ladino  

 
Judeo espanyol
Contador:

Inicio >> ARTIKOLOS >> Matilda Koen Sarano >> el kal de firenze
 

El kal de Firenze
Matilda Koén- Sarano

Los djudios de Firenze

Antes de arivar al grande kal o sinagoga de Firenze, devemos avlar en kurto de los djudios de Firenze i sus orijines, para arivar asta muestros dias.
Las orijines de la komunita djudia de Firenze se topa kon toda probabilita en la epoka romana. Un chiko nukleo de djudios parese ke morava en la rejion de Oltrarno, apenas afuera de las murayas en la otra oriya del rio, ande la via Cassia entrava en la sivdad atraverso el antenado del Ponte Vecchio. Benyamin Me-Tudela enkontro los djudios de las komunitas de Firenze, Pisa, Lucca i Siena durante su viaje atraverso la Italia en el 1159. Fueron todavia los Medici en el siglo XV a azer en manera ke la komunita djudia pudiera pujar, en partikolar kon Cosimo il Vecchio ke dio una primera konsesion para un banko de emprestimo en el 1437, kuando arivaron los prestatores de Pisa i otros komunes toskanos, ma i de Rieti i Tivoli. Lorenzo de Medici resivio en su korte djudios muy kultivados komo Johanan Alemanno, Abraham Farissol i Elia Delmedigo. Este ultimo es rafigurado en la famalia de la famiya Medici ke akompanya la "Adorazione dei Magi" en el grande fresko de Benozzo Gozzoli, ke en el Palazzo Medici Riccardi selebra las gloria de la famiya Medici. Las primeras difikoltas empesaron en segito a las predikasiones anti-djudias de Girolamo Savonarola. A estas segieron dekretos de ekspulsion (1477 i 1491), ke izieron difisil la prezensia djudia en la sivdad.
La situasion se establesio kon afirmasion del Granducato. En el 1551 Cosimo I, sovre konsejo de Yaacov Abrabanel,  resivio munchos djudios de Espanya i Portugal, protejados para ke exersaran la profesion del emprestimo i ayudaran a los trokos komersiales kon el Levante. Cosimo I mizmo, por orden del Papa, empozo en el 1571 el ovligo de la rezidensia forsada en el geto, situado en el sentro de la sivdad, ande esta agora Piazza della Repubblica. Aki tuvieron de arivar tambien djudios ke moravan en sentros minores al derredor de Firenze.  Adientro del geto los djudios tenian su propia vida relijioza, sosial i kultural, i tenian dos sinagogas, una de rito italiano, i otra de rito sefaradi (o levantino), las eskolas, la karneseria kasher, el orno, la tevilla, i munchas enstitusiones de asistensia i de bienfezensia. Solo a algunas famiyas de prestatores fue dado el privilejio de morar afuera del geto, al lado de la rezidensia de los Medici del Palazzo Pitti, in via dei Giudei (agora via Ramaglianti), ande existia una chika sinagoga muy probablemente del 1400. Asta la Sigunda Gerra Mondial se pudian ver trasas de esta sinagoga, ke fue kompletamente destruida por las bombas de los almanes. Durante la Enkizision el ultrakatoliko Cosimo III promulgo leyes ke defendian a los kristianos de lavorar para los djudios.

La emansipasion

La vida kultural i sosial de los djudios tomo una mas grande fuersa kuando en el 1738 Firenze paso debasho al dominio illuminado de los Lorena. A la fin del `700 Leopoldo I rekonosio a los djudios los primeros derechos siviles. Kuando Napoleon konkisto la Toscana el trusho la emansipasion sivil a los djudios i fue difisil para los djudios de tornar a ser enserrados en el geto al momento de la Restaurasion, despues del Kongreso de Viena en el 1815. Kon la unita de Italia se kumplio la total emansipasion, i fue entonses ke la komunita de Firenze bivio su mas grande esplendor, tomando avantaje del rolo de Firenze komo kapitala kultural (i por poko tiempo i sivil) del muevo estado. Los djudios resivieron la parita de los derechos kon los sivdadinos kristianos i se dedikaron a todas las profesiones i aktivitas, i kontribuyeron  al dezvelopamiento kultural i ekonomiko de la sivdad.  Entre el 1881 i eo 1898 el viejo geto fue destruido kon la kreasion de la plasa de la Repubblika. En el 1882 , kon el ayudo de arshitektos kristianos, fue inaugurado el muevo kal monumental, uno de los exemplos de la emansipasion en Italia, mientres ke se fraguava la mueva fasada de la Bazilika de Santa Croce sovre projekto del arshitekto djudio Niccolo' Matas.

