ladino  

 
Judeo espanyol
Contador:

Inicio >> ARTIKOLOS >> Yehuda Hatsvi >> Alegria de Purim
 

Alegria de Purim / Yehuda Hatsvi
 
Oy avlaremos sovre la fiesta de Purim ( a vezes en seryo).
 
Ma antes de todo vamos a platikar sovre los platikos de Purim.
Entre los sefaradim ay un dicho muy popular: "Despues de Purim - platikos". Pero de tanto uzarlo en ekseso, este dicho ya esta bien desgastado.
 
A propo, ay i otra una fraza ke diziyan los sefaradim kuando alguno entrava a la konversasion muy tadre i sin entender lo ke pasa; o despues ke ya paso todo:
"Na, ya vino Hanna kon plato".
 
Bueno, ya basta. Ya platikimos demazia sovre los platikos.
 
Muestros hahamim disheron (en Masehet Taanit):
"De kuando entra Adar, se muchigua la alegria". 
Entonses, Adar es un mez espesial markado kon grande alegria.
 
En realidad, kada primo de kada mez, (Rosh Hodesh), era, en tiempos antiguos, una fiesta.                                   La Tora enkomendo de tanyer en tala fiesta kon las trompetas; i sovre el rey Shaul meldamos ke kada Rosh- Hodesh aziya un bankete, una Seuda espesial.
 
Ma, komo vemos, ay fiestas Judias ke se selebran en el medio del mez, komo por egzempio Sukkot i Tu beAv.
Tu beAv una fiesta antigua ke se esta renovando aki en los anyos de alkavo. Es komo una version judia a "el dia de san Valetin".
I na ke tenemos en este periodo del anyo TRES mezes
(uno detras del otro) ke se fiestan kuando la luna en kinze: Tu Bishvat (ke es la fiesta de las frutas), Purim, i despues Pesah.
 
 
Esto me aze akodrar de una dicha ke (tengo de admeter) es dicha de mujeres. Kuando el marido aprometiya a su mujer algun viaje en el enverano, o ke le aprometiya de merkarle para Pesah algun vestido karo, le mirava la
mujer (muy praktika i realista), i le diziya:
"Bueno, bueno, veremos la luna – azeremos el Bayram".
("bayram" es biervo turko por "fiesta").
 
Tornaremos a Purim:
 
 
El ovligo de Purim, segun la Alaha, es de oyir la Megila de Ester, resitada por el hazan en la kehila, meldada de una megila eskrita sovre  pergamino,
o en otra palavra (ebrea) mas konosida: Klaf.
 
Ay muchas Alahot sovre la Megila, i aparte de lo ke mos avizan en el Talmud, ay deklaros i perushim en el livriko de Meam Loez sovre Megilat Ester.
 
Avlando por la Megila, aun si no tenesh una Megila semejante, ya metitesh tino, siertamente, ke la komputadora, la ke todos empleamos, es en realidad
una Megila moderna. Para meldar algun texto largo tenemos de rodear o enrolar (kon el ratoniko). Muy semejante a la Megila.
 
Los protagonistas muestros de la Megila son Ester i Mordehay. Los dos mos provaron ke eran buenos Jidios, ma tenian de eskonder sus identidad, i ansi yevavan nombres ajenos. Por Ester ya savemos ke su nombre ebreo era Hadassa.
 
Entre los Anusim (los konversos), la yaman la Santa Ester, i tambien podemos notar ke el nombre Ester entre los Sefaradim es muy popular.
Una de las razones es, al pareser, porke Ester es konsiderada entre mozotros komo una mujer onesta i modesta.
 
Agora vengo a avlar por otro un nombre popular entre mozotros, sefaradim, i es SARA, ke tambien es konsiderada komo una mujer muy modesta .
Por otro lado, la tenemos a la reyna BAT-SHEVA, la madre del rey Shelomo; kuantas mujeres sefaraditas konosesh kon este nombre?
 
Ma ay i otro un atadijo entre Ester i Sara Imenu.
La Megila empesa: "Akontesio en los dias de Ahashverosh (Asuero) ke reino desde la India asta Etiopia, siento i vente i siete provinsias". 127.
 
En la perasha de Haye Sara meldamos ke Sara muestra madre muryo a la edad de 127 anyos.
Segun muestros hahamim, todos sus anyos pasaron en modestia i santedad, i por Zehut de Sara, se le dyo a Ester el poder de reinar sovre 127 provinsias.
 
A propo, ay otro un atadijo entre el livro de Bereshit kon la Megila de Ester.
Kuando Yaakov Avinu enganyo a su padre Yitzhak, i arrovo la Beraha de su ermano Esav, vino Esav ande Yitzhak, i ayi se deskuriyo el enganyo.
I mos eskrive la Biblia, sovre Esav el kual "esklamo kon esklamasion grande i amarga".
 
Aki, en la Megila meldamos las mismas palavras por Mordehay kuando sintyo la Gezera de Haman.
.  
En toda la Biblia, estas son las dos unikas vezes ke se emplea una tala fraza: Para mostrarmos ke el Dio es bien rekavdador, i nunka se olvida.
 
