ladino  

 
Judeo espanyol
Contador:

Inicio >> ARTIKOLOS >> Yehuda Hatsvi >> RAMBAM admirado por el puevlo
 

RAMBAM admirado por el puevlo
Yehuda Hatsvi



Me parese ke todo ya fue eskrito sovre RAMBAM.
Kon todo, kijiera adjustar koza o dos sovre la admirasion ke siente el puevlo judyo, durante muchas jenerasiones, verso este grande savio judyo sefaradi.

Yo, por dezir la verdad, no esto totalmente de akuerdo kon el titolo "sefaradi"
en relasion al RAMBAM. Verdad, en efekto, Rabenu Moshe ben Maimon nasio en Cordova, Espanya (en 1138), i bivyo ayi kon su famiya asta 1148.
En akel anyo inadieron los Muahidun desde Nort-Africa a Espanya, i - entre otras maldades- los judyos fueron persekutidos. Muchos judyos fueyron a norte del pais, a las areas dominadas por los kristianos. Otros, komo la famiya del Rambam, fuyeron a la direksion del sud. Eyos bivieron un sierto tiempo en Maroko, despues, por un kurto periodo, en Erets Yisrael, asta ke se instalaron en Fustas (Cairo la antigua) en Ejipto.
Dunke,  en mi definision personal, el gran savio RAMBAM es
"Sefaradi-Mizrahi/oriental.

Ma, komo bien lo savemos, mismo las autoridades espanyolas adoptaron kon orgolyo al RAMBAM, orijinario de Espania. Desde 1964 la statua de este savio esta situada en Cordova, en el kuartier antiguo "La Juderia".

La dicha mas konosida, onorando a muestro haham, es una parafrasis al pasuk (en Devarim 34, 10) ke dize: "De Moshe (Rabenu) asta Moshe (Rambam), nunka mas se levanto komo Moshe".

[ Apropo, es interesante, ke despues de muchas jenerasiones, un semejante pasuk fue dicho sovre el filozofo judyo Moshe Mendelson (1729-1786):
"De Moshe (Rabenu) asta Moshe (ben Maimon) asta Moshe (Mendelson), nunka mas se levanto komo Moshe" ].

Entre muestros hahamim se uza mucho yamarlo al RAMBAM kon el titolo de onor "aNesher aGadol" ("La Agila Grande").  Este grado es bazado sovre el pasuk (en Yehezkel el profeta 17, 2): "La agila grande, de grandes alas i de largos miembros, yena de plumas de diversas kolores".

De lo ke se save, fue el RAABAD el ke dekoro al RAMBAM kon este titolo de apresio. RAABAD, es konosido komo Rabi Avraam ben David de Posquires (1120-1198).

Es muy kuryozo, porke RAABAD fue uno de los savios en akea epoka ke ekspresavan objeksiones a varyas ideas filozofikas de Rabi Moshe ben- Maimon; ma al mismo tiempo rekonosian su grandor. Este fato (de antagonistas estar a favor del oponente), lo veo yo komo un sinyo onorario ke lo meresen todos estos savios judyos tambien.

La lejenda mos konta ke Ribi Maimon (el padre de Rambam) estava muy embolvido en sus estudios i no pensava de kazarse, ma mas de una vez se le aparesio en el suenyo una persona onorada (o kisas un andjel) ke le diziya: "Kale ke te kazes kon la ija del karnesero/kasap en la sivdad fulana".
Entonses, Rabi Maimon bushko a este karnesero deskonosido i se kazo kon su iza. Eya kedo prenyada, i paryo a Moshe, ma murio en el parto.

Es muy kuryozo ke muchas de las lejendas sovre Rambam mos kontan sovre milagros i fuersas mas arriva de la natura, mientras ke Rambam el mismo era una persona rasionalista, ke luchava toda su vida kontra los ichizos, las superstisiones i la astrlojia.
Ma, todas estas lejendas djustamente ekspresan la amplia admirasion del puevlo sovre el gran savio.

Es bien previsto ke sovre la muerte i el enterro de Ramabm kresio i una lejenda enteresante:                                                                              Rambam, komo lo savemos, murio en Cairo (en Ejipto). Antes de su muerte ya ordeno el Rambam de enterrarlo en Erets Yisrael, ma no desho de enkomendado en kual presizo lugar. Desbrocharon entonses pletos entre las varyas komunidades judias del paiz, ke kada una de eyas dezeava el onor de tener a los guesos de Rambam deskansar en su territorio.
La solusion ke se topo fue de enkargar el ataud/serkolio del Rambam sovre un gameo, i desharlo al gameo libre a ir ande le da el aire.  Despues de tres dias de vagabondaje, arrivo el gameo a la sivdad de Tevaria i se arrodiyo para repozar ayi.

Asta oy, la fuesa de Rambam en Tevaria es un sitio popular de pelegrinaje.


Mijor de todas las lejendas me plaze esta la ke vos do agora.
Aki se reflekta la saviduria de este mediko renomado en la alma umana.                                  

Mos kontan ke uno de los vezires del sultan Saladin era una persona muy kruela ke azia grandes malores a los Judyos. Rambam era defendedor bueno de los judyos, ma aun kon todo no pudo azer mucho kontra akea mala persona ke se yamava Nagib-Bey. En fin, topo Rambam un kamino para azerlo temblar un poko:
Kada maniana, se enkontravan a la puerta del sultan, i Rambam le diziya a Nagib-Bey: "Ke tienes Nagib Bey? Te veo muy palido!" u "Si te duele koza, no lo deshes sin kuidar. En neglijando, puede afitar koza ayinda mas grave!".

No pasaron muchos dias, i na ke este Nagib Bey vino korriendo a la klinika de Rambam el mediko. De tanto oyir las remarkas de Rambam, le aferro un espanto, i de verdad se konsentio yeno de hazinuras i dolores.

Rambam le aprometio de kurarlo, kon la kondision ke no aga mas mal a los judyos. Ansi fue. En beviendo, durante dos semanas largas, las drogas amargas de Rambam, akel Nagib Bey se sentio mijor, a poko a poko,
asta ke "se sano" enteramente.

Esta lejenda es para mi (i para ti, i para ti, tambien!) komo un konsejo autentiko de parte de Rambam: ke kuando te enkontraras kon kualkier persona, dile un buen "Shalom" i "Buenos dias" kon sonriza en tu kara.
En realidad, este ermozo djesto no te kosta nada a azerlo, ma la sonriza aze plazer a la persona de enfrente.                    
Muchas vezes -komo si era una refleksion de un espejo- resiviras i tu una sonriza i kara alegre.    Vale la pena de provarlo.

Dias buenos ke tengash !

 

+ Añadir nuevo comentario
Traducciones enviadas por usted
Loading Cargando ...
+ Enviar Comentarios
+ Enviar contenidos sugeridos

לאדינו         Ladino


Artikolos de Matilda Koen Serano
      
Artikolos de Yehuda Hatsvi
    
Artikolos de Gad Nassi
  
Artikolos de Eliezer Papo
   
Sefaradi Taor

ladino
Fecha y hora
 

La Asosiasion Arkadash | Ladino | לאדינו | judeo espanyol |

אתר זה הוקם ע"י זום ייעוץ ומערכות מידע