ladino  

 
Judeo espanyol
Contador:

Inicio >> ARTIKOLOS >> Matilda Koen Sarano >> Belmonte
 
 

Los kriptodjudiós de Belmonte




Matilda Koén-Sarano - 2006


 

 

Antes de empesar a avlar de los kriptodjudiós de Belmonte, se deve entrar en la istoria de los djudiós ekspulsados de Espanya, ke arivaron a Portugal.

Del primer núkleo de ekspulsados de Espanya en el 1492, serka de la metá preferó transferarse en Portugal, ande las kondisiones de los djudiós fueron siempre relativamente buenas, i ande eyos tinían una grande enfluensia en el komersio i en la administrasión finansiaria del paíz. El rey João II enkorajó sus arivo i deshó entrar a los mas rikos i a los artezanos ke podían serle utiles, ke pagaron una alta taksa. Ansí en pokos anyos Portugal akojó una enorme kantidad de djudiós exiliados. Debasho del reynado de Emanuel I (1495-1521) la vida de los djudiós mijoreó, asta ke las ambisiones polítikas del rey no superaron su benevolensia. Komo de fakto él tinía la entansión de kazarse kon la ija de Ferdinando i Isabel la Catolica. Para obtener esto le fue metida la kondisión de ekspulsar de Portugal a todos los djudiós ke refuzavan de baftizarsen, i él akseptó, porké aspirava a azerse el eredor de la korona de Espanya.

Después de poko tiempo fue fiksado el dekreto de ekspulsión, para la fin de oktobre 1497. Data ke fue imediatamente revokada. Todos los djóvenes debasho de los 25 anyos fueron arrestados i yevados a las fuentes de baftizmo, ansí ke la mas grande parte de la puevlasión djudía se konvertió, i un número enorme de kriptodjudiós se adjustó al ke existía en Portugal. Ken se kedó en Portugal estava ovligado a frekuentar la Eglisia, para ambezarse los primeros rudimentos del Katolisizmo. Entre los neokristianos se topavan ombres de kultura i rabinos también. Malgrado la konversión el puevlo kontinuava a manifestar verso de eyos sentimientos de onda inimistá i predjudisio.

En Portugal el kriptodjudaízmo fue muncho mas fuerte ke en Espanya, porke la Inkizisión fue entroduizida en el 1531, ma sólo verso el 1579 arivó a su máksima difuzión. El 19 de avril 1506 kedó tristemente en el rekordo de la istoria.

Damião de Góis konta en versos en su Crónica de D. Manuel lo ke akontesió akel día en el monasterio de San Domingo, ande una luz enriva de una kruz izo gritar el puevlo al mirákolo. Ma kuando un kristiano muevo disho ke era sólo el reflekso de la luz de una kandela, la djente se le echó enriva, lo travaron por los kaveyos i lo kemaron bivo delantre de la Eglisia. Otro autor anónimo konta ke akel día fueron matados mas de 1000 konversos, sin ke opozaran rezistensia. El número de los ke fueron matados en akeyos días superó los 4000, entre eyos i kriaturas. A munchos fueron kortadas las manos. A parte de esto fueron sakeadas sus kazas. Todo les fue rovado, i kedaron sólo los muertos, esparzidos en basho.

Los muevos kristianos bushkavan de fuyir, ma la mas parte no rueshía. Vinían aferrados i multados, ansí los ke los ayudavan a fuyir, komo los kapitanes de las naves, ke se azían pagar muy bien para yevarlos afuera del paíz. En todo modo algunos reusheron a arivar a otros paízes (komo Dona Grasia Nasí) i a tornar a sus antika fey, i otros bivieron en Portugal, eskondiendo su fey verdadera.

Se krearon ansí los kriptodjudiós, kristianos muevos de afuera i djudiós en sekreto.

