ladino  

 
Judeo espanyol
Contador:

Inicio >> Kantadores en Ladino >> M >> Mor Karbasi
 

 
Mor Karbasi
(Yerushaláyim)

Mor Karbasi es una kantadera i kompozitora, ke  nasió en Yerushaláyim 22 anyos antes, salió del grupo militar del "Komando del Sud", i agora mora en Londra. La erensia de Mor es miksta. Su madre es orijinaria de Maroko i su padre de Persia, i sigún su nono marokano "la sangre se akodra", kere dizir ke eya tiene la enfluensa de  sus antepasados provenientes de Espanya, i su koneksión kon esta kultura viene ekspresada kon ardor atraverso su múzika. Mor Karbasi arrekoje i kanta munchos kantes en ladino, komo kantes del folklor evropeo i latino amerikano. Eya interpreta además múzika de Andaluzía en ebreo kon melodías árabas. Eya kanta en ladino, espanyol, ebreo, i raramente en inglés. Kanta imnos litúrjikos, ke sintió en la kaza de su madre, i ke es un tipo de orasión kantada tradisionalmente sólo por ombres. Mor da a múzika antika una mueva vida i la yeva a un ancho públiko. Parte de su kanto tiene la savor del flamenko.  Además de los kantes tradisionales ke  Mor  kanta kon su boz "remarkable, ke  tiene delikateza i potensia", sigún el jurnal inglés el "Guadian" del 25 de Avril del 2008, eya kompoza múzika sovre palavras de su madre Shoshana Karbasi, traduizidas al ladino por Margalit Matitiahu i Matilda Koén –Sarano. Mor aparesió en numerozos konsertos: mas de un tur en Evropa i Estados Unidos, inkluzo dos performansias en el Trafalgar Square de Londra (en el 2006 i 2007),  i otras performansias en el "Womad Festival 2007, Charlton Park", en Las Palmas – Canary Island, en Celtic Connections en 2009), i en Israel. Aparesió en programas de Radio i Televizión, i entre eyos en la TV franseza i la BBC. Su CD "The Beauty and the Sea" fue produizido en kolaborasión kon el gitarrista JoeTaylor, ke ay tres anyos ke la akompanya. Antes de esto eya publikó un CD produizido personalmente, entitolado "Broken Wings", i un 4 track  EP, yamado "Rosa". Su primer album "The Beauty and the Sea" fue resensido por el "Guardian",  ke eskrivió ke Mor es "una de las grande djóvenes divas de la shena de la múzika global". Su kantiga "Kon ojos riyentes"  suvió en el 2006 a la final del Festiladino, ke tuvo lugar en Rishón Letzión durante los festejamientos del vino, i fue prezentada por eya mizma.

Matilda Koén-Sarano

                                                                                                                                                                            
 


+ Añadir nuevo comentario
Traducciones enviadas por usted
Loading Cargando ...
+ Enviar Comentarios
+ Enviar contenidos sugeridos

לאדינו         Ladino


Artikolos de Matilda Koen Serano
      
Artikolos de Yehuda Hatsvi
    
Artikolos de Gad Nassi
  
Artikolos de Eliezer Papo
   
Sefaradi Taor

ladino
Fecha y hora
 

La Asosiasion Arkadash | Ladino | לאדינו | judeo espanyol |

אתר זה הוקם ע"י זום ייעוץ ומערכות מידע