ladino  

 
Judeo espanyol
Contador:

Inicio >> Kantadores en Ladino >> S >> Sandra Bessis
 

Sandra Bessis
(Tunisía - París)

Sandra Bessis nasió en Tunisía, ande pasó una parte de su chikez. Eya bivió en varios otros paízes, antes de estableserse en París a la edad de 18 anyos. Sus estudios universitarios fueron konsentrados sovre la literatura, la gitarra klásika i el kanto.
Dezde los anyos '80 eya investigó sovre la múzika sefaradía, kreó varios ekspektaklos i partisipó a numerozos eventos kulturales i munchos festivales. Eya viene regolarmente envitada a apareser en toda la Fransia, komo al estranjero: en Espanya, Italia, Gresia, Marocco, Suisa, Almania, Croatzia, Estados Unidos i mas, i tiene un repertorio muy variado, deskojido por eya mizma.
Sandra Bessis es además envitada a partisipar a varios festivales de múzika sakra, ande interpreta lavoros relijiozos de las tradisiones medievales andaluzas de los djudiós, los muzulmanos i los kristianos. Eya tiene performansias muy aktivas en konsertos kon un grupo de muzisianos, la baza de los kualos kontiene tradisiones de la múzika medio-oriental de los djudiós a los muzulmanos, del sakro al sekular.
Su primer CD "D'une lointaine Espagne" (De una Espanya leshana) salió en el 1992 kon la etiketa de la ARB Music. En el Oktobre del 1994 eya i la pianista Monique Bouvet  krearon un espektaklo entitolado "Espanya!" bazado sovre kantes populares espanyoles, armonizados por Federico Garcia Lorca, i kantigas espanyolas de Maurice Ohana.
Después ke publikó su sigundo CD de kantigas djudeo-espanyola i la premiera de su  próksimo espektaklo entitolado "Paseando..." en el 1996, eya prezentó un muevo programa bazado sovre kantes de boda, entitolado "Bodas!", ke fue gravado i publikado otra vez por la ARB Music en el Septembre del 2001.
Un kuartén CD entitolado "Entre deux rives", publikado en el Oktobre del 2005, prezenta endjuntos kantes sefaradís i otros kantes de tradisiones mediterráneas, inkluzo tradisiones arabo-andaluzas.
Eskrivió "El Sud-Ouest": "Esta kantadora save azer arrebivir komo dinguna otra esta memoria de un exilio ke kanta una Espanya ke no desparesió nunka."
Eskrivió Bouziane Daoudi de la "Libérasion": "Boz ancha, deklamasión fremiente, Sandra Bessis trae, de un leshano eritaje, el kanto djudeo-espanyol de la Andaluzía muzulmana... Komo de fakto su kanto abrasa todo el Mediterráneo, porké es nómad i ornamentado." 

Matilda Koén-Sarano

                                                                                                                                                                            
 


+ Añadir nuevo comentario
Traducciones enviadas por usted
Loading Cargando ...
+ Enviar Comentarios
+ Enviar contenidos sugeridos

לאדינו         Ladino


Artikolos de Matilda Koen Serano
      
Artikolos de Yehuda Hatsvi
    
Artikolos de Gad Nassi
  
Artikolos de Eliezer Papo
   
Sefaradi Taor

ladino
Fecha y hora
 

La Asosiasion Arkadash | Ladino | לאדינו | judeo espanyol |

אתר זה הוקם ע"י זום ייעוץ ומערכות מידע