ladino  

 
Judeo espanyol
Contador:

Inicio >> ARTIKOLOS >> Gad Nassi >> EL BATALYON DJUDIO EN LA REVOLUSION DE LOS TURKOS DJOVENOS
 

EL BATALYON DJUDIO EN LA REVOLUSION DE LOS TURKOS DJOVENOS

Gad Nassi


 

La revolusion de los Turkos Djovenos ke tuvo lugar al empesijo del siglo pasado, fue un evenimiento desizivo para el avenir politiko de la Turkia. Esta revolusion metio fin al reyno despotiko del Sultan AbdulHamit II i deklansho un proseso de demokratizasion i de progresivizmo.
En este konteksto, un fakto signifikante para la istoria djudia, fue la egzistensia de un batalyon formado por soldados djudios, ke partisipo aktivamente a esta revolusion en gerreando kontra las fuersas partizanes de AbdulHamit. Este fakto ke no topo la ekspresion 
meresida en muestra istoria fue notado en un artikolo eskrito por el segundo prezidente de Israel, el Sr. Yitshak Ben Zvi.(*)
En Djulio 1908, basho la presion de los 
Parada militara en Saloniko. Empesijo del siglo XX
Turkos Djovenos apoyados por la armada, se avia eskojido un parlamento i fue formado un governo konstitusional. Ma este dezvelopamiento no trusho los  rezultados dezeados en la shena politika i sosiala. La atmosfera de libertad favorizo la ekspresion de un fanatizmo relijiozo islamiko, kontrario a la ideolojia progresista de la Revolusion. En April 1909 esbrocho una sangriente rebelion kontra la mueva Konstitusion. Segun el Sr. Ben Zvi, durante esta rebelion el deputado Şekip Arslan fue asasinado por yerro, en lugar del jurnalisto Huseyin Cahid Yalçin ke unos kuantos dias antes avia publikado un artikolo en favor del Sionizmo.
Una fuersa militara yamada "Hareket Ordusu" (Armada de Aksion) fue organizada en Saloniko kon el buto de reprimir a esta rebelion. Esta fuersa komandada por Mahmud Şevket, arivo a Estambol i, sovre la yamada del parlamento, metio fin a la rebelion i al reyno de AbdulHamit II. AbdulHamit fue egzilado a Saloniko i internado en la Villa Alatini, ke avia apartenido a una de las mas rikas famiyas djudias de esta sivdad.
En esta armada, egzistio un batalyon de volontarios djudios de Saloniko i de los kazales de Trakya i Makedonia. Konosido entanto ke "Musevi Taburu" (Batalyon Djudio), este batalyon tomo una parte aktiva en los kombates en las kayes de Estambol kontra las fuersas regresistas.
La Armada de Aksion
En su artikolo el Sr. Ben Zvi se refera a las informasiones de dos de los kombatientes de este batalyon, ShemTov Revah i  Avraam BenAroya:
"...Entrimos a la kapitala despues de unos kuantos kombates entre los prinsipales rejimentos. El Batalyon Djudio formado de 700 soldados era komandado por Kazim Bey. Adelantimos verso Taksim por tres kaminos i mos enkontrimos kon el enemigo. Tuvimos 23 feridos i 21 de muestros soldados kayeron, entre eyos Termin i Beja z"I."
Soldados de la Armada de Aksion kon uno de sus
komendantes, despues de sus viktoria, delantre de la
kazerna en Taksim, ande el Batayon Djudio avia gerreado

 
En dos korespondensias publikadas en el jurnal Jewish Chronicle de Londra, la primera del 16.4.1909 i la segunda del 21.5.1909, se melda ke:
"...En la parada organizada por el Klub Djudio de Salonika, ofisieres de la armada turka rengrasiaron a los djudios al nombre de la armada, por sus ayudo en moneda i en sangre a la Revolusion ke libero la nasion de la tirania..."
"En la vijita del Gran Rabino al komandante de la Armada de Aksion, Mahmud Şevket Pasha, i al ministro de la gerra, Salih Pasha, los dos jenerales rengrasiaron al nombre de la armada a los djudios del Imperio i en partikular a los djudios de Saloniko, por la parte ke tomaron en el Movimiento de Liberasion i por sus apoyo a la armada."

