ladino  

 
Judeo espanyol
Contador:

Inicio >> ARTIKOLOS >> Yehuda Hatsvi >> Entre LEH LEHA i VAYERA
 

Entre LEH LEHA i VAYERA

En la perasha de esta semana mos deskuvre la Tora las raizes de la fe djudia. El Kriador elije una sola famiya, de todas famiyas de la tierra, para imponer sovre eya la mision de dar al mundo a konoser la idea del monoteizmo.

El Dio manda a Avram, un sivdadino de Ur-Kasdim, de deshar su pais, su parentela, i la kaza de su padre, i ir "a la tierra ke te amostrare".

Ademas, el Dio apromete a Avram:
"I are de ti una nasion grande, i te bendizere i engrandesere tu nombre, i seras bendision.... i seran bendichas en ti todas las famiyas de la tierra".

Avram kumplio el mandamiento del Dio, i vino a instalarse en la tierra de Kenaan.
Despues de tiempo, troko el Dio los nombres de Avram, i de Saray su mujer, a Avraam i Sara; i establesio kon Avraham un pakto perpetuo:
"I te dare a ti i a tu desendensia despues de ti......toda la tierra de Kenaan en eredad para siempre".

En el Talmud topamos eskrito (en nombre de Rabi Yitzhak):                   
"Kuatro kozas razgan i baldan la sentensia del benadam,
i estas son: la Sedaka, el klamor, trokamiento de nombre,
trokamiento de aktos; i ay kien dize ke tambien trokar de lugar".

Si egzaminamos bien el modelo de Avraam, vemos ke el
trokamiento de nombre no es tan simple i tekniko komo
uzar a vezes algun otro nombre en muestro adreso elektroniko.

Trokamiento de nombre tiene de ser akompanyado kon
elevasion de muestra personalidad i muestra vokasion.          
Lo mismo okurre kon el pasar de un lugar,(pais o sivdad),
al otro.  Es solo kon aver aya un buen buto, ke avra i posibilidad de mijorar el destino i lograr la buena suerte.

Akel ombre kaje anonimo, Avram de Ur Kasdim,
parvino a ser Avraam Avinu, el padre de muestra nasion.

          


Despues del deluvio (Mabul), se muchiguo la populasyon del mundo i se formaron puevlos i lenguas diferentes. Agora vino el tiempo en el kual eskojo el Dio a una persona ke de su semen naska el puevlo ke Adonay es su Dio.



La perasha empesa kon las palavras del Dio a Avram:
"Vate de tu tierra i de tu parentela, i de la kaza de tu padre, a la tierra ke te amostrare; i te are por una nasyon grande, i te bendizere".

Aki, kon Avram Avinu (Avram muestro padre) empesa la estoria de muestro puevlo.

Los komentadores de la Tora (sierto por sus razones) preferan de "no meter tino" o de saltar i pasar adelantre, de los ultimos pesukim de la perasha de Noah (la perasha de la semana pasada).
Ayi meldamos, ke en realidad, ya era de kuando la intensyon
de Terah (el padre de Avram) de salir kon su famiya de Ur-Kasdim su paiz, i de imigrar a la tierra de Kenaan:

"I tomo Terah a Avram su ijo.....i salyeron de Ur Kasdim
para ir a la tierra de Kenaan...i vinyeron asta Haran, i moraron
ayi....i muryo Terah en Haran".

Me parese ke si la Tora mos eskrivyo este fato, no es para nyegarlo, sino por aprovar de eksplikarlo.
Mi simple Perush es ke el mandamiento del Dio a Avram
fue de deshar detras de el su tierra i su paiz, ma no solamente
fizikamente, sino de abandonar i anular enteramente las
kostumbres i las kreensas paganas de los Kaldeos.

El Dio le disho a Avram:  "Vate.....a la tierra ke te mostrare".
Vos demando agora, es ke no supo Avram el  kamino para irse a Kenaan??
Ma, mostrar aviya de mostrar a Avram la tierra i la Ley
ke el semen de Avram tyene de eredar.




En la perasha de Leh Leha meldamos komo eskojo el Dio a Avram,  porke topo el korason de Avram fiel delante de El;  le troko su nombre a Avraam, i izo pakto kon el para darle la tierra de Kenaan, eredad a su semen.

En un kapitolo kurto mos konta la Tora tambien por una batalia en la kual tuvo Avraam de gerrear por salvar a Lot su sovrino. Esta fue una gerra muy djustifikada porke su uniko buto era de salvar vidas.