Torno una vez mas al numero 127, i vos konto ke en las teorias de la matematika antigua de Pitagoras, i otros sientistas tambien, el numero 127 es rekonosido komo un numero perfekto, inosente, i eskondido.
Ke kiere dizir "eskondido"?
Por egzempio, imajinandovos ke tomamos un triangolo  grande,  i metemos a la puntika del triangolo una piedrizika. En la segunda linya – dos piedras, i ansi kontinuamos etc. etc., asta ke metimos 8128 piedras en el triangolo. La ultima linya kontiene 127 piedrizikas !
 
En el livro de Reyes/Melahim Alef, kapitolo 20, mos kontan sovre la batalia kontra los Arameos i sus rey Ben 'Haddad.
La armada de Ah'av, Rey de Yisrael, mato en esta batalia
127 mil soldados Arameos.
 
Es kuryozo ke el istoriador grego Herodotus mos konta sovre la batalia en Salamis (serka de Famagusta, Kipros)
antes kaje 2500 anyos, entre los gregos kontra los persianos.  La armada marina de Atena kontava aya egzaktamente 127 vapores de gerra.
 
 
En el primo kapitolo de la Megila mos kontan sovre los banketes ke izo el rey Ahashverosh, no menos de 180 dias, para los nobles i los ministros; despues izo un konvit ke turo 7 dias para todos los sivdadinos de Shushan la kapitala.  Meldi i meldi la Megila i no topi ke dieron ayi alguna koza de komida, ma el vino korryo komo un rio,
i a todo el ke vino, le dieron a bever vino, i mas vino.
 
Bueno, no es por esto ke bevemos vino en Purim. Bever vino konsola al korason, i por fiestar kon alegria, ya kaven dos-tres sorvos de vino. Ma, me maraviyo lo ke dize en Masehet Megila en el Talmud, ke devemos de bever vino en Purim asta de no apartar entre "Bendicho Mordehay" a "Maldicho Haman".
 
Ke manera?
 
En el Judaismo ay mucho despresio i desdenyo verso los borrachones, i aki mos dize el haham RABA de bever sin frenos?? Kuryozo!. Me da a pensar ke el haham Raba ya estava medio borracho kuando mos disho lo ke mos disho.
 
 
Agora en parantez vos konto de lo ke me akodro de mi chikez:  Una de las ermozas kantigas en judeoespanyol, "La vida do por el Raki", mos izo mucho mal aki en Erets- Yisrael.  La djente (non sefaradim) tomaron sovre mozotros una impresion yerrada de borrachones.
"Raki, Raki" mos diziyan kon un poko de burla.
Ma, oy en fiesta de Purim no avlaremos por esto.
 
Al kontrario!
Vos konto ke en el ultimo salmo de Tehilim, topi yo el pasuk:
"Alavadlo (al Dio) en la espandidura de su fortaleza".
 
Las palavras en ebreo mos dizen:
"Aleluhu biREKIa OUZO".
Metiendo tino por favor: bi-REKIa OUZO.
No aki vesh el remez, la aluzion, de bever raki i ouzo?
 
 
El nombre de esta fiesta, Purim, ke sona un poko semejante a Kipurim, mos pusha azer komparizon entre las dos selebrasiones.
 
La primera koza muy klara i sovresaliente ke mos viene en al tino es ke en Purim tenemos el orden de azer una buena Seuda kon karne i vino i tanyedores, mientras ke
en el dia de Kipurim miramos agua al Dio ke en los sielos asta ke vemos las tres estreikas ke mos dan la permision de ir a komer la seuda ke, en realidad merese yamarla desayuno = (kortar taanit).
 
La shaka popular mos dize (umoristikamente), ke en Purim, los Judyos se degizen i se transvisten komo Goyim: Reyes, Reynas, Cowboys, etc., mientras ke en Kipurim todos los "goyim", ke no uzan a pizar portal de Kehila, se meten la takya/kipa a la kavesa i se degizan komo jidyos, indosen al Kal.
 
Bueno, ma ay ayinda perushim mucho mas seryos de este. Entre muestros hahamim el Purim es una fiesta ke no se va anular afilu kuando viene el Mashiah.
 
I porke?
 
Ya vos akodrash ke en resiviendo la Tora en Monte de Sinay, disheron muestros padres:
"Todo lo ke disho Adonay aremos i ovedesaremos."
I na ke un mez despues ya se enkorvaron los Ijos de Yisrael a un bezerro de oro.
 
Agora, segun muestros hahamim, bazandosen a lo ke esta eskrito en la Megila, "Los Judyos ordenaron i tomaron sovre si". En la Megila aprometimos no solamente de selebrar la fiesta de Purim, ma de kumplir las Mitsvot.
 
 
La primera Mitsva ke mos ordenan Ester i su tio Mordehay es de azer este mez de Adar yeno de alegrias, komer i bever i embiar prezentes kada uno a su kompaniero, i
dadivas a los menesterozos.
 
 
Si es por mi, vos do aki un siman:
el mez de ADAR sinyifika A DAR.
 
                                                                                        *
                                      *   *
El dia despues de Purim,
mos alevantemos todos kon bueno,
i BIVA LA LIMPIEZA
DE NOCHE DE PESA(h).     

                                                                                                                                                                            
 


+ Añadir nuevo comentario
Traducciones enviadas por usted
Loading Cargando ...
+ Enviar Comentarios

לאדינו         Ladino


Artikolos de Matilda Koen Serano
      
Artikolos de Yehuda Hatsvi
    
Artikolos de Gad Nassi
  
Artikolos de Eliezer Papo
   
Sefaradi Taor

ladino
Fecha y hora