay una mishkita, i la djente va asta oy a ziarar.
Esta estoria es bien konosida en Turkía por todos, sigún el Doktor Ayán, i tiene koinsidensia kon lo ke mos konta el Midrásh sovre este epizodio de la vida de Avraam Avinu.

Kontado por MATILDA KOEN-SARANO

paz3@zahav.net.il

 

 

 

 


+ Añadir nuevo comentario
Traducciones enviadas por usted
Loading Cargando ...
+ Enviar Comentarios
+ Enviar contenidos sugeridos

לאדינו         Ladino


Artikolos de Matilda Koen Serano
      
Artikolos de Yehuda Hatsvi
    
Artikolos de Gad Nassi
  
Artikolos de Eliezer Papo
   
Sefaradi Taor

ladino
Fecha y hora
 

La Asosiasion Arkadash | Ladino | לאדינו | judeo espanyol |

אתר זה הוקם ע"י זום ייעוץ ומערכות מידע