El Siglo XX

En el 1899 el rav Samuel Hirsch Marguleis inauguro i dirijio por 32 anyos el Collegio Rabbinico, ke fue un verdadero sentro kultural del djudaizmo italiano al prinsipio del mil i novesientos. En Firenze salian las mas emportantes Revistas djudias: La Rivista Israelitica, La Settimana Israelitica, Israel (ke paso a Roma), i la Rassegna Mensile d`Israel,(ke paso a Padova i despues a Roma).
En el 1931 bivian en Firenze 2730 djudios. Las Leyes Rasiales i las persekusiones de la Shoa dieron un golpe muy duro a la komunita. En el periodo de la okupasion almana la puevlasion de Firenze ayudo en manera muy jeneroza a los djudios persegidos, primero el bishof Elia Dalla Costa i otros tres papazes. La DELASEM fondo un komitado klandesino ebreo-kristiano, ke malgrado las grandes difikoltas reusho a mantener un djiro de ayudos konstantes. Uvieron munchos konventos i munchos sivdadinos ke avrieron sus puertas para akojer a los persegidos. Ma uvieron i episodios de violensia i de delasion de parte de los republikinos lokales. A la fin 248 djudios i entre eyos el Rabino Nathan Cassuto fueron deportados. A parte de esto fue destruida la chika sinagoga de via de`Giudei, i el kal grande fue devastado gravemente.
La vida djudia torno despues de la gerra kon 1600 rezidentes. En el 1947 Firenze se izo la sede de una de las primeras asosiasiones de dialogo ebreo-kristiano en Evropa i la primera en Italia. Amicizia ebraico-cristiana fue fondada por inisiativa de Arrigo Levasti i Angelo Orvieto kon el apoyo del mayor Giorgio La Pira. En el 1980 kon la publikasion de la edision italiana del romanso de Elie Wiesel "La notte" (La noche) nasio en Firenze por inisiativa de Daniel Vogelmann la Kaza Editora La Giuntina, spesializada en ovras ke tienen ke ver kon la vida i la kultura djudia. Del 2000 viene publikada en Firenze tambien la Revista "Materia Giudaica", organo de la "Associazione Italiana per lo Studio del Giudaismo". La Komunita Djudia tiene oy un poko mas de mil enskritos rezidentes en Firenze.

