ladino  

 
Judeo espanyol
Contador:

Inicio >> Kantadores en Ladino >> V-Z >> Yossi Banai
 

Yossi Banai
(Yerushaláyim 1932 -  2006)

Yossi Banai, kantador, aktor dramátiko i kómiko, autor de palavras para kantigas, spíker, rejisor de simená i de televizión en Israel, laureato del premio de Israel, nasió en Yerushaláyim en el 1932 en el kartié de Mahané Yehudá, en una famiya prove i kon munchas kriaturas, ke dio vida a munchos aktores israelís. No izo estudios regolares, no eskapó la eskola elementar, i fue un autodidakta.
Empesó a okuparse de teatro en su kartié kon su ermano Haim. En el 1951 se adjuntó  a la "Laakat Anahal" komo aktor kómiko. Kuando eskapó el servisio militar fue resivido a la eskola de aktores de la "Habima". Kon el tiempo pasó a ser aktor de teatro kon partes siempre mas emportantes. A serka de ventisinko anyos se fue a París, ande se okupó de la múzika de los shansoniés fransezes.
A su retorno él djugó por munchos anyos sovre shenas de teatro i de pasatiempo, i sovre todo en la "Habima". Las piesas ke djugó son munchas i variadas, de piesas israelís a estranjeras. Djugó munchas piesas de Nisim Aloni, i fondó kon él i Avner Hizkiau el "Teatro de las Sezones", ke no turó muncho.
El djugó piesas kómikas kon Yona Atari (1961) i kon Rivka Michaeli (1973), fue rejisor de 5 programas del grupo "Agashásh Ahiver" (1971-1991). Eskrivió kantigas umorístikas, i kantó kantigas fransezas de Jacques Breil, George Brassens i otros, traduizidas por la mas parte por Naomi Shemer. Kantó la kantiga de eya "Al kol ele", ke se izo muy popular en el paíz.
Mizmo ke deshó Yerushaláyim, él kedó atado a eya. Akodraremos su monopiesa "El retorno de Suramelo", i una de sus últimas kantigas "Ani veSimon veMois akatán". Yossi Banai era aktor de sinemá i spíker, i dio su boz al programa "Amud Aesh".
Akodraremos el "Romansero sefaradí" de Yitzhak Navón (1967), en el kual Yossi Banai resitó i kantó en ladino al lado de Yehoram Gaón i Rema Samsonov.
El en 1998 él resivió el "Premio de Israel" por el teatro. Por su última enterpretasión de la figura del Rey David en "Kéter Barósh" de Yaakov Shabtay él resivió el premio para el mijor aktor del 2005. El murió en el 2006.
Yossi Banai era un aktor dramátiko i kómiko kon una fuerte  personalidad  sovre la shena. Su enfluensa sovre la kultura israelí fue muy grande.


(La kantiga ke metí a la fin de mi programa es el imno "Adón Aselihot", kantado por Yossi Banai).


Matilda Koén-Sarano

                                                                                                                                                                            
 


+ Añadir nuevo comentario
Traducciones enviadas por usted
Loading Cargando ...
+ Enviar Comentarios
+ Enviar contenidos sugeridos

לאדינו         Ladino


Artikolos de Matilda Koen Serano
      
Artikolos de Yehuda Hatsvi
    
Artikolos de Gad Nassi
  
Artikolos de Eliezer Papo
   
Sefaradi Taor

ladino
Fecha y hora
 

La Asosiasion Arkadash | Ladino | לאדינו | judeo espanyol |

אתר זה הוקם ע"י זום ייעוץ ומערכות מידע