ladino  

 
Judeo espanyol
Contador:

Inicio >> Kantadores en Ladino >> A-D >> Andela Nir
 
 

Kantadores de la tradisión djudeo-espanyola
Andela Nir
Kantadera

(Yerushaláyim)


Andela Nir nasió en Yerushaláyim en una famiya tradisional, ke morava al lado de Meá Shearim. De su chikés eya savía ke su vokasión en la vida era kantar. A la edá de 13 anyos aparesió en "Binyané Haumá". Su primera kantiga fu eskrita para eya por Yorik Ben-David, prezidente de Akum (Asosiasión de kompozitores i muzisianos en Israel) Esto le avrió el kamino para azer parte del grupo muzikal de la armada "Sadnaé ha-Shirión" (El grupo de los tankistas).

Enrejistró tres albomes a solo i lavoró kon los mijores kompozitores, komo Eud Manor de bindicha memoria, Ester Shamir, Natan Cohen, Itzhak Kalpeter, Meir Goldberg i otros munchos i buenos. Aparesió munchas vezes al estranjero i avla sinko linguas: espanyol, fransés, grego, inglés i olandés.

Andela arivó a la sivdad grande i ayá empesó a apareser en kada lugar ande le permetieron, deskojendo kon kura el repertorio. El djénero de kanto en públiko al lado de las mezas es su spesialidad, i partisipó a la aviertura de kada lagar i taverna, ande korría de todo el país, para vinir a oyir el kanto en ebreo. El estil de kanto públiko, ke eya izo entrar en el merkado del pasatiempo, se dezvelopó en grande. Era un kanto líbero sin kansioneros i sin projeksiones de palavras, al lado de mezas i sovre eyas. Djóvenes al lado de ansianos, laikos al lado de relijiozos. En una taverna konosió a su marido Uri, ke era a su tiempo el patrón del lugar. Se kazaron i les nasió una ija – Lihi. Después de anyos en la taverna, resivió la propozisión de transferarse kon su famiya en Olanda para azer parte de un grupo latino. Ansí ke vendieron la taverna i se pasaron a Olanda. El sojorno en Olanda fue bueno i plaziente, ma eya sintía deynda el dezeo de azer kreser a su ijika en muestra tierra, i ansí eyos tornaron a Israel.

Andela sonyó siempre de kontar el kuento de su chikés en los kurtijos de Yerushaláyim, del punto de vista de una ijika yerushalmía en un kartié ortodokso, ke mirava kon kuriozitá adientro de los kuentos del mundo de los adultos. "Ahava Sfaradit" (Amor sefaradí) es la realizasión de su sueno, en el kual eya toma el públiko a un viaje dinámiko, personal i kultural, a la kultura sefaradía en la kuala se engrandesió: el kanto en ladino, ke se sintia siempre en el kurtijo ande se engrandesió. En este kurtijo bivían en paz ashkenazís i sefaradís. Su ija Lihi partesipa a esta reprezentasión de la edad de 10 anyos i medio, bayla el flamenko en manera profesional i aze parte de la realizasión del sueno de la madre. Es verdad ke Andela kería baylar el flamenko, ma arivó a otros lugares. Su ija bayla para eya. Son dos jenerasiones sovre una sola shena.

Antes serka de un anyo Andela salió kon un otro spektaklo "Israelí benihóah yevaní balkani" (Israelí kon perfume grego balkániko), ande kanta en grego i en ladino. El programa tiene muncho sukseso en los klubes de ladino en todo el paíz, i bushka de konservar el espírito de las dos kulturas. El públiko apresia muncho la múzika i los chikos kuentos ke eya konta al lado las kantigas. En ségito al programa eya empesó el projekto de múzika grega balkánika kon palavras ebreas. En estos últimos tiempos salió su primer "single" del projekto "Bilti menutzáhat" (Envensible), i una semana antes salió otro "single", "Ha-HaímYafim" (La vida es ermoza), en vista del albom ke está en preparasión.


Matilda Koén-Sarano - 2013

                                                                                                                                                                            
 


+ Añadir nuevo comentario
Traducciones enviadas por usted
Loading Cargando ...
+ Enviar Comentarios

לאדינו         Ladino


Artikolos de Matilda Koen Serano
      
Artikolos de Yehuda Hatsvi
    
Artikolos de Gad Nassi
  
Artikolos de Eliezer Papo
   
Sefaradi Taor

ladino
Fecha y hora
 

La Asosiasion Arkadash | Ladino | לאדינו | judeo espanyol |

אתר זה הוקם ע"י זום ייעוץ ומערכות מידע