ladino  

 
Judeo espanyol
Contador:

Inicio >> ARTIKOLOS >> Yehuda Hatsvi >> La istoria de un timbre
 
 

La istoria de un timbre  /  Yehuda Hatsvi 

Ay muchos i muchos fatos istorikos, ke en toda la epoka larga del Galut
(kaje 2000 anyos), siempre egzistiyan komunidades judiyas  -aunke chikas-  en Erets Yisrael.  Sovre esta tierra pasaron  invazores de varios
puevlos, rasas  i  kolores, pero es solamente los judyos ke metieron aki pie, kon una determinasion permanente, bazandosen sovre la emuna ke esta es la tierra prometida.

Naturalmete, ke en toda esta epoka no aparesio ninguna situasion politika ke permetiera a este puevlo persegido, i desparsido en todo el mundo, a realizar sus aspirasiones nasionalas: tornar, volver, a Sion i Yerushalaim.

Desde 1848, el anyo konosido en la estoria komo "La primavera de los puevlos", empesaron a brotar oportunidades para krear en la kuna de muestro puevlo una reunion de los exilios. Sierto ke me refero aki, antes de todo, al movimiento del Sionista; ma en el siglo 18, okurieron i otros
kavzos en los kual grupos de judios (non identifokados komo "Sionistas") vinieron a bivir en este pais, estones yamado "Palestina". Por un solo egzempio mensiono aki el grupo de judyos de Yemen ke desidieron en 1882 "a volver a Sion", motivados por  una "aluzion" en Shir haShirim (Kantar de los Kantares 7.9), sin tener ninguna nosion sovre el Movimiento Sionista.

En el anyo 1925 kontava la povlasion Judia en Erets Yisrael kaje 165000 almas, entre eyos unas  kuantas famiyas de peshkadores judyos de Salonik, ke vinieron en el pais i se instalaron a la sivdad de Akko, kon la esperansa de topar un poko de parnasa en su ofisyo.

Sovre los peshkadores de Salonik, ya se eskrivyo mucho en por investigadores komo Michael Molho i en por varios eskritores komo Baruh Uziel, David Benveniste i otros. 

El orijin de los peshkadores de Salonik es de la isla de Sicilia. 
Ribi Ovadia de Bartenura (en Italia), en un relato sovre su viaje a Erets- Yisrael en 1485, mos konta sovre los peshkadores judios en el puerto de Palermo, i sus dura vida basho los dasyos del rey.
Komo lo savemos, todos los judyos de Sicilia (igualmente al destino de los Judyos de Espania) fueron ekspulsados en 1492 segun el dekreto de los reyes katolikos. Una grande parte de estos ekspulsados imigraron a Salonik, ke en akel tiempo era una parte del imperio otomano.

Entre los selaniklis ay una ekspresion muy sinika: "Eramos proves, i deskayimos". Parese ke este destino severo enkontro al los peshkadores judyos en kualkier lugar ande bushkavan  un poko de repozo i mantenimiento. Sus vida en Salonik no era fasil. Ma se izo ayinda peor despues del Tratado de Lausanne entre Turkia i Gresia en 1923. 
Segun este akordo de interkambio de povlasion entraron a la sivdad no menos de 115000 refujiados turkos de Anatolia.  Indemas, el porto de Salonik, ke durante tantos siglos era en manos Judias, i olgava en dia de Shabat, agora (segun la regla del governo grego) se troko todo enteramente, i fue ovligado de funksionar en los dias de Shabat.

Ma, le esperansa de los peshkadores judyos de topar en "Palestina" un destino mijor -  provo a ser una grande desepsion. En el chiko golfo de Akko (a la kosta de la mar Mediterannea) enkontraron muestros peshkadores una kompetision de parte de peshkadores arabos. De la otra parte, el establesimiento sionista, i sus organizasiones komo la Keren- Kayemet, o la Sohnut, no se apuraron mucho a dar apoyo i ayuda a los muevos venidos, a las famiyas de los peshkadores selaniklis.

La unika solusion por el negro hal de los peshkadores en Akko era de darles terrenos serka de la mar para ke tengan una posibilidad de mantenersen de la integrasion entre agrikultura i peshka; ma esta propozision nunka se realizo por varyas razones. 

Muchas de estas faltas i neglijensia podian ser perdonadas tomando en konsiderasion las sirkunstansias de akeoys anyos ke presederon el fondamiento del Estado de israel.  Ma no puedo yo perdonar lo ke disho (en 1929) uno de los shefes de la Sohnut: "Los peshkadores no tienen ke azer aki en el pais; por salvarsen, mijor ke retornen a su pais natal".
Esta fraza, es una de las fayitas del estabelesimiento sionista de akeos tiempos.

En los anyos de "pre-estatal", fue la Keren Kayemet ke produiziya timbres (pules) komo un simbolo de independensia nasionala. Entre los timbros salio a luz (en 1943) un timbre kon el subtitulo "Peshkadores Judyos en el puerto de Salonik".

Los peshkadores de Akko no toparon ningun remedio para kontinuar en sus ofisio tradisional, i kada uno de eyos  salyo a bushkar su destino en otro lugar.  Lo ke sovro de todo esto es el timbre.  Ke "suerte".

 

                                                                                                                                                                            
 


+ Añadir nuevo comentario
Traducciones enviadas por usted
Loading Cargando ...
+ Enviar Comentarios

לאדינו         Ladino


Artikolos de Matilda Koen Serano
      
Artikolos de Yehuda Hatsvi
    
Artikolos de Gad Nassi
  
Artikolos de Eliezer Papo
   
Sefaradi Taor

ladino
Fecha y hora