Kriptodjudaízmo: Malgrado la konversión al Kristianizmo, miles de djudeizantes abandonaron sus kazas i sus sivdades, para estar mas leshos posible de la Inkizisión, i se fueron verso el nord de Portugal, a morar entre las muntanyas, en lugares a los kualos era difisil de arivar. En estos kazales pidridos komo Belmonte, Troncoso, Pinhel, Ventizello, Vilarunho dos Galeros, los konvertidos kedaron por siglos sekretamente fiyeles al Djudaízmo, del kual en el mizmo tiempo se pedrió la verdadera esensia. Eyos bivieron una vida sekreta yena de tormentos, sospechados i tomados a la burla por la puevlasión lokal. Mizmo después de siglos de konvivensia, mizmo después de la abolisión de la Inkizisión portugeza, eyos fueron konsiderados los “otros”, personas estranyas i solitarias , ke dizían palavras inkomprensibles, mizmo si frekuentavan la mizma eglisia i vinían enterrados en los mizmos semeterios.

Malgrado ke se komportaran bien, vinían siempre evitados, mizmo kuando eyos mizmos pedrieron la konsensia de sus Djudaízmo sekreto i se konsideraron kompletamente kristianos. Sovre eyos kontinuó a pezar la antika kulpa de sus apartenensia al puevlo djudió. I este predjudisio se siente en el ayre en algunos lugares del nord del Portugal. Belmonte es uno de estos lugares. Partiendo de Lisbona, i aziendo kaminos non sinyados sovre la mapa, se ariva a un chiko kazal sovre las muntanyas de Beira, ande parese ke el tiempo se kedó.




Belmonte: Belmonte es un kazal de 3000 almas, tiene una kaleja prinsipal, un kastiyo i una eglisia. Este el sentro de los últimos marranos de Portugal, ke asta el prinsipio del 1900 estavan konvensidos de ser los únikos reprezentantes del puevlo djudió, asta ke Barros Basto, un kapitán de la armada portugeza les reveló ke el mundo está yeno de djudiós. I en realidad los djudiós no savían ke el kriptodjudaízmo existía deynda, i pensavan ke ya avía desparesido de mas de un siglo.

Ken era el kapitán Arturo Carlos de Barros Basto? El nasió en el 1887 al lado de Oporto, de una famiya de “Cristianos Nuevos”, i se izo kapitán de la armada portugeza. El izo entrar el movimiento de los Boy Scouts en Portugal. Era muy aktivo politikamente i partisipó en la revolusión del 1910, ke izo entrar un muevo espírito liberal en Portugal, i esto tuvo un ondo efeto sovre la kondisión de los djudiós. El sirvió en el fronte britániko en las Flandras durante la Primera Gerra Mondial, i fue dekorado por eroízmo. Su nono fue un djidió aktivo ke iva a la sinagoga en Lisbona, para ambezarse mas sovre el Djudaízmo. Kuando él tornó de la gerra a Oporto i empesó a formar una komunitá kon los pokos ashkenazís ke estavan en esta sivdá, se enkontró kon famiyas de kriptodjudiós i kedó sorprezo de enkontrarse kon numerozos kompatriotas, ke le revelaron ke pratikavan el Djudaízmo en sekreto. El mizmo, para tornar al Djudaízmo tuvo de ir a Tanjer, para azerse el brit-milá. El tornó a Lisbona i se kazó kon una djudía de ayá, i se establesió en Oporto. Fondó una komunitá de 17 famiyas djudías imigradas de la Evropa Oriental, de la kuala era prezidente, trezorero, sekretario i shamásh. Kuando vino a konosensia de las numerozas kolonias de kriptodjudiós del nord, se metió en ovra kon su grande enerjía i entuziazmo.

