ladino  

 
Judeo espanyol
Contador:

Inicio >> Hagim y Moadim >> Purim >> Los platikos de Purim
 
Los platikos de Purim
Matilda Koén-Sarano – Purim 2012

 
Para mí el rekordo de la fiesta de Purim está atado al uzo de los platikos ke se mandan  de los unos a los otros. Kuando yo era kriatura, mi mamá uzava mandar platikos ke eya inchía de todo lo bueno ke azía kon sus manos.  En los platikos de mi mamá no avían karamelas i chikolatas i kozas semejantes.  Avían kozas de orno dulses i saladas, todas echas en kaza. I todo se azía kon kura i de todo korasón.
Komo akel tiempo bivíamos en Milano, ande las distansias entre las famiyas djudías eran grandes, mi mamá no aprontava munchos platikos. Ma todos los ke mandava  venían resividos siempre kon sorpreza i plazer.
Kualo metía mi mamá en el platiko? Sigún la tradisión ke avía trayido kon eya de Izmir en Turkía metía las reshikas de todas las formas de regla para Purim: primera de todas la skalera, para azer suvir a Amán al palo;  después la tijera, los antojos i las letras inisiales de los nombres de todos los miembros de la famiya. Avían después los tajikos de masapán o los maruchinos.  No mankavan dos o tres travados o algunos kurabiés de tahina, i un pedaso de shamlía – kurdelas de masa frita – ke reprezentavan las orejas de Amán.
Para kompletar el platiko eya aprontava una "palomba", echa de un sestiko de masa de reshikas ande metía un guevo haminado. Le metía el biko i las alas de masa i la kozía al orno komo las reshikas. En Yerushaláyim (i no sólo en Yerushaláyim)  la "palomba" se yama "folar",
El platiko devía ser dado en su tiempo, por dos razones, ke mos vienen akodradas en el reflán. Komo de fakto se dize "Ande van platikos, aboltan chanakitas", koza  ke aze aluzión al fakto ke ken resive el platiko yeno deve dar atrás una chanakita yena. Se dize también "Después de Purim platikos", ke amonesta kon ironía a azer las kozas en sus tiempo, porké pasado el tiempo las kozas piedren sus valor i sus sinyifikasión.

+ Añadir nuevo comentario
Traducciones enviadas por usted
Loading Cargando ...
+ Enviar Comentarios
+ Enviar contenidos sugeridos

לאדינו         Ladino


Artikolos de Matilda Koen Serano
      
Artikolos de Yehuda Hatsvi
    
Artikolos de Gad Nassi
  
Artikolos de Eliezer Papo
   
Sefaradi Taor

ladino
Fecha y hora