ladino  

 
Judeo espanyol
Contador:

Inicio >> ARTIKOLOS >> Yehuda Hatsvi >> Rabi Hayim Palachi (1787 – 1868)
 

Rabi Hayim Palachi (1787 – 1868)
Yehuda Hatsvi


Oy en dia, todos mozotros semos muy diferentes de muestros nonos i nonas. La vida entera se troko desde el siglo pasado en una manera totalmente otra.

Aun kon todo, todos mozotros tenemos el interes i el dezeo de saver algo por la erensia kultural de muestros antepasados.
Entonses,  venid saltaremos a ver ke pasa en Izmir, a la kosta de la mar Egea, en el fin del siglo 17.

En esta epoka topamos en Izmir 16 sinagogas i midrashim, i en realidad, avia indemas komo una kompetision entre los rikos de Izmir, i muchos apartavan una oda en sus kazas para midrash o kehila. La atmosfera en los kuartieres ande moravan judyos era influensada por los rabinos de akea epoka; i al menos  publikamente no se atreviya ningun judyo de pasar sovre alguna de las mitsvot, porke los rabinos teniyan la autoridad de djuzgar a los delikuentes,  segun la Ley de la Tora.

La yeshiva mas grande era "Bet Yaakov Rabi",  mantenida por el filantropo riko de este nombre ("Rabi" es su alkunia).
A la vejes, desidio Yaakov Rabi a bivir en Yerushalayim, i desho la yeshiva en manos de su yerno, naturalmente kon un montante bueno de moneda.
El nombre de este yerno es Ribi Refael Yosef Hazan, ke eskrivio un livro importante de siete volumes, yamado "Hikre Lev".
En esta yeshiva, meldava, estudiava i enseniava tambien Rabi Yaakov Palachi djuntos kon su padre Hayim Palachi el primero (ke no savemos muchos detalyos sovre el).

Rabi Yaakov Palachi, aunke no teniya en akel tiempo ningun posto ofisial, era renomado komo savio en la Ley. Dunke, fue komo natural ke Rabi Refael Yosef Hazan, eskojo a Rabi Yaakov Palachi a ser su yerno, el mazal de su ija Kaden.  En el anyo 1787 les nasio al par Yaakov i Kaden sus ijo behor, Hayim, al nombre de su nono Hayim, ayinda en vida, al uzo de los sefaradim.

El ambiente ande se engrandesio Hayim, el ninio, fue un ambiente de santedad, sea entre la famiya, i despues en la yeshiva. Parese ke la alma de Hayim desde su chikez ya konsentiya ke su destino es de ser un rabino i un lider de la komunidad. Naturalmente ke en sus estudios era un elevo sovresaliente, i en su manseves, todos ya lo konosian komo un erudito i savio.

Su maestro prinsipal fue Rabi Yitzhak Gatenyo, el ke eskrivio el livro "Bet Yitzhak" sovre los eskritos del RAMBAM. Ma ayinda mas de su maestro ambezo Hayim de su nono maternal, Rabi Refael Yosef Hazan.

Hayim, a la edad de 20 anyos se kazo kon Esterula, la ija de Yitzhak Rabi (el sovrino de Yaakov Rabi, el filantropo riko ke apoyava a la yeshiva), i tuvyeron tres ijos i dos ijas.

A la edad de 25 anyos resivio Hayim el titolo de "Haham Kumplido" ke es komo una diploma diziendo ke termino sus estudios komo elevo. El titolo fue dado por mano de Rabi Hayim Algazi.
Naturalmente, ke en akel dia lo vistieron a Hayim Palachi kon el djuben ke los hahamim sefaradis uzavan a vistir.

Todo tiempo ke Yaakov Palachi, el padre de Hayim estava en vida, Hayim refuzava kualker posto ofisial ke le prepozavan. Es solo despues de la muerte de su padre (en 1827), es ke tomo sovre el el posto de dayan i shefe de la yeshiva de "Bet Yaakov".

Kuando entro al posto, se dediko totalmente a las tareas del publiko. El fikso reglas muevas en el komite de la komunidad para ke sea mas efikas, i perkuro kon todas sus fuersas ke se frague ospital Judio en Izmir.
En akel tiempo, Izmir kontava 220000 sivdadinos, i la komunidad Judia  - 16000 almas.