La aftara de esta semana (Yeshayau 40-41)
es akseptada por todas las keilot.

Muestros savios disheron ke el pasuk en la aftara ke avla por venser a los enemigos, es antes de todo en referensya a la gerra en la kual gano Avram, kon el ayudo del Dio. Ansi dize el pasuk (41, 2): "Lo izo podestar sovre reyes; los dyo komo el polvo a su espada, komo paja empushada a su arko".                                            
En realidad, la profesia de Yeshayau, ke es la aftara de esta semana, se disho en un tiempo de dezesperasion del puevlo: kon la primera "Aliya" de Babilonya, para fraguar el  Bet aMikdash el segundo, vinyeron a la tierra de Yisrael apenas 50000 Jidyos, i las esperansas no eran altas.                                                           Entonses, Yeshayau el profeta dize al puevlo:
"Ma tu, Yisrael, mi siervo Yaakov, a kyen eskoji, semen
de Avraam mi amigo......no temas, porke Yo so kontigo".

Muestros hahamim dizen ke las profesias de Yeshayau ke en la aftara kedaron por el futuro, porke el puevlo en akeya epoka no kumplio su dover de venir todos auna a fraguar al templo.

Tal vez devemos todos mozotros de kumplir en primero de todo a el pasuk:
"Kada kual ayudara a su kompanyero, i a su ermano dizira: esfuersate!" (Yeshayau 41,6).






VAYERA      וירא 
Me da pena meldar en la perasha de Vayera
por lo ke akontesio a Avraam Avinu, kayendo en el mismo yerro una vez detras de la otra.

En la perasha de Leh Leha meldimos ke kuando estava Avraam para entrar en Ayifto, disho a Sara su mujer:
" .....Ya se ke eres mujer ermoza de vista; i sera ke kuando te veran los ejipsyanos, diran: esta es su mujer; i me mataran a mi....dunke, di, te rogo, ke eres mi ermana, para ke sea bien a mi, i biva mi alma por tu kavza".

En realidad, este konsejo no fue de nada bueno, i rezulto ke Sara fue tomada a kaza de Paro, djustamente por no saver ke tala mujer ermoza era mujer kazada.

En konsekuensa, el Dio firio a Paro i a su kaza kon grande yagas por kavza de Sara, la mujer de Avraam; ansi ke Sara fue retornada a Avraam, i los dos, djuntos kon todos sus bienes, vinyeron a morar a la tierra del Negev.

Pekado, ke egzaktamente lo mismo okurio i en este pais kon Avimeleh, el rey de Grar, el kual embiyo i tomo a Sara....
Una vez mas, fue porke disho Avraam de Sara su mujer -  "Es mi ermana !".
Ma, el Dio vino a Avimeleh en suenios de noche, i le disho:
- "Ek, muerto eres a kavza de la mujer ke aves tomado, la kual es kazada kon marido".

El doble yerro de Avraam, mos empusha a pensar ke kada benadam tyene de kuidar i tomar lision de su yerro, i non repetirlo.

Ma, el prinsipal en muestra perasha es el tema de la Djustisia Divina.

Avimeleh (en su suenio) le disho al Dio:

- "Adonay, mataras tambien al inosente?
Avraam me avia dicho: mi ermana es.
Kon limpieza de mis palmas ize esto".

Una diskusion semejante kon el Dio, i kon mucho mas de fortaleza, topamos en las palavras de Avraam, rogando al Dio de no destruir a la sivdad de Sedom:

" - ? Destruiras tambien al djusto kon el malo?... .Kisas ay sinkuenta djustos adientro de la sivdad....? destruiras tambien i no perdonaras al lugar por amor de los sinkuenta djustos ke esten aya?  Leshos de ti el azer tal..... El djuez de toda la tierra no ara djuisyo"?.

Avraam mantuvo una larga diskusion kon el Dio en este tema.
Ma, de la otra parte, en un otro evenimiento, ke akontesio despues de estas kozas, oyo Avraam el orden del Dio:

- "Toma agora a tu ijo...a Yitzhak...i alsalo ayi por alsasion sovre uno de los montes ke yo te dire".

Avraam no ezito ni un momento, i madrugo a kumplir a este orden (aun ke, en realidad, este mandamiento paresiya a prima vista una anulasion del pakto ke avia echo el Dio kon Avraam:
"En Yitzhak te sera yamada desendensia")...

La kreensa de Avraam en el Dio fue kompleta i inkondisionala !


