ladino  

 
Judeo espanyol
Contador:

Inicio >> ARTIKOLOS >> Yehuda Hatsvi >> Konsejas i konsejos
 

 Konsejas i konsejos / Yehuda Hatsvi
 
Las konsejas ke oyimos, o meldimos, en la chikez mos akompanian toda la vida.  Rekuerdos ermozos.
Ma, a vezes mos demandavan muestros djenitores "kuento de kasha":
ke mos kedo en la mano de la konseja?
Ke moral mos ambezimos del kuento?
 
Por un enshemplo, tomaremos la konseja "Los vistidos muevos del Emperador", eskrita por Hans Christian Andersen (Dinamarca 1805-1875).
La konseja, es en realidad una alegoria punchonoza sovre prosesos sosiales
ke pueden kavzar a kada uno de mozotros a darmos arrastar detras de la muchidumbre, i afilu niegar la verdad real. A vezes mos tapamos la konsensia, i kedamos kayados por ke tenemos myedo de "romper" el konsenso "de todo el mundo", aunke yerrado.
 
Vos ago akodrar, ke la konseja mos konta sovre un rey (o emperador) ke, por su vanidad, se okupava demaziado en su vestimienta. Un dia se asavento por dos shastres ke eran kapaz de kuzir unos vistidos espesial, vistidos ke son invizibles a ojos de bovos, inyorantes, o de basha klasa. Estonses, el invito a estos dos shastres "majikos" a kuzirle tala vestimienta, koste lo ke koste.
 
Despues de  largas semanas de "lavoro", mientras el rey, i todo el publiko de su reinado esperavan kon alma akorada, en fin, los vistidos estavan prontos, i en un dia de primavera, el rey izo adjuntar a todo el puevlo para ke vean todos su gloryoza vestimienta.
Todos observavan al rey pozado pompozamente sovre la tribuna; todos manifestaron sus entuziazmo de la vestimienta espesial.                       Ninguno del publiko no kijo darse a konoser komo un bovo o algun halahut.
Fue solamente un ninio ke grito en supito, kon grande sorpreza:"El rey esta deznudo !"
 
Hans Christian Andersen avia dicho ke esta istoria fue bazada sovre una lejenda del oriente. Yo no konosko tala lejenda; ma, kuryozamente, topi en la Biblia, en el livro de Kohelet (4, 13) un pasuk, diziendo: "Mijor es un ninio povre i savio, ke un rey viejo i nesio, ke no puede ser mas akavidado".
 
Sera ke de este pasuk kresyo i se elaboro esta konseja?
 
De toda manera, Andersen no fue el primer el ke eskrivio koza sovre un enganio semejante.  250 anyos antes, topamos entre los eskritos de Miguel Cervantes (1547-1616) una pekenya piesa de teatro, yamada "El retablo de las maraviyas". (El retablo es una tavla, a vezes endorada, parada detras del altar en las iglesias katolikas). Siendo ke este "sketch" satiriko es ambiguo, sera talvez posivle ke el autor se refera tambien a las tavlas de la tribuna del teatro maraviyozo.
 
 
Esta piesa de un akto, esta kompozada komo si fuera un teatro de maryonetas. Ma, no. No aparesen aya ni maryonetas ni kuklas.  Los ovreros del "teatro" son dos aduladores, enganyadores. El uno yamado Chirinos kon su kompaniera Chanafalla.
[A mi me sonan los nombres komo "xoirino" (puerko en grego) i "hanefa" (ipokrita en ebreo), aun ke no se si de verdad esta fue la intension orijinal de Miguel Cervantes]
 
Los impostores prezentan una piesa, ke-no-es-real, prente un publiko de kazalinos, i les kontan, ke solamente un kristyano puro, ke no es bastadro, i no es algun desendiente de judyos o musulmanos konversos, va ser kapaz a ver las maryonetas ke performan los rolos de los protagonistas del espektakolo. Por un egzempio eyos "amostran" a Shimshon el baragan destruyendo el templo pagano de los Filisteos en Gaza.
 
Los kazalinos, espantandosen ke no se den en mano komo bastadros o komo desendientes de konversos, pretenden a ver las figuras, i aktuan komo si realmente se estan gozando del "show".
 
Syerto, ke mezo esta chika drama teatral de un akto, Cervantes kritika las leyes konosidas komo las leyes de "pureza de sangre".                                  
El demostra aki tambien la ipokriziya prevaliente en la sosiedad en jeneral.
 
 
Fue una sorpreza plaziente para mi meldar en los jornales de este Shabat   (el 26 de Avril 2014) sovre la lista de las 100 personalidades mas influyentes en el mundo de oy.
En esta lista, (kompilada por la revista "Time"), aparese tambien Anat Admati, nasida en Israel, ke mora agora en California, i es profesora en la Universidad prestijioza de Stanford.
La prof. Admati es una eksperta en el kampo de la banka i las finansas. Eya kritika fuertemente a los bankieres de los Estados Unidos (i de otros paises) por sus kondukta irresponsavle kon el dinero de los depozitores; dunke, segun kree, ay una nesesidad urjente de una reforma finansiera profonda.
 
 
Es kuryozo komo me vino endagora azir azir (pronto, sin penar mucho) la novedad, kon la kual termino yo aki mi kurto artikolo. Todos los medios de komunikasion en America eskriven en estos dias sovre el livro ke eskrivio la Prof. Anat Admati (djuntos kon su kolega Martin Hellwig).
El titolo del livro es:
"The Bankers' New Clothes" (Los Vistidos Muevos de los Bankieres")...
 
 
 
 
 

                                                                                                                                                                            
 


+ Añadir nuevo comentario
Traducciones enviadas por usted
Loading Cargando ...
+ Enviar Comentarios

לאדינו         Ladino


Artikolos de Matilda Koen Serano
      
Artikolos de Yehuda Hatsvi
    
Artikolos de Gad Nassi
  
Artikolos de Eliezer Papo
   
Sefaradi Taor

ladino
Fecha y hora