En el anyo 1849, Hayim Palachi fue nominado el shefe del bet-din, i estonses desidio de limitar sus echos publikos para dedikarse mas a sus estudios de la Ley, eskrivir sus livros i tambien responder, sin retardo, a todos los ke le eskriviyan kon preguntas i demandas de Alaha. 
El dotrino ke ay de tomar del sistem de Hayim Palachi es de nunka deshar alguna letra sin responderla, i a lo mas bueno es de responder en el mismo dia, para no tener gayletes para maniana o al otro dia. Vo lo rekomendo a todos vozotros, i kieshke yo tambien pudiera azerlo .

En 1855, el Rav Palachi fue nominado "Rav haKolel" ke es el posto mas alto en la komunidad judia, i un anyo despues resivio el firman del sultan ke lo nomina Haham Bashi de Turkiya.
Rabi Hayim Palachi resivio, en 1858, un Nishan del sultan Abdul Madjid, ke le da la autoridad de djuzgar judyos segun las leyes del governo i segun la relijion.

En este punto vos kiero kontar, keridos lektores, por una diskusion juridika ke se esperto aki en Israel sovre la kestion si ay de dar a Yigal Amir (el asasino de Rabin, el primer ministro, en 1995) la permision de kazarse i traer kriaturas al mundo. La mayoridad de los djuzgadores/djuezes estavan en kontra.
Aki es ke viene el djuez Yaakov Tirkel, i dyo su opinion, ke afilu asasino, i el kriminal mas grande ke sea, no termina ser benadam o judyo, i ayinda tiene el derecho de kazarse (si topa alguna ke lo kiere), i darle la posibilidad de tener ijos.

Lo kuriozo es, ke el djuez Tirkel bazo su opinion sovre un veredikto del Rav Palachi, ke avia deliberado a un kriminal judyo de la prizion solamente por ke su kabina en la prizion fue muy suzia, i dunke no le permetiya azer tefila en un lugar tan enkonado. Rabi Pelechi disho ayi ke este judyo ayinda tiene el derecho, komo kada judyo de azer sus orasiones en lugar ke sea limpyo.

Sin entrar agora de ninguna manera a polemika politika o juridika, lo ke kije dizir es ke afilu oy en dia, djuezes laikos (i non solo rabinos) topan referensia en los livros del Rav Palachi.

Apropo, el djuez Yaakov Tirkel es oy el shefe de un Komite de Enkuesta sovre los akontesimientos kon la flotila Mavi Marmara (en djunio 2010).

Kuando avli kon el djuez Tirkel, el me konto ke su famiya es de Austria, ma sus padres imigraron a Erets Yisrael en 1933, i el nasio aki, en Tel Aviv.
Kuando le demandi kualo sinyifika su nombre de alkunia "Tirkel", el me konto ke este nombre se eskriviya en Austria komo Turkel, i la letra "u" kon noktali de dos puntikos endriva. Ansi, ke  este nombre en aleman  i en yiddish  indika ke es venido de Turkiya.
Agora lo meti al sinyor Tirkel en shube si el orijin de su famiya es sefaradi...

En tornando a la vida de Rabi Hayim Palachi  ay de notar ke el eskrivio mas de 70 livros de Ley, Unos kuantos de eyos se imprimen muevamente asta oy,
lo ke demostra su importansia en el kampo de la alaha judia.

En el fuego grande de 1840 en Izmir, sufriyo i la kaza de Rabi Palachi un danyo grande, i muchos livros ke teniya ayi en eskrito se konsumieron en el fuego. Esto fue un desaztre. Lavor de muchos anyos se bolo kon el umo.

Si me demandash a mi, aki tambien topamos un motivo mas para  admirar a este personaje grande, ke supo superar esta piedrita, i kon su determinasion i veluntad, i grasias a su memoria enorme, fue kapache de eskrivir de muevo unos kuantos de sus livros, i indemas kontinuar sin dezesperarse enteramente,

En el mezmo anyo de 1840 akontesio el echo konosido komo "la Kolumnia de Damasco", i el Rav Palachi kon sus kontaktos diplomatikos i kon su koordinasion kon el gevir Moshe Montifiori se okupo mucho de ayudar a los judyos de esta sivdad.

Rabi Hayim Palachi mos desho la vida, i su gran erensia kulturala, en 1868.
 

+ Añadir nuevo comentario
Traducciones enviadas por usted
Loading Cargando ...
+ Enviar Comentarios
+ Enviar contenidos sugeridos

לאדינו         Ladino


Artikolos de Matilda Koen Serano
      
Artikolos de Yehuda Hatsvi
    
Artikolos de Gad Nassi
  
Artikolos de Eliezer Papo
   
Sefaradi Taor

ladino
Fecha y hora
 

La Asosiasion Arkadash | Ladino | לאדינו | judeo espanyol |

אתר זה הוקם ע"י זום ייעוץ ומערכות מידע