La perasha de Vayera empesa kon el pasuk:
"I se le aparesyo Adonay en Alone-Mamre; i el (Avraam) estava asentado a la puerta de la tyenda, al kalor del dia".

Rabi Hama, ijo de Hanina disho, ke akel dia fue el treser dia despues ke Avraam fue sirkunsidado (a la edad de 99 anyos), i el Dio vino a preguntar por su salud.
Aun ke es derush (o lejenda), de aki disheron muestros hahamim ke es un grande zehut de azer Bikur Holim (vijita de enfermos).

l  na, ke el segundo pasuk de la perasha ya mos konta ke "Also Avraam sus ojos, i miro, i ek, tres varones estavan serka de el; i kuando los vido, korrio Avraam a resivirlos de la puerta de la tyenda".

Segun se entyende aki, es ke desho Avraam a la Shehina  (la prezensya divina), i korrio a resivir a los musafires deskonosidos.      Ke manera!!?
Aun ke a mi me parese bastante egzajerado, mos ensenyan muestros hahamim ke "Mayor (grande) es la mitsva de la ospitalidad ke el resivir la Shehina".

La tradisyon mos dize ke Avraam tiniya su tyenda avyerta a todas kuatro partes del mundo, i tiniya el kargo i el plazer de resivir, kuidar i onorar a forasteros ke pasavan por ayi, kansados del kamino.

La perasha de Vayera esta yena kon akontesimyentos enteresantes i dramatikos.
En realidad, el livro entero de Genesis (Bereshit) es una saga grande ke mos konta por los padres de muestro puevlo, las relasyones entre sus famiyas, vezinos, amigos i enemigos.
La Tora deskrive a muestros padres egzaktamente komo son: Basar Vadam ("karne i gueso"), seres umanos, ombres i mujeres.   La Tora mos konta por la virtud de muestros padres, ma en el mizmo tiempo mos deskuvre kon frankeza sus yerros i sus faltas, asta sus pekados.

Aun ke el Dio "save los pensamyentos del ombre"  i "preva los riniones i el korason", El izo prevar a Avraam Avinu no-manko de diez prevas fuertes.
La ultima de eyas fue kuando le disho el Dio:
"Toma agora a tu ijo, tu uniko, ke amas, a Yitzhak......                    i alsalo/ofreselo por alsasyion sovre uno de los montes..."

El Midrash Tanhuma dize ke a los djarros o atuendos defektuozos no ay nada mas de egzaminar i de prevar.
Ansi tambien dize el rey David (Teilim 11):
"Adonay preva al djusto".

Rabi Ovadia Sforno (de Italia) dize ke el buto/eskopo
de las prevas es por kitar i ver en aksyon i en realidad
los meritos i las kalidades ke estan eskondidos en "fakultad",  en el korason del ombre/del djusto.

Me akodro bien de la rogativa de muestras madres:
"El Dio ke no mos apreve !"


La perasha ke se melda este Shabat en la Keila es una de las mas entresantes i narrativas.
Vemos aki a Avraam, el padre de muestra nasyon, ke jeneroso era kon musafires. Sintimos por el una admirasyon kuando diskutio kon el Dio (a la desizyon del Dio de destruyir las sivdades de Sedom i Amora):

"I se aserko Avraam i disho: Destruiras tambien al djusto kon el malo?  Puede ser ay 50 djustos adyentro de la sivdad; .....El djuzgador de toda la tierra no ara djustisya?"                            En "azyendo bazar" kon el Dio, parvino Avraam a tener la prometa del Dio de no destruir la sivdad en kavzo ke se toparan en eya diez Tsadikim/djustos.

Avraam Avinu, aun ke lo bendisho el Dio kon rikeza, sufriyo mucho en su vida. El Talmud mos dize ke "Diez prevas fue provado/tentado Avraham muestro padre i estuvo firme en todas eyas; para azer saver kuanta grande fue la kreyensa de
Avraam (en el Dio)"

"El Dio ke no mos apreve" uzavan a dizir muestras nonas...
Malgrado todo, Senyor padre Avraam, tengo de pasar mis keshas i kritika:


Djustamente en saviendo la virtud de Avraam, me viene muy difisil de akseptar el komporto de Avraam en su rolo komo padre, ni kon Yishmael su ijo behor ke le pario Agar, ni kon Yitzhak.

