ladino  

 
Judeo espanyol
Contador:

Inicio >> Kantadores en Ladino >> S >> Savina Yannatou
 

Savina Yannatou
(Atena,Gresia- 1959)
De Wikipedia – Internet

Savina Tannatou  es una kantadera grega muy renomada. Eya nasió en Atena en el 1959. Estudió kanto en Konservatorio Nasional de Atena i mas tadre en la "Guildhall School of Music and Drama" en Londra. En el 1979 empesó a lavorar komo profesionista i dos anyos después partisipó a la rejistrasión del albom "Edo Lilipupolis" ke tuvo muncho sukseso de krítika. Después de esto su karriera se dezvelopó i eya publikó numerozos albomes de kanto en diferentes linguas. Su repertorio konsiste en kantes del Mediteráneo, de la Renesans, del Baroko, i kantes sefaradís. En el mizmo tiempo  está enteresada en la múzika klásika, el jazz i la múzika de avangardia. Eya eskrive también kantigas, kompoza para el teatro ( komo "Medea", para el Teatro Nasional de Gresia), se okupa de bayle teatral i de video-arte. Savina Yannatou empesó kantar akompanyada por su ermana, i fue enfluensada en sus primeros pasos por Montserrat Figueras i Joan Baez. Del 1983 eya es miembra del "Early Music Workshop" en Atena, dando espektaklos  en toda la Gresia. En el 1994 salió su albom "Primavera in Salonica", ke enkluye kantes de la komunitá mas fuerte de la  Diáspora djudía en el porto kosmopolita de Saloniki. Esta muzika djudía de los Balkanes fue renovada i modifikada atraverso los eksperimentos vokales de Savina, i sus virtuozos instrumentalistas. Savina Yannatou i su grupo "Primavera en Salonika" prezentan en sus programas múzika del Oriente kon ekuivalente múzika del Oksidente, múzika de la Edad Media i múzika polifónika del Mediteráneo. El programa konsiste en una meskla de 3 de los CDs ke eya produsió kon el grupo "Primavera en Salonika": "Sephardic Folk Song from Salonica", "Songs from the Mediterranean" i  "Virgin Maries of the World". Los kantes populares son melodías selestes, ke evokan los tiempos pasados. El primer CD konserna los djudiós sefaradís, ekspulsados de la Espanya en el 1942, ke se establesieron en Salonik i fondaron ayá una emportante komunitá. Savina Yannatou kanta en ladino. El CD "Songs fron Mediterranean" enkluye kantes populares de Sardenya, Kórsika, Israel, Turkía, Sud Italia, Gresia, Sipros, Albanía i Espanya.
El treser CD es una seleksión de kantes populares sovre el patos divino i la resurreksión de la área del Mediteráneo, de Afrika, Sud Amérika i los Caribes.
La última produksión de Savina Yannatou es una koleksión de kantes de Manos Hadjidakis, uno de los dos mas grandes kompozitores gregos, entitolada  "Savina Yannatou Sings Manos Hadjidakis" del 2002.

Matilda Koén-Sarano

                                                                                                                                                                            
 


+ Añadir nuevo comentario
Traducciones enviadas por usted
Loading Cargando ...
+ Enviar Comentarios
+ Enviar contenidos sugeridos

לאדינו         Ladino


Artikolos de Matilda Koen Serano
      
Artikolos de Yehuda Hatsvi
    
Artikolos de Gad Nassi
  
Artikolos de Eliezer Papo
   
Sefaradi Taor

ladino
Fecha y hora