El Batalyon Djudio fue de kurta vida. El fue fondado para atabafar la rebelion de los fanatikos islamistos kontra el progreso i la libertad i para detronar el Sultan.
. Despues ke estos butos fueron alkansados el se disperso, ma unos kuantos de sus miembros entraron a la Akademia Militara i kontinuaron en sus kariera en el kuadro de la armada. Uno de eyos es el Sr. ShemTov Revah ke sus memorias kontribuyeron a la dokumentasion de este evenimiento.
La revolusion de los Djovenes Turkos es uno de los mas importantes kapitolos en la istoria de los Balkanes i del Oriente Medio. A su baza se topa la ideolojia de la Komitad de Union i Progreso, ke sus partizanes fueron yamados "Los Turkos Djovenos".
Soldados djudios en la Armada Otomana, durante la Primera Gerra Mondiala
Raros son en la istoria evenimientos komo esta revolusion sovre la kuala fueron investidas tantas esperansas i ke en segito provokaron tantas desepsiones. El Progreso ya vino ma, la Union se dezmiembro achakes de las aspirasiones separatistas de diversas nasiones ke bivian entonses basho la supremasia otomana. Ansi empeso para la Turkia una epoka de gerras i dezgrasias ke se termino kon la fondasion por Kemal Ataturk de la Republika Turka.
Del punto de vista sionista el Batalyon Djudio fue un paso verso una fuersa militara djudia. No mos olvidemos ke una de las konsekuensas de la revolusion de los Turkos Djovenos fue el enfuertesimiento de la kolonizasion djudia en Erets Israel, motivada por la ideolojia sionista. Es de regretar ke la egzistensia del Batalyon Djudio i su rolo no toparon asta oy una ekspresion meresida en muestra istoria.
Un testimonio konkreto de este evenimiento es la marsha militara kompozada a esta okazion, kantada por los volontarios del batalyon, i de la kuala trayemos aki el teksto.
 
(*) Ben Zvi Yitzhak. Gdud Yeudi beMaapehat "aTurkim aTseirim" en Zihron Saloniki. Gedulata veHurbana she! Yerushalayim deBa Red. Avraam Rekanati, II, 88-90. Ed. aVaad leOtsaat Sefer Keilat Saloniki. Tel Aviv, 1984.
 

Marsha Militara
del Batalyon Djudio

 
Mansevos de los kazales i
Munchos de Salonik
Nos izimos volontarios
Nos fuimos al askerlik o la
Libertad se va azer o
Nuestra sangre va korrer
Por amor de la Turkia

Turkos, djudios i kristianos
Todos otomanos mos tomimos
De las manos djurimos
De ser ermanos
Para Estambol vamos
A partir kon los malos vamos a
Kombatir para salvar a la Turkia

Nuestras butikas serrimos
Nuestros echos abandonimos
Kon parientes nos bezimos
Kon amigos nos abrasimos
A la armada nos entregimos
A la muerte nos metimos
Fara salvar a la Turkia

Nuestras madres nos bezaron
Kon amargura yoraron
Nuestros padres esklamaron
Al Dio Santo le rogaron
Ke nos aga siempre piadad
Si penamos por la libertad
Es para salvar a la Turkia

Mujeres i kreaturas
Deshimos en la sivdad
Sin ningun mantenimiento
I kaje en la eskuridad
Si izimos esta krueldad
Fue para salvar la libertad
Para salvar a la Turkia

Mansevos de los kazales i
Munchos de Salonik
Nos izimos volontarios
Nos fuimos al askerlik o la
Libertad se va azer o
Nuestra sangre va korrer
Por amor de la Turkia

Turkos, djudios i kristianos
Todos otomanos mos tomimos
De las manos djurimos
De ser ermanos
Para Estambol vamos
A partir kon los malos vamos a
Kombatir para salvar a la Turkia

Nuestras butikas serrimos
Nuestros echos abandonimos
Kon parientes nos bezimos
Kon amigos nos abrasimos
A la armada nos entregimos
A la muerte nos metimos
Fara salvar a la Turkia

Nuestras madres nos bezaron
Kon amargura yoraron
Nuestros padres esklamaron
Al Dio Santo le rogaron
Ke nos aga siempre piadad
Si penamos por la libertad
Es para salvar a la Turkia

Mujeres i kreaturas
Deshimos en la sivdad
Sin ningun mantenimiento
I kaje en la eskuridad
Si izimos esta krueldad
Fue para salvar la libertad
Para salvar a la Turkia

Kon ayudo del Dio
En kamino mos metimos
Munchas oras kaminimos
En el komer no pensimos
A Estambol arivimos
La sivdad la blokimos
Para salvar a la Turkia

Niyazi Bey i su partido
Munchos anyos penaron
Kon ayudo del Dio
Sus eskopo alkansaron
Al rey viejo abasharon i presto
Nominaron al rey djusto en la Turkia

                                                                                                                                                                            
 


+ Añadir nuevo comentario
Traducciones enviadas por usted
Loading Cargando ...
+ Enviar Comentarios
+ Enviar contenidos sugeridos

לאדינו         Ladino


Artikolos de Matilda Koen Serano
      
Artikolos de Yehuda Hatsvi
    
Artikolos de Gad Nassi
  
Artikolos de Eliezer Papo
   
Sefaradi Taor

ladino
Fecha y hora
 

La Asosiasion Arkadash | Ladino | לאדינו | judeo espanyol |

אתר זה הוקם ע"י זום ייעוץ ומערכות מידע