Entiendo bien el punto de vista de Sara, mujer de Avraam, kuando vido a Yishmael burlandose de Yitzhak i tomando el posto del behor, i eredador al futuro.                                            -  "Echa a esta sierva (disho Sara) i a su ijo, porke no ay de eredar kon mi ijo, kon Yitzhak".

Verdad, ke el Dio disho a Avraam:  "En todo lo ke te disho Sara, oye a su boz".
I Avraam ansi izo, i echo a Agar i a su propio ijo, Yishmael, a el dezyerto de Beer-Sheva (kon "komanya" de pan i un odre de agua).

"I akontesyo despues de estas kozas......ke el Dio disho a Avraam:  "Toma agora a tu ijo, a Yitzhak i alsalo por sakrifisyo sovre uno de los montes".

En el kavzo de Yitzhak komo en el kavzo de Yishmael, kumplio Avraam el mandamiento del Dio sin ezitasyon, sin diskutir, sin demandar eksplikasyones, sin al menos rogar al Dio por piadad o por topar otro remedio lojiko. Nada.
Naturalmente, kale temer al Dio i obedeserlo. Ma por ande kedo el korason de padre?

Muestros hahamim, por amor de Dio, por respekto a Avraam muestro padre kerido, no mos disheron aki ni una palavra de kontra.  Los entiendo. Ma, vos amigos, meldando por favor la aftara de esta perasha (Melahim/Reyes B, kapitulo 4).             En esta aftara ke mos eskojeron muestros savios, vash a topar solamente dos kuentos/relatos por dos mujeres (diferentes una de la otra), i las luchas –de alma i de korason- de kada una de estas madres por el bienestar i por la vida de sus ijos.             Ke koraje de madres!


Entre muchos akontesimyentos dramatikos ke en la perasha de Vayera, meldamos tambien komo resivyo Avraam Avinu tres musafires en su tyenda.
Los musafires, ke despues entendemos ke eran andjeles de los syelos, le prometyeron a Avraam ke  "al otro anyo, tendra un ijo Sara tu mujer".

Sara, se RIYO entre si, dizyendo: "Despues ke me envyejesi
avra a mi visyo, syendo tambien mi marido viejo?"
I era Avraam de syen anyos kuando nasyo su ijo Yitzhak, i Sara, a los noventa anyos, disho:  "El Dio me a echo RIIR, kualkera ke lo oyera, se RIIRA konmigo".

(El nombre Yitzhak es por la semejansa ke ay kon el byervo
ke sinyifika "riira" en ebreo).

En todo esto, no mos olvidaremos, ke ya en la perasha pasada
le avizo el Dio a Avraam ke "tambien la bendizire a Sara i te dare de eya un ijo".
En oyendo la prometa del Dio "se echo Avraam sovre sus fases
i se RIYO, i disho: "A ombre de edad de 100 anyos sera nasido ijo?  i Sara ya de 90 anyos a de parir?" (Bereshit 17,17).

En este kavzo, la traduksyon aramea de Onkelos a las palavras
"se RIYO" es "se ALEGRO".

La aftara (Reyes II, kapitolo 4) mos konta por una de las maraviyas de Elisha el profeta, tambien en bendizyendo a una buena mujer, yamada por el "la Shunamita", ke ya desho i abandono su esperansa de parir.
Lo dramatiko en este kavzo fue, ke la mujer, si paryo, ma un dia
salyo su ijiko al kampo, se desmayo i muryo en los brasos de su
madre.  La mujer desho a su ijo en la kama i korrio a yamar a Elisha, keshandose: "Demandi yo un ijo de mi senyor? no dishe yo ke no me enganyes (diziluzyones)?"                                                                                              Elisha vino presto a la kaza, se echo sovre el ijo, i izo orasyon a Adonay, asta ke el chiko avriyo sus ojos, sarnudo syete vezes, i se arrebivyo.

Tornamos a muestra perasha ke dize:
"Ay para Adonay alguna koza difisil?"















 

                                                                                                                                                                            
 


+ Añadir nuevo comentario
Traducciones enviadas por usted
Loading Cargando ...
+ Enviar Comentarios

לאדינו         Ladino


Artikolos de Matilda Koen Serano
      
Artikolos de Yehuda Hatsvi
    
Artikolos de Gad Nassi
  
Artikolos de Eliezer Papo
   
Sefaradi Taor

ladino
Fecha y hora
 

La Asosiasion Arkadash | Ladino | לאדינו | judeo espanyol |

אתר זה הוקם ע"י זום ייעוץ ומערכות מידע