ladino  

 
Judeo espanyol
Contador:

Inicio >> Kantadores en Ladino >> S >> Shabi Katzir
 

Shabi Katzir
(Israel - U.S.A.)

Shabi Katzir nasió en Sofia (Bulgaria) en el 1948. Izo su aliyá a Israel kon toda su famiya en el 1949. Su famiya arivó al "beit olim" en  Binyamina. Ayá bivieron kaje un anyo en tiendas. De Binyamina pasaron a Kfar Aharón, un kazal al lado de Nes Ziona. Unos kuantos  mezes bivieron de portukales en Beit Arizá (el lugar se topava entre pardesim – arvolés de portukales). Kuando trusheron barakas de Shvedia, su padre ke era karpentero, ayudó a fraguar las kazas.
En el kazal bivían olim de Turkía i Bulgaría. La vida ayá era exaktamente komo kontó Yitzhak Navón en el “Bustán Sefaradí”. En kaza la famiya de Sabi avlava sólo djudeo-espanyol (ladino) i eskuchava también programas en djudeo-espanyol en la radio, komo “Shimón Shimón”. La primera guitarra que tuvo Shabi, la izo su
padre, kuando Shabi tinía 13 anyos. A él le plazían muncho las romansas en ladino, ke kantava su madre kon su ermoza boz. En la armada entró en "Hel Avir", ma no lo
tomaron a kantar en una "lehaká tsvaít" (amsamble militar), porké era muy profesionl en  elektrónika de aviones. Pero durante todas las fiestas kantava solo i kon grupos. En el 1972 izo parte de un grupo ke se yamava “Ha-Achim Ve-Haachayot”. Este grupo tuvo munchos programas en la radio i la television. Por 3 anyos kada semana tuvo un progarma de televisión  para kriaturas kon el artista  Oded Teomi.
En el 1980  Shabi partió para la Amérika i se fue a bivir in New Jersey. Estudió en el Kean College "Film and Television Production" (produksión de filmos i televizión), i topó un lavoro en la ABC NEWS, ke es una  de las mas grandes  stasiones de televizión  del mundo. Ayá lavoró kon los mas grandes i populares jurnalistas del mundo, komo Peter Jennings, Barbara Walters, Ted Koppel i otros. Durante su lavoro konosió a munchos artistas i kantantes  populares en el mundo, komo: James Brown, Sting, Woopi Goldberg, Lionel Richie, Elliot Gould i  otros mas, komo se puede ver en las fotos en su profil en Facebook. Por 28 anyos stuvo lavorando para la ABC Television i para la "Walt Disney Co."
En todo este tiempo la múzika estuvo kon él. Kantava en las Komunitás djudías en los Estados Unidos i Canada. Su programa se yamava  “Kantikas ke me kantó
mi madre”.  Durante un sierto periodo kantó kon Ofrí Eliaz,  aziéndole konoser el mundo de las kantigas en ladino. Resientemente tornó a Israel, ke es su kaza, i kere i se siente de dever kontinuar a tranzmeter la kultura i la tradisión muzikal del djudeo-espanyol.

Matilda Koén-Sarano

                                                                                                                                                                            
 


+ Añadir nuevo comentario
Traducciones enviadas por usted
Loading Cargando ...
+ Enviar Comentarios
+ Enviar contenidos sugeridos

לאדינו         Ladino


Artikolos de Matilda Koen Serano
      
Artikolos de Yehuda Hatsvi
    
Artikolos de Gad Nassi
  
Artikolos de Eliezer Papo
   
Sefaradi Taor

ladino
Fecha y hora