Fue fondado en Londra el “Portuguese Marranos Commetee”, ke se formó apenas la kestión de los kriptodjudiós vino a la luz. En prinsipio Basto fue ayudado por el Barón Edmond de Rotschild de París i después por la famiya Kaduri de Shangay, i izo konstruir una ermoza sinagoga en Oporto, ke yamó Mekor Hayim. El izo konstruir otra sinagoga - “ShaaréKabalá” - para los kazales del nord, i izo avrir en Oporto una eskola yamada “Rosh Piná”, para aprontar maestros djudiós en Portulal. La lista de los estudiantes del 1929 al 1938 enkluyó elevos de munchas sivdades del nord: Belmonte, Braganza, Covilhã, Lagoaca, i otras. El izo publikar el jurnal “Ha Lapid” en portugés, para edukar al Djudaízmo i a la istoria djudía. Munchos djudiós manifestaron aviertamente sus Djudaízmo, ma las kozas trokaron emprovizamente kon el troko de governo en Portugal. El rejimen de Salazar izo entrar de muevo la eglisia en las kestiones de estado. El renasimiento del Djudaízmo fue visto en manera negativa, i Barros Basto fue ekspulsado de la armada kon una kalunia, i murió una muerte muy triste. Una ola de antisemitizmo barrió todos los esuenyos de los djudiós. La sinagoga de Oporto está agora vazía. La Sigunda Gerra Mondial, la Shoá i la fondasión del Estado de Israel enfasaron la memoria del Kap. Barros Basto, ke viene yamado “El Dreyfus portugés”. El governo de agora no es ostil a los djudiós i tiene relasiones kon el Estado de Israel, ma esto no konvense los ke se sienten de aver echo en pasado un grave yerro. (David Augusto Canelo, The Last Crypto-Jews of Portugal, Rabbi Joshua Stampfer, Introduction).




Tornando a Belmonte en partikolar, kontinuaremos su estoria:

En el 1917 Samuel Shwartz, un enjenier minerario djudió ashkenazí arivó a este lugar pidrido entre las muntanyas a lavorar en las minas de la Beira, i alguno le konsejó de no tener raportos de echos kon una persona ke se pensava ke apartuviera a un grupo de orijín djudía. Esto lo surprendió i lo izo ensistir para ke le prezentaran akeya persona i sus ko-ermanos. En prinsipio se topó delantre de una pared de difidensia i de espanto, i él tuvo de penar muncho para romperla. A poko a poko la chika komunitá empesó a enteresarse a lo ke estava diziéndoles el estranjero, i eyos empesaron a entender ke avían otros komo eyos en Portugal mizmo, i en otros kazales al lado de eyos, de los kualos inyoravan la existensia. Eyos empesaron a demandar al estranjero kualas eran la orasiones de los djudiós, kualos eran sus ritos relijiozos, ma nada no estava despertando sus rekordo. Ma kuando Schwartz resitó “Shemá Israel Adonay Elohenu, Adonay Ehad”, una mujer tuvo un sovresalto i disho: “Es de los muestros!”

Este fue el momento ezmoviente ke abatió la muraya entre eyos i los djudiós del mundo, i de akel punto la notisia ke existían deynda en el mundo los kritpodjudíos, izo el djiro del mundo. Munchos istoriadores, rabinos i jurnalistas de todo el mundo arivaron a Belmonte, kada uno kon un entereso diferente, para estudiar, avlar o mizmo azer tornar al djudaízmo la komunitá. La koza no fue fasil, porké eyos estavan deynda debasho el espanto de la Inkizisión, i bivían sospechando de todo.

Sólo en los últimos anyos eyos están despuestos a avlar, a kontar, a parte unos kuantos núkleos ke biven en las muntanyas de Belmonte. Los djóvenes se sienten atraídos por el djudaízmo, i algunos de eyos ya tornaron al djudaízmo ofisial.

El Rabino israeliano Josef Sebag de orijín marokana tiene un lugar muy emportante onde los djudiós de Belmonte. El fue mandado por la Adjensía Djudía al prinsipio del 1990, saviendo la lingua portugeza. Komo de fakto el lavoró 4 anyos en Brazil, komo shefe de relijión i edukasión. El Rishón Letsión de Israel apoyó la misión del Rav Sebag en Belmonte. Kuando él arivó ayá avían en Belmonte de 50 a 60 marranos entre los 20 a los 30 anyos, ke estavan enteresados a tornar al Djudaízmo.

