ladino  

 
Judeo espanyol
Contador:

Inicio >> Kantadores en Ladino >> K-L >> Lika Eshkenazi
 

Lika Eshkenazi
(Bulgaría, Sofia)

Lika Eshkenazi es lisensiada por la Akademia de Múzika en Sofia en performansia vokal de múzika pop. El empesijo de su aktivitá es atada a los mas sovresalientes interpretes de akeyos días. Esto la formó a una ulterior vía de dezvelopamiento profesional. Por munchos anyos partisipó en los mas prestijiozos espektaklo en Bulgaría i al estranjero.  Su aktivitá de konserto es kolegada kon nombres, ke krearon modeles en la múzika de Bulgaría. Al estranjero eya prezenta la eskola de la múzika pop de Bulgaría. Durante el último anyo Lika Eshkenazi se dedikó a los kantes djudiós i se izo popular entre el públiko djudió i no-djudió. En esta manera eya tiene una ancha audiensia, dada por la múzika kontemporanea, kon el mantenimiento de la autentisidad de la melodía i del teksto. Komo reprezentante del programa "Middle-age generation" (la Jerenasión de la Edad Media) en OJB "Shalom", eya es un de los promotores de las tadradas artístikas en el klub "Hamsa" – el úniko lugar en Bulgaría, ande  se pueden sintir kantes djudiós, interpretados por Lika Eshkenazi.
El klub viene vijitado por munchos uespedes  bulgaros i estranjeros.
Lika Eshkenazi tiene munchos konsertos en Ungaría, Italia, Serbia, Gresia, Israel i Bugaría, i partisipó a munchos festivales en Bulgaría i al estranjero, i entre eyos, komo solista kon diferentes formasiones a todos los festivales de los djudiós de los Balkanes "Esperansa".  Eya publikó dos CDs de kantigas en ladino: "Yo me enamori d`un aire" i "Skalerika de oro", i partisipó a  munchas tranzmisiones radiofónikas en Bulgaría i en otros paízes, inkluzo Israel, i a varios espektaklos de televisión nasional bulgara. Dos filmos sovre Lika vienen tranzmetidos por la Televizión Nasional de Bulgaría: "Lika" i "Lika and Dulce canto". Además eya fue envitada por el prestijiozo programa de televizión "The show of Slavi".
En el Avril del 2004 Lika formó un komplekso vokal, yamado "Dulce Canto". Los interpretes tienen edades diferentes i profesiones, ma están unidos en la esperansa de topar i popularizar los kantes de sus antepasados. El repertorio es variado en estil i ritmo i se adapta a la tendensia muzikal moderna. El grupo partisipó 5 festivales i mas de 150 konsertos en Bulgaría i al estranjero delantre de públikos djudiós i no-djudiós. Alguno de eyos fue organizado por el Consilio de los Ministros, en la Munisipalidad de Sofia, Ministerio de la Kultura, en kolaborasión kon la Universitá de Lecce en el Sud Italia. 
En el 2008 eya resivió el rekonosimiento "Silver Rhyton" del Ministerio de la Kultura  i un sertifikado por aver alkansado un grande sukseso kreativo i una grande kontribusión en el dezvelopamiento de la kultura bulgara.
Salieron 3 CDs kon Lika Eshkenazi i el "Dulce Canto": "Rezonansia", "La Bohemiana" i "Shalom Aleyhem". Los primeros dos enkluyen kantes tradisionales i kantigas en estil-folk. El treser fue echo en onor del aniversario de los 100 anyos de la inaugurasión de la Sinagoga de Sofia i kontiene orasiones i kantes de sujeto relijiozo.
Esto fue echo por la primera vez en Bulgaría i tiene una grade emportansia, sea  para el dezvelopamieto relijiozo i kultural de la komunitá djudía en Bulgaría, i sea para el enrekesimiento kultural jeneral.

Matilda Koén-Sarano

                                                                                                                                                                            
 


+ Añadir nuevo comentario
Traducciones enviadas por usted
Loading Cargando ...
+ Enviar Comentarios
+ Enviar contenidos sugeridos

לאדינו         Ladino


Artikolos de Matilda Koen Serano
      
Artikolos de Yehuda Hatsvi
    
Artikolos de Gad Nassi
  
Artikolos de Eliezer Papo
   
Sefaradi Taor

ladino
Fecha y hora
 

La Asosiasion Arkadash | Ladino | לאדינו | judeo espanyol |

אתר זה הוקם ע"י זום ייעוץ ומערכות מידע