ladino  

 
Judeo espanyol
Contador:

Inicio >> Kantadores en Ladino >> V-Z >> Voice of the Turtle
 

Voice of the Turtle
(U.S.A. 1978)

En el 1978 los muzisianos Judith Wachs, Derek Burrow, Lisle Kulbach i Jay Rosenberg, ke enterpretavan en un grupo yamado "Quadrivium" múzika medieval i de la Renesans, deskuvrieron la múzika de los djudiós espanyoles. Fue Aviva Rosenbloom, hazanit en Los Angeles, ke les izo konoser el kante "Skalerika de oro", i de ay empesó sus enteresamiento, no sólo por la múzika, ma i por la kultura djudeo-espanyola.  Judith Wachs, una ashkenazía i era la direktora artístika del grupo, ke tomó el nombre de "Voice of the Turtle", empesó a envestigar la tradisión oral de los sefaradís, vijitando sus kazas i enrejistrando de boka de los mas ansianos de eyos sus kantes tradisionales. Aktivitad ke trusho el grupo a deskuvrir las varias versiones de estos kantes, sigún  los diferentes lugares de provenesia, i a bushkar de tener performansias lo mas posible fiyeles a los enformantes. Eyos kantan en ladino i en ebreo i se akompayan kon mas de 25 enstrumentos muzikales.  Bazado en la aera de Boston el grupo es el mas konosido grupo, ke entepreta múzika sefaradía en Amérika, kon la klara entansión de enkorajar a la djente a prezervar su mizma kultura. Por sus mérito miles de personas – kriaturas i adultos – fueron introduktos a esta múzika, porké eyos aparesieron en muy munchas tranzmisiones de radio, en konseros i festivales, kon performansias en Yerushaláyim, Madrid, Hong Kong i Inglitierra. El grupo tiene un prograna spesial  de zemirot de shabat, una varietad de versiones del Kántiko de los Kántikos, de las diferentes komunitás, i de melodías de la avdalá, de las varias rejiones de la koiné de los sefaradís. En 28 anyos de performansias en munchos paízes el grupo publikó 12 albomes de CDs de múzika sefaradía de Turkía, Maroko, Bulgaría, la pasada Yugoslavia, Gresia, Rodes i Yerushaláyim. En kada CD son inkluyidos los kantes de una rejión partikolar, a parte dos de eyos, uno de los kualos inkluye  kantes de Pésah i el otro kantes de Purim. El nombre del grupo"Voice of the Turtle",  está a akodrar kon su nombre la palomba del exilio i de la paz. La direktora del grupo, Judith Wachs, murió en el 2008 en Cambridge, Mass.


Matilda Koén-Sarano

                                                                                                                                                                            
 


+ Añadir nuevo comentario
Traducciones enviadas por usted
Loading Cargando ...
+ Enviar Comentarios
+ Enviar contenidos sugeridos

לאדינו         Ladino


Artikolos de Matilda Koen Serano
      
Artikolos de Yehuda Hatsvi
    
Artikolos de Gad Nassi
  
Artikolos de Eliezer Papo
   
Sefaradi Taor

ladino
Fecha y hora
 

La Asosiasion Arkadash | Ladino | לאדינו | judeo espanyol |

אתר זה הוקם ע"י זום ייעוץ ומערכות מידע