Kon Sebag eyos arivaron a ser serka de 100. El provó a adresarse a las otras komunitás vizinas, ma de ayá dinguno no kijo aderir a su inisiativa.

El Estado de Israel dedikó a los djudiós ke tornaron al Djudaízmo una medalya, ande está eskrito: “Lo amut ki ehié kedey lesaper maasé Ya" (No muriré porké bivré para kontar las echas del Dio).

Los mas viejos no keren abandonar sus antikos ritos i sus orasiones, i muy raramente tornan al djudaízmo. Kuando entran a la eglisia eyos dizien algunas palavras al Dio de Israel, antes de empesar a resitar las orasiones kristianas: “No entro a este lugar/para adorar lenya o piedra/ma para venerar el Dio verdadero/ke mos giará por siempre”.




La esnoga: En Belmonte en la Rua de las Lajes avía un tiempo la esnoga - la sinagoga - ke después del baftizmo forsado de los djudiós en el siglo XVI fue transformada en eglisia. Sien anyos antes fue demolida. Nada no keda de todos estos evenimientos, a parte una inskripsión sovre una piedra , ke dize “Dios está en su sakro templo i todos estén kayados delantre de él”.

Ma agora ay un chiko kal en un chiko apartamento, ande el rabino vinido de Yerushaláyim, aze las orasiones en rito sefaradí. En el semeterio las tombas yevan todas enriva la kruz, i sólo los nombres revelan antikas orijines djudías. Ma en los últimos tiempos aparese i el magén David en lugar de la kruz.




El shabat i las Fiestas djudías:




Shabat: Viernes a la tadre, antes del tramonto del sol, los kriptodjudiós de Belmonte ensienden una lampa a azeyte a siete brasos, oy aviertamente enriva la meza, ma un tiempo eskondida en un vazo de barro, para ke la luz no se viera de afuera. El lumen era echo kon un pedasiko de lino krudo, embatizado en la azeyte-oliva, i metido adientro de un vazo de barro, komo durante la Inkizisión, para eskonder la flama de los ojos de los estranjeros. Eyos no pudían mirar las reglas del kasherut, a kavza de la Inkizisión, ma aprontavan la kumida de antes de shabat, i algunos de eyos no komían karne en shabat. Eyos rogavan tres vezes al día i tinían kantes spesiales ke kantavan en shabat. A la fin de shabat tinían una seremonía ande azían la santifikasión del vino i del pan.




Yom Kipur: El Día de Kipur vinía selebrado en una data diferente de la data abitual, para fuyir de la vijilansia de la Inkizisión, i vinía yamado “El Día Puro”, en el kual se azía un tanit (ayuno) de 24 oras. El pasto de kortar tanit vinía aprontado un día antes i no kontenía karne. La funksión de Yom Kipur enkluye orasiones spesiales.
Purim: Durante el mes ke presede Pésah los kriptodjudiós de Belmonte observan el tanit de la Reyna Ester, partiendo del kual se aprontan a Pésah, i de akel día no komen mas puerko. En onor de la reyna Ester eyos tienes unas kuantas orasiones.




Pésah - La “fiesta do espinheiro”: Durante Pésah los marranos se reunen al bodre del río debasho de los árvoles. (Video-Film "Out of Spain 1942 – Jerusalem which was in Spain" Part II). Del bodre de río eyos baten la agua kon un ramo de ulivo, para akodrar el pasaje de la Mar Kolorada, después baylan al derredor de un “espinheiro” - un zarzal de espinas, asta ke lo destruyen. Durante esta seremonía las mujeres kantan kantigas paskuales en portugés. Tienen un ermozo inmo sovre el pasaje de los djudiós de la Mar Kolorada. En el filmo “Les derniers marranes”, echo por el rejisor fransés Frédéric Brenner, se veyen las mujeres marranas de Belmonte, ke aprontan la masa para azer las masás, asentadas en basho i vistidas de largos shales blankos. La masás vinían kochas sovre una grande piedra muy ancha. Apenas el pan ázimo está kocho, eyos kantan kon alegría a Adonay i kontinúan kon kantes i imnos. Kuando la nochada se termina, kada uno toma kon sí el pan ázimo, para komerlo durante Pésah. Durante Pésah el ombre no deve durmir kon su mujer, i no deve bezarla. En jeneral eyos no lavoran i rogan munchas vezes al día.