Il Tempio Maggiore Israelitico di Firenze

La Sinagoga prinsipal de Firenze o Tempio Maggiore Israelitico se topa en el sentro istoriko de Firenze en Via Farini. Su kube vedre de kovre es un punto selebre en el panorama de Firenze.  Komo ya dishimos, la komunita djudia de Firenze es muy antika i tiene sus orijines en la epoka romana, o mas presizamente en el primer siglo  despues de la sefira, kuando esklavos djudios fueron yevados a Roma. Pero no ay notisias siguras sovre los lugares de kulto asta la enstitusion del geto en el 1571. En el geto avian dos sinagogas, una de rito italiano i una de rito espanyol. Avia ademas una tresera sinagoga en Via de` Giudei (oy Via de` Ramaglianti), ande fue pemetido a un grupo de famiyas djudias de prestadores de bivir afuera del geto, al lado de la rezidensia del granduka en el palazzo Pitti. Las dos sinagogas del geto sesaron de funksionar en el 1848 kon la serradura del geto mizmo (ke fue kompletamente derrokado a la fin del 1800) i sus atuendos fueron transferados en dos oratorios en Via delle Oche, ke kon la aviertura de la mueva sinagoga monumental fueron dedikados al kulto italiano i al kulto ashkenazi. Sus aktivita seso solo en el 1900. Antes de la Sigunda Gerra Mondial se serro el oratorio italiano i en el 1962 el oratorio ashkenazi. Sus atuendos sakros fueron transferados a Israel, a la Sinagoga Yad Haghiborim en Ramat Gan ( los del oratorio italiano), i a la Yeshiva Kerem be-Yavne (los del oratorio ashkenazi) ande se topan asta agora. A akodrar los dos oratorios kedo oy en Firenze solo una laja sovre la pared del edifisio, mientres ke la sinagoga de Via d` Giudei fue destruida durante la Sigunda Gerra Mondial, por las minas ke destruyeron las kalejas ke yevan al Ponte Vecchio.
La konstruksion de una mueva sinagoga se izo nesesaria despues de la aviertura i mas despues el derrokamiento del viejo geto de Firenze. El arrekojimiento de fondos, ke ya avia empesado grasias a una donasion de 5,000 dukados de parte de la famiya Montebarocci, topo su konkluzion solo 30 anyos mas tadre, en el 1868, kon la sava del Cavalier David Levi, prezidente de la Universita Israelitica, ke desho sus bienes i kijo ansi azer posible la konstruksion de un "tempio monumentale degno di Firenze". Empeso ansi la merkida de un terreno al lado del muevo kartie de la Mattonaia i piazza d`Azeglio, i  entre el 1874 i el 1882 fue fraguado el "Tempio Maggiore Israelitico" sovre la baza de los projektos de Marco Treves, ayudado por los arshitektos Mariano Falcini i Vincenzo Micheli. Su konstruksion kosto un milion de liras de akel tiempo.
La sinagoga reprezenta uno de los mijores exemplos de arshitektura medioriental en la kuala el estil moresko se fundio kon el estil bizantino-oriental en un ekilibrio perfekto. La struktura del edifisio en en travertino blanko i roz, es en estil moresko a planta sentral kon kube mediana. La kube ke esta sovre un alto pandero sirkolar,  es de kolor vedre-azul , i es  un elemento enkonfondible en el panorama de Firenze. Otras dos chikas kubes son erijidas sovre dos chikas torres oktagonales. Los arkos internos i eksternos son en estil moresko, komo las ventanas, adornada de chikas kolonas. Las sinagogas de este periodo fueron jeneralmente projektadas komo konstruksiones endipendentes, non eskodidas en edifisios de morada sivil, komo afitava en  los getos. Esto akontesio a kavza del periodo istoriko del laisizmo estatal i el herem del Regno d`Italia de parte del Papa Pio IX (1870).
El edifisio, ke  esta situado en un jardino vedre un tiempo riko de plantas exotikas, serrado por un kandjel de giza, ovra de Pasquale Franci de Pisa, da al vijitador una sensasion de toparse en una atmosfera de savor oriental. En el jardino se topa i la eskola de la komunita.  En el jardino de la sinagoga ay una grande laja ande estan eskritos los nombres de 248 djudios de Firenze matados por los nazistas. Adems ay i una laja mas chika en memoria de los djudios de Firenze ke kayeron en la Primera Gerra Mondial. Una laja semejante tambien es ekspozada en la Stasion de Santa Maria Novella al lado de las rayas de las kualas partio el treno kon los prizioneros djudios verso los kampos de esterminasion.
El interno de la sinagoga, yeno de luz dorada, esta kompletamente kuvierto de motivos dekorativos de Giovanni Panti, pintados a arabeskos kolorados i blus, ke en orijin eran dekorados a oro. Los vitraje de mil kolores akodran shenas de la Biblia. El sentro de la sala es arrodeado de las azaras superiores serradas por varandados de fierro lavorado, ornados de kandelares a siete brasos, los modeles de los kualos fueron dado por Francesco Marini. En el prezbiterio, la arka kuvierta de mozaikos, esta arrodeada por el baldakino sovra el kual estan las Tavla de la Ley, ke se topan i en la fasada eksterna de la sinagoga. El aron-akodesh (arka santa) tiene kolonas de mamol preto, un riko mozaiko i puertas doradas. La bima es de lenyo eskuro kon enriva una lavor fina de entalyo. Las puertas del aron-akodesh, delantre del kual esta ensendida una luz perpetua yevan deynda los sinyos de los golpes de kidon de los fashistas ke bushkaron de abatirlas. Durante la okupasion nazista el kal fue utilizado komo garaj, i despues fue minado por los almanes, ke estavan fuyendo, ma por un mirakolo no salto en ayre. A la fin del kal a la derecha ay una puerta ke yeva a un oratorio de rito ashkenazi, entitolado al Rabino Samuel Zvi Margulies, ande estan dos arkas. En el sentro del patin se topa una estrea en marmol preto i amariyo ke proviene de la konfraternita Mattir Assurim en el antiko geto. Los tures de bankos de los ombres ke enfrentan los unos enfrente a los otros i las areas separadas para las mujeres demonstran ke la sinagoga es de rito ortodokso. Aun ke la sinagoga sea teknikamente sefaradia, los miembros de la komunita djudia de Firenze son djudios italianos. Ma mozotros tenemos una testimoniansa de su sefaradizmo primordial en el livro ke kito la Kaza Editora La Giuntina de Firenze kon los "Canti liturgici di rito spagnolo del Tempi israelitico di Firenze" kon palavras i notas, kantados por el pasado Rabbino Capo de Firenze, Fernando Belgrado z"l, ke a su tiempo enrejistro todas las melodias, i kito dos plakas grandes kon un album (ke yo tinia ma ke tuvi de dar, kuando di todos los diskos grandes). Se trata de kantes de Shabat i de todas las Fiesta djudias, de Rosh Ashana a Tishav Beav.
Al primer etaje de la sinagoga fue kreado el Museo Ebraico de Firenze,  fondado en el 1981, ke es una eskpozision istoriko-artistika ke amostra rapidamete los minutos mas emportantes de la istoria de los djudios a Firenze, i es divizado en dos partes. Una parte rekonstruye la istoria de los djudios de Firenze, apuntado en manera partikolar a la rekonstruksion de la area del geto viejo. La otra parte  prezenta  exemplos de atuendos  liturjikos de plata i  tishidos presiozos, ke son el patrimonio artistiko de la Komunita: antikos objetos uzados en las selebrasiones de las fiestas ebreas, presiozos objetos uzados en los momentos mas emportantes de la vida familiar, i platas i ropas raras uzadas para adornar el Sefer Tora. Algunos de estos objetos son del 1600.

De Wikipedia – Internet
Sacerdoti A.&Fiorentino L., Italy, Jewish Travel Guide, Israelowitz Publishing,1999
Amazon – Internet
 

                                                                                                                                                                            
 


+ Añadir nuevo comentario
Traducciones enviadas por usted
Loading Cargando ...
+ Enviar Comentarios
+ Enviar contenidos sugeridos

לאדינו         Ladino


Artikolos de Matilda Koen Serano
      
Artikolos de Yehuda Hatsvi
    
Artikolos de Gad Nassi
  
Artikolos de Eliezer Papo
   
Sefaradi Taor

ladino
Fecha y hora