ladino  

 
Judeo espanyol
Contador:

Inicio >> Kantadores en Ladino >> G-I >> Hamutal Zimrá
 
 

Kantadores de la tradisión djudeo-espanyola
Hamutal Zimrá
Gitarrista i kantadera

(Israel)

Hamutal Zimrá, nasió en Haifa  en una famiya de Argentina. Su madre era kantadera de opera. La primera vez ke sintió la múzika de "Itragut", fue konkistada por su melodía spesial, ande ay una unión entre oksidente i oriente. I mas de esto Hamutal siente en eya una sensasión de paz, de atadijo entre las relijiones del Djudaízmo i  el Islam, i todo esto sovre la tierra de la Epanya kristiana. Hamutal resivió el amor por el folklor,  kuando moró en Venezuela kon su famiya, ande se topó sin preparasión muzikal. De vista se ambezó a tanyer el estrumento del lugar, yamado "kuatro", enstrumento kon 4 kuedras.
Después de los estudios de gitarra klásika en la Akademia de Múzika en Yerushaláyim i en la Eskola Rimón, un día le trusho su grande maestro Ilán Mohíah  en regalo una kaseta audio de rejistrasiones   de boz bulgara. Ansí se avrió delatre de eya un mundo muevo. Kon el tiempo eya entendió el atadijo de la Bulgaría kon la komunitá de los djudiós salidos de Espanya. I oy eya topa sí mizma en estos kantes de la kultura de los djudiós sefaradís. Kon orgolyo i kon grande identifikasión meldó el livro ke eskrivió Matilda Koén-Sarano sovre su famiya durante la Shoá en Italia.
Entre los anyos 2003-2009 Hamutal fondó el "Ansambel Alegra" kon las kantaderas Aviá Tari i Aliza Aviv.  Oy eya es la direktora muzikal del "Ansabel Alegra" kon los muzisianos Gershón Waiserfirer (ut), Moshé Nuri (bateria) i  otros  muzisianos entre los mas famozos. Eyos apresieron en los sírkolos de ladino en Haifa, en Ashkelón, en Gané Tikvá i en Holón. Aparesieron en los Festivales de enverano de la Munisipalidad de Herzliya, de Yerushaláyim i de Holón i en el Muzeón Artzot Ha-Mikrá.  De vez en kuando Hamutal performa también kon el akompanyamiento de la sola gitarra, komo en el 2010 en Yad Ben-Tzvi  i en Inbal en onor de la publikasión del diksionario ebreo/ladino-ladino/ebreo de Matilda Koén-Sarano. El 27 de Agosto de este anyo partisipó komo envitada en la nochada de ladino de Gila Hasid en Bet Yad Labanim. Además izo un atelié  de kantes de ladino a la delegasión de muzisianos djudiós de Venezuela. Hamutal resivió una beka del "Keren Rabinovitz", para publikar una broshura  de arranjemientos de kantes en ladino para koros.
Oy está empesando un projekto de publikasión de un CD en ladino. Entre los kantadores ke van a partisipar a este projekto están Mor Karbasi i su marido, el gitarrista Joe James Taylor, Gila Hasid i Rafi Gat, kantador auténtiko de kantes en ladino. Además Yehoram Gaón akonsintió a kolaborar a la publikasión del CD i Eyal Peretz de Arladásh, la komunitá de los djudiós provenientes de Turkía, prometió su apoyo al CD.

 Matilda Koén-Sarano, 2013

                                                                                                                                                                            
 


+ Añadir nuevo comentario
Traducciones enviadas por usted
Loading Cargando ...
+ Enviar Comentarios

לאדינו         Ladino


Artikolos de Matilda Koen Serano
      
Artikolos de Yehuda Hatsvi
    
Artikolos de Gad Nassi
  
Artikolos de Eliezer Papo
   
Sefaradi Taor

ladino
Fecha y hora