El rolo de la mujer: Las mujeres marranas tramandaron en los siglos lo ke pudieron salvar de la relijión djudía. Serradas en sus kazas, en el mas ondo sekreto tramandaron oralmente las orasiones i los ritos, antes a los ijos i después a los inyetos, sin el ayudo de la Torá, livro defendido por la Inkizisión. Estas mujeres korajozas i fuertes fueron yamada en Portugal “rezadeiras judaicas” (las orantes djudías). Eyas bivieron, korriendo el períkolo kotidiano de vinir deskuviertas, sin renunsiar, pensando de ser los únikos djudiós eskampados de la Inkizisión. Esta sertitud no fue anulada ni por los ensenyamientos del rabino de Belmonte. Durante una lisión sovre Pésah, echa por el rabino Sebag, una mujer ansiana de Belmonte sostuvo kon obstinasión ke Moshé izo salir los djudiós de Ayifto durante la Inkizisión espanyola.

En la komunitá de Belmonte ay mujeres ke saven resitar orasiones de kavesa. Estas orasiones enkluyen partes del ritual djudió uzado ayá, i pasajes del ritual katóliko, echo de prieras i bindisiones.




Uzos

Algunos marranos de Belmonte revelan sus identidad a 5 o 6 anyos, i los ijikos saven la verdá i no revelan el sekreto. A mueve anyos ya azen el tanit de Kipur, ke eyos yaman “la grande fiesta”. Resientemente los djudiós de Belmonte azen serkusir a sus ijos, ma ay munchos ke preferan, sigún la vieja tradisión, de ir a un boske i kortar la sima de un determinado árvol. Akodraremos a Anton Diego Rodrigo, ke fue uno de los primeros en Belmonte a tornar al Djudaízmo. El se izo serkusir a 79 anyos i frekuentó la sinagoga asta su muerte. Sus ijas Mercedes i Ana Melia deynda resitan en su memoria orasiones, sigún sus antika tradisión. Kuando las ijas tienen 14 o 15 anyos los djenitores ya les keren topar marido. El matrimonio viene negosiado de antes por los djenitores de la futura novia, i kuando viene konsumado no se puede dezazer.

La ija keda virjen asta el matrimonio. El divorsio es defendido en kuples marranos, i permetido sólo en kuples mikstos. La mujer onora el marido i le es fiyel asta la muerte. Kuando una persona está para murir, todos sus parientes se reunen a su kavesera. Al gosés le vinían kortadas las unyas de las manos i de los piezes i un maso de kaveyos. Los metían, endjuntos a una moneda de oro, adientro de un papel, i lo amostravan al muriente. Apenas la persona muría, le metían este paketiko adientro de la boka. Munchos predjudisios nasieron de este uzo, ke se kumplía al pareser para empidir al papáz de dar al muriente la ekstrema unsión.

Nombres komunes para ombres son: Moisés, Elías, Tobías, Rafael, Diogo. Nombres komunes para mujeres son: Ester, Eliasa, Judith. Las mas komunes alkunyas son: Morao, Susa, Hernriques, Pereira, Caetano, Vaz, Rodrigues, Mendes.




Lavoro

Los kriptodjudiós de Belmonte son muy ambisiozos i akorruto son esklavos de sus lavoro. Salen la demanyana presto el echo i tornan a kaza tadre. Eyos edukan a sus ijos de la chikés al lavoro duro, porké kreyen ke el lavoro sea una koza muy pozitiva. El dinero es para eyos una koza nesesaria para bivir i no lo gastan en kozas de plazer. Mizmo si uno es muy riko, lavora todo el tiempo, porké esto “es lo ke komanda el Dio al mundo”.

