ladino  

 
Judeo espanyol
Contador:

Inicio >> ARTIKOLOS >> Yehuda Hatsvi >> La sinagoga al nombre de Raban Yohanan Ben Zakay
 

La sinagoga al nombre de Raban Yohanan Ben Zakay


Oy mos adjustimos aki para avlar sovre la sinagoga al nombre de Raban Yohanan ben Zakay.
Esta sinagoga kon otras tres sinagogas sefaradis en
Yerushalayim la Antigua, forman un komplekso interesante de sentro relijiozo.

Ma antes, unas kuantas palavras sovre el orijin del biervo sinagoga.   De ande viene?
En grego antiguo, la palavra "syn" es "endjuntos".
"lo mizmo" (arroves del ladino: "sin" es nada, בלי""  en ebreo.

"Syn" en Grego es endjuntos, i "agein" es "traer". Kyere dizir "traer endjuntos".

"synonim" (viento es synonim de aire) כותל = קיר
"syn" = "lo mizmo, endjuntos"; "onyma" = "nombre".


En ladino tenemos otro nombre para "sinagoga" i es "esnoga". Este biervo mos viene del Portugues, ma ay kyen dizen ke es komo "בית מדרש" ESkola kon sinaGOGA.
Otros lo emplean a este birevo komo עזרת נשים.

Ma, las sinagogas, lo mas, i no por nada, son yamadas entre los sefaradim komo "kehila" (= komunidad, en ebreo). O "Kahal" (= publiko, en ebreo).
La vida de los sefaradim en siglos pasados fue toda konsentrada en la Kehila.  Esta funksionava no solo komo un lugar en el kual se adjunta el puevlo para orasionar (dizir Tefila); la kehila era el sentro de todas las institusiones i de todas las aktividades de la komunidad Judia.

Despues del Horban, (la destruksion del Bet aMikdash), ya se empesaron a fraguar en Erets Yisrael i en la Diaspora "lugares de Tefila" מקום תפילה ke kon el tiempo resivyeron otro un titolo en ebreo: מקדש מעט  segun eskrive en el livro de Yehezkel el profeta (11,16): "
Aunke los aleshi entre las nasiones, i aunke los esparzi en las tierras, kon todo esto, Yo les sere por SANTUVARIO PEKENYO en las tierras onde vinyeron".
כי הרחקתים בגויים, וכי הפיצותים בארצות,
ואהי להם למקדש מעט בארצות אשר באו שם


Agora vamos a echar un salto grande para ir a Yerushalayim en el anyo de 1492.   Desde la ekspulsion de los Judyos de Espania (i después, de Portugal), la komunidad de Yerushalayim se ancho mucho, (komo tambien en otras sivdades en Erets Yisrael, i espesialmente Safed, Tevaria i Hevron). Los muevos venidos fraguaron negosyos i butikas, i avagar avagar toda la komunidad de la sivdad fue al derredor de los Judyos ke vinyeron de Espanya.

Entonses, la komunidad nesesitava una kehila apropriada. Ma, las autoridades Musulmanas de Yerushalaim pozaron muchos obstakolos frente los Judyos, i afilu - para mas mal- kitaron un Firman en 1586 para serrar la kehila antigua al nombre de RAMBAN (רבנו משה בן נחמן).

Durante mas de diez anyos, los Judyos no tuvyeron remedio sino de orasionar en kazas privadas.
Es solo en el siglo 17, ke empesaron a fraguar un Kal sentral muevo, el Kal al nombre de Yohanan Ben Zakay.





Kon el tiempo, de esta kehila se izo el lugar un komplekso de kuatro Kales, ke asta oy son yamados "las kuatro sinagogas sefaradis", ke son la kehila al nombre de Yohanan ben Zakay, la kehila al nombre de Eliyau haNavi, el Kahal Sion (ke se yama tambien האמצעי simplemente porke esta en el medio de las otras sinagogas), i el  בית הכנסת האיסטנבולי ke komo podesh imajinarvos, se fraguo por medio de Judios venidos de Estambol.

Asta oy en dia, estas kehilas son muy aktivas, non solo por los Judyos ke moran en el kuartier Judyo en Yerushalayim la antigua, ma tambien atiran muchos vijitadores i turistas.

Ma antes de kontinuar avlar por la kehila, mos demendamos:
Kien fue este personaje, ke meresiya una kehila tan grande a su nombre?

Del titolo "Raban" se puede entender ke el era uno de los primeros Tanaim (los savios de la Mishna). Kyere dizir, ke el bivio en el primer siglo.

Tengo de konfesar ke en mi chikez, i afilu mucho mas despues, tuve mucho renkor sovre Raban Yohanan ben- Zakay, i el era para mi komo un simbolo de traidor.

En el anyo 69, Yerushalayim estava blokada por la armada Romana, ke en su kavesera era Aspasianus i su ijo Titus. Esta blokada turo kaje tres anyos. La ambre en Yerushalayim fue terivle, i mos kontan ke kuando vido
Raban Yohanan ben Zakay ke el puevlo buyiva pajas para komer o bever alguna supa, el disho ke no ay salvasion a
la sivdad, i ay de azer paz kon los Romanos.
Es interesante, ke el Talmud mos konta ke los eshpiones de Aspasianus savian muy bien ke Raban Yohanan era en favor de los Romanos, i bushkava de azer paz.

