ladino  

 
Judeo espanyol
Contador:

Inicio >> ARTIKOLOS >> Yehuda Hatsvi >> El Rothshild de Yerushalayim
 

"El Rothshild de Yerushalayim"  / Yehuda Hatsvi



Antes unos kuantos mezes, tomo lugar en Tel Aviv una ekspozision dedikada
a la Banka de Valero (la primera banka fondada en Erets Yisrael).
Si komo yo no tengo mucho dar i aver kon dokumentos viejos de bankas, me interesa mas a kontarvos sovre la djente, los pioneros ke establesieron esta banka.

Yaakov Valero, un simple Shohet, nasido en Istanbul, desidio en el anyo 1835
a partir de su pais natal i instalarse en Yerushalaim.
En el livro "Judios del Oriente en Erets Yisrael" eskrive el autor M.D. Gaon, ke Yaakov Valero es desendiente de Rabi Shemuel Valerio, un mediko i haham de Italia, ke un sierto tiempo era el rabino de Morea (Peloponeso).      Shemuel Valerio eskrivio dos livros de Ley (en ebreo), i en sus ultimos anyos bivio en Yerushalayim. Aki murio en 1760.


Tengo mi duda si esta informasion es korrekta: No solamente por ke ay una diferensia chika entre los nombres Valerio i Valero; ma tambien porke no se topa ningun "Arvol de Geneaolojia" kontinuo desde akel Haham de Morea asta el Shohet de Istanbul.
Para mi, personalmente, Yaakov Valero es bien apropriado de komensar su propia dinastia.

En 1848, tuvo Yaakov Valero la inisiativa de azer haveransa kon Haim Amzaleg (judio, orijinario de Gibraltar), i kon un ermeni yamado Yaakov Paskal, ke era el tradjuman del konsulato de Austria. Este kondjunto de tres, fondo en akel anyo a la Banka Valero.
La banka de Valero empeso a funksionar en Yerushalayim, ma no pasaron
muchos anyos, i na ke se avrieron sukursalas en Yafo i tambien en Damasko.
El direktor de la sukursal en Damasko fue Shemaya Andjel.


Haim-Aaron Valero (1845-1923), el ijo de Yaakov, empeso a lavorar en la banka a la edad de 15 anyos. Es inkreivle komo parvino este manseviko a adkerir un gran konosemiento del negosyo bankario i en la ekonomia del pais, tambien dominar las sinko lenguas mas importantes en akea epoka:
fransez, turko, arabo, ladino i ebreo.
En el anyo 1880, Haim-Aaron fue nominado el direktor-jeneral de la banka Valero. Basho su administrasion, la banka a evolusionado a pasos djigantes.

En muestra lingua tenemos una dicha un pokito sarkastika:                      "Ande ay mamon ay kavod". Ma a mi me parese ke no solamente por su rikeza, fue Haim-Aaron Valero, el bankero, elijido a ser el shef del "Komite de la Comunidad Sefaradi".
Desde el anyo 1840, el Komite era dirijido por el haham bashi sefaradi, i en realidad, era el reprezentante ofisial de los judios de Yerushalayim kon las autoridades otomanas del pais. Haim Valero okupo este posto importante durante los anyos 1880-1912, aun ke no yevava el titolo de Rabino.

Djunto kon el dezvelopamiento,  la banka Valero rendiya servisio finansiero al governo otomano, a konsulatos, iglesias i organizasiones de karidad (sedaka). En akea epoka, la situasion ekonomika era muy mala en Yerushalayim. Toda ayuda finansiera, i donasiones resividos de buenos judios en Evropa para la provaya de la sivdad, pasava mezo la Banka Valero.

Varyos imperios eran de interes para amplifikar sus influensia en Yerushalayim. Por egzempio, el governo imperial de Rusia merko en 1860 un tereno grande, fraguaron aya iglesya, ospital, i tambien una kaza bien impresionante para el konsolo ruso. La Banka Valero partisipava en todas fazas de la kompra i la konstruksion de las binas.

Ayinda mas, la banka Valero asistio i ayudo a los reprezentantes del Imperio Austro-Hungaro en todos sus echos i proyektos en Erets Yisrael. Uno de estos proyektos fue la "Posta Austriaka", renomada por sus ekselentes servisios postales. La "Posta Austriaka" empeso a funksionar en 1852, i era tan esensial para el komersio del pais.

A la okazion de la inaugurasion del Kanal de Suez en Novembre 1869, vino Franz Josef I, el imperador, a vijitar en Yerushalayim tambien, i inauguro el ostel ke fraguaron en la sivdad para los pelegrinos a la Tierra Santa.
Esta vijita istorika era la primera vijita de governador de pais kristiano desde las Kruzadas.
En 1881 se enkontro Haim Valero kon el princhipe austriako Rudolf en su vijita en Yerushalaim, i resivio la Medalia de Onor.

La estoria del siglo 19, mos konta en detalyos sovre el enorme apoyo ke konsedio el Baron Edmond de Rothschild a las kolonias judias en Erets- Yisrael. Muchas tranzaksiones, pagamientos i kontribusiones pasaron por la banka de Valero.

Otro renomado filantropo de akea epoka fue el Sir Moshe Montefiore ke kontribuo mucho de su tiempo i de su fortuna para ayudar a la komunidad judia de Erets Yisrael en jeneral, i de Yerushalayim en prtikolar.
Afilu en estando en su edad de 90 anyos, (en 1874), el aparto una grande suma en la banka Valero para fraguar kazas para los judios en Yerushalayim.
Kon estas paras se konstruyo el kuartier yamado "Mazkeret Moshe" i despues otros kuatro kuartieres (todos eyos yevando de una manera u otra su nombre "Moshe")...

Otro un paso mas adelantre, en el kamino a la modernizasion del pais, fue el proyekto del treno. Grasias a un emprestimo grande de parte de la banka Valero, se estreno (en 1892) el servisio de treno de Yaffo a Yerushalayim.
Ma, aparte de emprestimos i de inisiativas ekonomikas, Haim-Aaron Valero
era un filantropo jenoroso. Siempre era atento a las nesesidades de la komunidad. Entre muchas donasiones i kontribusyones, mensionare aki ke en 1908 el dediko un tereno de 8 dunam (donum) para konstruir aya una kaza de viejos ("bet-avot").
Dunke, no es de maraviyar ke el publiko lo yamava kon karinyo                     "El Rothschild de Yerushalayim".


En 1915, en los primeros mezes de la Primera Gerra Mundial, la banka Valero desho de funksionar, i serro.sus puertas.






 

                                                                                                                                                                            
 


+ Añadir nuevo comentario
Traducciones enviadas por usted
Loading Cargando ...
+ Enviar Comentarios

לאדינו         Ladino


Artikolos de Matilda Koen Serano
      
Artikolos de Yehuda Hatsvi
    
Artikolos de Gad Nassi
  
Artikolos de Eliezer Papo
   
Sefaradi Taor

ladino
Fecha y hora
 

La Asosiasion Arkadash | Ladino | לאדינו | judeo espanyol |

אתר זה הוקם ע"י זום ייעוץ ומערכות מידע