Las relasiones kon los otros abitantes en Belmonte son buenas, ma eyos biven en el espanto de vinir deskuviertos komo djudiós. En jeneral biven bien, oy en ermozas kazas en las mijores partes del kazal, ma un tiempo en un viejo kartié yamado “Marrocos”. Eyos tienen la inklinasión djudía a los echos. La mas grande parte de la komunitá aze vistidos en chikas industrias i los venden en los merkados.

Algunos de eyos kontinúan el komersio de kueros i de spesias. Los mas mazalozos se okupavan de karnes de kuzí i de barvez. Komo se okupavan de kueros, el kartié ande bivían se yamava “Conceria”.

Asta el 1940 eyos bivieron en proves kondisiones. De este periodo eyos empesaron a vender ropas de las fábrikas de Manteigas i Covilhã en los merkados i las fuares. Del 1950 empesaron a uzar los otomobiles, i se dezvelopó la industria de los pantalones. Un poko después del 1960 Abilio Morao Henriques, konosido en manera internasional komo el lider de los djudiós de Belmonte, i Rafael Mendes Morao, tuvieron unos kuantos shastres de pantalones i avrieron este komersio enfloresiente. Otros kriptodjudiós de Belmente sigieron kon sukseso sus exemplo.

Del 1970 las kondisiones fiansiarias de la komunitá mijorearon. Del 1974 eyas trokaron radikalmente kon konstruksión de kazas muevas, akizisión de otós, frekuentasión de kafés i otros lugares de entretenimiento.

En muestros días Howard Abarbanel de la kaza Abarbanel produse endjuntos a Dom Duarte Pio HRH Duke de Bragansa, eredor del trono portugés i la Adega da Covilhã, una de las mas altas kazas viníkolas de Portugal, el primer vino kasher produkto en Portugal después 500 anyos de la ekspulsión de los djudiós del paíz. Este vino se yama “Terras de Belmonte”. En el 2001 el padre de Howard, Herbert prezentó al Duke una medalya de plata kon la menorá en una seremonía spesial en la “American Sephardi Federation” de New York.




El muzeo de Belmonte

Al lado del kastiyo, transformado en fortereza en el siglo 15 por la famiya de Pedro Alvares Cabral, el deskuvridor de la Amérika del Sud, ande él mizmo nasió, está el viejo kartié djudió. Ayá moran deynda oy unas kuantas dozenas de djudiós, ke reprezentan la mas grande komunitá djudía en Portugal. Ay ayá una sinagoga moderna i un chiko Museo Djudió. Este muzeo está divizado en tres partes, ke kontienen kozas atadas al Djudaízmo. La primera es el rekolio de objetos personales de famiyas kriptodjudías, una parte de las kualas es de la famiya del prof. Adriano Vasco Rodrigues i la famiya de su mujer Carquejas. Son objetos de entereso kapital de antes i después de la Inkizisión, komo una primitiva mezuzá entayada en el lenyo, ke se puede yevar en la aldukera. Emportante es i el katálogo, endispensable a entender los objetos ekspozados. La sigunda parte kontiene monedas de Yerushaláyim del tiempo romano, una piedra tombal de akel periodo kon una menorá gravada enriva, la reproduksión sovre piedra de una sinagoga del 13en siglo.

La tresera parte, i la mas ezmoviente, es una enorme plaka de piedra preta, ande están gravados todos los nombres de las víktimas de la Inkizisión de la rejión de Belmonte.

En el muzeo ay otros aspektos de Judaika. Ay un auditorium, un chiko sentro de estudios djudiós a nombre del prof. Rodrigues. El muzeo fue fondado i es finansiado por no-djudiós, atados al “Tourism Board” en Portugal.



