ladino  

 
Judeo espanyol
Contador:

Inicio >> Kantadores en Ladino >> S >> Sarah Aroeste
 

 Sarah Aroeste
(New York, U.S.A.)

Sarah Aroeste nasió en los Estados Unidos 32 anyos antes  i kresió en Princeton N.J.  Kresiendo eya se apersivía ke avía diferensia entre su famiya i las otras famiyas djudías en su enturaje, ma no entendía exaktamente en kualo. Eya empesó a azer demandas después de una vijita a sus tíos en Palm Beach, ande todas las radios eran ensendidas en stasiones en espanyol.  Sarah Aroeste deskuvrió ke, komo la mas parte de los djudiós ke konosía, sus raízes yevan atrás a la Espanya Medieval, i sus famiyas, komo la suya, sono konosidas komo sefaradías, i eredaron el ladino. Komo de fakto Sarah es de orijín sefaradía de Gresia. Eya, ke mora en el West Side, se dedika a mantener el ladino bivo, i a fraguar pontes kon múzikos no-djudios. Eya tiene un grupo muzikal ke se yama "El grupo de Sarah Aroeste". Sarah kere ayudar a yevar la múzika del ladino a la mueva jenerasión, integrando las kantigas klásikas en ladino kon las enfluensas aktuales del rok, del pank, del jazz i del blus.  Uzando enstrumentos tradisionales komo el ut i el dumbelek endjuntos a la gitarra eléktrika, Sarah kere enfundir mueva vida i enerjía a los ermozos i misteriozos sones de la múzika sefaradía. Sarah estudió la ópera  en la Universidad de Yale i lavoró kon Nico Castel i  en el Instituto israelí de las artes de la boz. Publikó dos operas emportantes kon las kualas tuvo performansias en munchas partes del mundo: "A la una: In the beginning" i "Puertas". En estos últimos tiempos eya está kolaborando kon Roberto Rodriguez, un múziko kubano muy famozo, ke está eskriviendo múzika orijinal en ladino, inspirándose a la múzika kubana, para artistas famozos komo Julio Iglesias, Paul Saymon i otros. Sarah partisipó al Festiladino 2008, ke tuvo lugar en el Teatro de Yerushaláyim, kon la kantiga "En este korasón" (palavras i múzika de Roberto Rodriguez), i ke suvió a la final.  Sarah Aroeste i Roberto Rodriguez en sus espektaklo en Cuba delantre de la komunitá djudía, dechizaron de fondar una biblioteka de múzika djudía en Havana. Sus esuenyo es de azer un festival de múzika djudía en  Cuba. Sarah Aroeste es una mujer ke tiene una misión. Eya kere redefinir el término "Múzika djudía".


Matilda Koén-Sarano

                                                                                                                                                                            
 


+ Añadir nuevo comentario
Traducciones enviadas por usted
Loading Cargando ...
+ Enviar Comentarios
+ Enviar contenidos sugeridos

לאדינו         Ladino


Artikolos de Matilda Koen Serano
      
Artikolos de Yehuda Hatsvi
    
Artikolos de Gad Nassi
  
Artikolos de Eliezer Papo
   
Sefaradi Taor

ladino
Fecha y hora