Tradisión muzikal

Los marranos de Belmonte tienen una tradisión propia de kantes litúrjikos, avlando siempre de las palavras. En kuanto a la múzika, la muzikologa djudía kanadeza Dr. Judith Cohen, ke estuvo ayá i envestigó sus muzika, dize ke no tienen una tradisión muzikal suya, a parte dos o tres kansiones ke no son muy antikas. La palavra ke rekorre en sus kantes es “Adonay”. A parte de esto, el idioma utilizado no define una kansión o una orasión komo djudía. En el livro de David Augusto Canelo se topan las palavras de munchos kantes en portugés. En el livro de Samuel Schwatz, The New-Christian in Portugal in the 20th Century, se topan munchas orasiones de los kristianos muevos. La lingua es el portugés i la traduksión al ebreo. Un exemplo de estas orasiones es el kántiko de Paskua Adonai u Senhor meu, ke topamos en el C.D. ke akompanya el livro de Liliana Treves Alcalay Melodie di un esilio, i es kantando por la autora mizma del livro.


El siyo de Sorin


Por terminar kero traer un kavzo atado a Belmonte, ke me toka personalmente, i ke deskuvrí durante mi envestigasión. Meldando el artíkolo Les Juifs au Portugal aujourd`hui, de Michael Studemund-Halévy, enkontrí el nombre de Samuel Sorin, ke konosió muy bien los kriptodjudiós de Belmonte. Samuel Sorin, de bendicha memoria, era el padre de mi kunyada Dina Sorin Cohen, i fue el prezidente de la komunitá ashkenazía de Lisbona. Apenas meldí esto, telefoní a mi kunyada, para verifikar la koza, i eya me lo konfirmó i me kontó el sigiente kuento verdadero.

Samuel Sorin vinía de la Rusia, de una sivdad de nombre Luna, i su padre se yamava Tzví. El komersiava en diamantes i mandava paketos de diamantes por posta. Para sijilarlos izo azer un siyo kon enriva una luna, una kavesa de siervo i un Séfer Torá, i su nombre, i lo uzava kontinuamente. Kuando deshó el Portugal en el 1943, a kavza de las persekusiones, i se fue a New York, no topó mas su siyo. Pasaron anyos i un día un suvrino suyo, Avraham Sorin, ke kontinuó el komersio familiar de diamantes en Lisbona, se topó en Belmonte en una butika de antikidades, a la kuala avía mandado chikos diamantes. El vendedor le disho: “Tú no sos un Sorin?” A su repuesta afirmativa, el vendedor kitó afuera un kutí kon adientro el siyo de Samuel Sorin, ke estava por anyos ande él. Avraham Sorin tomó el siyo, lo konservó and`él i lo trusho a Israel 16 anyos antes, kuando vino a la boda de Ilana Cohen, ija de Dina Sorin Cohen, su suvrina i mi kunyada, i se lo dio atrás. I agora el siyo está and` eya. Ansí ke el sírkolo se serró.



Bibliografía:



BRENNER F., Les derniers marranes, Film documentario 1990.

CANELO D. A., The Last Crypto-Jews of Portugal, IJS 1990, Rabbi Joshua Stampfer, Introduction paj. VII-XVII.

CORDEIRO H. D., Judaica No. 007, 1997, Joseph Sebag: Missões a Portugal e Brasil

NAVON Y., Out of Spain 1492 – Jerusalem which was in Spain,Part II, Israel Broadcasting Authority- Israel Television, 1992.

SCHWARTZ S. The New-Christian in Portugal in the 20th Century, Merkaz Dinur, Merkaz Shazar, Yerushaláyim, 5765, 2005.

STEINHARD I., Captain Barros Basto, The Apostle of the Marranos, Internet 1998.

STUDEMUND-HALEVY M., Les Juifs au Portugal aujourd`hui, Rahmani 2000, Internet.

TREVES ALCALAY L., Melodie di un esilio, Giuntina, Firenze 2000.

                                                                                                                                                                            
 


+ Añadir nuevo comentario
Traducciones enviadas por usted
Loading Cargando ...
+ Enviar Comentarios

לאדינו         Ladino


Artikolos de Matilda Koen Serano
      
Artikolos de Yehuda Hatsvi
    
Artikolos de Gad Nassi
  
Artikolos de Eliezer Papo
   
Sefaradi Taor

ladino
Fecha y hora