Raban Yohanan se konsejo kon sus elevos i toparon ke la unika manera de salir de la sivdad blokada, era komo muerto.  Los Romanos respektavan la regla, ke es defendido (proibido) de deshar kualkier muerto en Yerushalayim la santa sin enterrarlo en el mizmo dia.
Entonses, lo metyeron a Raban Yohanan ben Zakay en  un ataúd (serkolio) i ansi lo kitaron afuera de las murayas de la sivdad.

Ayi, se enkontro kon Aspasianus, el komandante de la armada Romana, i este le disho ke se deve de destruir a la sivdad de Yerushalayim porke es komo una bota de miel, ma ke adyentro tiene un drago.

Segun mos konta el Talmud,  R"Y"B"Z se kedo kayado.

Kuando le pregunto Aspasianus KE es su demanda de el,
R"Y"B"Z no supliko nada sovre Yerushalayim, solamente le demando permision de ir a Yavne i fondar ayi Yeshiva de Hahamim.  En kurto, R"Y"B"Z prefero a salvar la Tora,
i no nesesariamente a la Medina.

Aspasianus aksepto a su demanda, i en Yavne, se adjuntaron los Hahamim de akea jenerasion, i kontinuaron a ensenyar al puevlo la tradision i la relijion Judia.
Ayi funksiono tambien el Sanhedrin, i en realidad de ayi empeso a kreser el Judaismo komo lo konosemos oy.
Relijion sin paiz i sin Estado.

Todos los estoriadores estan en la idea ke Raban Y"B"Z salvo al Judaismo. Sin el paso atrevido ke izo, talvez no kedava mas la relijion Judia.


Komo ya lo savemos, Raban Yohanan ben Zakay salyo de Yerushalayim kuando ya estava kaje en manos de los Romanos i paso a estabilir su Bet Midrash en Yavne.
Antes de salir a su kamino izo una ultima en el Bet Midrash en Yerushalayim, ke segun la tradision era egzaktamente en el mizmo lugar ande se fraguo despues de muchos siglos la kehila a su nombre.

La primera kehila en el komplexo es la mas grande i se yama en ebreo קהל קדוש גדול I en ladino, ke era la lingua de todos los Yehidim se yamava simplemente: "El Kal grande".

En esta kehila, desde el anyo 1893, se azia la seremonia de la koronasion del gran rabino sefaradi, ke su titolo es
"הראשון לציון"

Al rabino lo vistiyan  kon un djuben brodado kon filos de oro i de plata, akompanyado kon los hahamim de la komunidad. Kuando suviya el rabino a la Teva, echava la beraha de שהחיינו sovre el djuben muevo.
Despues de la seremonia, todos de la kehila lo akompanyavan asta su kaza, i el Shohet bashi, despues de degoyar un kodreriko, untava su mano en la sangre,
i la apegava, komo una "Hamsa" al dintel de la puerta,
para guadrar al gran rabino de todo mal.

En esta kehila pasavan alegrias, ma tambien epokas de estrechura. En anyos de sekera, se adjuntavan ayi djudyos de todas partes de la sivdad para orasiones rogando por luvyas. De la otra parte, esta kehila era un lugar estimado para resivir musafires distinguidos, komo por egzempio la vijita del imperator Franz Josef de Austria
en 1870.



La kehila kontinuo ser un sentro para la komunidad sefaradita en el kuartier Judyo asta la gerra de 1948.

En tiempo de esta gerra, toparon abrigo en los edifisios de los Kales ninios, viejos i hazinos. El fato ke los edifisios son mas abasho de la kaye, fue un avantaje para akeyos ke se eskondia aki.

En 28 Mayo 1948, el kuartier Judyo kayo en las manos del Lejion Jordaneo, i los sivdadinos Judyos fueron yevados komo kaptivos.

El destino de los Kales fue muy amargo. Eyos kaje fueron derrokados, i durante la epoka ke estavan en las manos de los Jordaneos, se amontonaron montones de estyerkoles. Los mobles antiguos, ke muchos de eyos eran desde el tiempo de la expulsion de Espania -
todos se pedriyeron.

La kayida de Yerushalayim la antigua en manos de los arabos en 1948 es una verguensa i una mancha suzia sovre una Medina ke no supo gerrear por el korason i la alma de puevlo.
Dizen ke el frakaso i la derrota son guerfanos, ma la verdad es ke tienen muchos padres, i kada uno akuza al otro en esta verguensa
דב יוסף בספרו "קריה נאמנה"
)Dov Yosef en su livro "Kirya Neemana").

Ma ya savesh muestra dicha:
Ben Kah u-ven kah, guay de la ija de Yiftah.




Despues de la gerra de 1967 se izieron en estos Kales muchos lavoros de renovasion, i en la pared de la parte del oeste (el oriente), ay dos ארון קודש  muevos, semejantes a los viejos, i endriva, sovre eyos estan las Tavlas de la Ley, traidos de una kehila antigua de Livorno
(Italia).



Lo ke mos kedo del Bet aMikdash, ya savesh, es el Kotel
(488 metros de muraya) en el oeste i en el sud del templo.


Agora, tornaremos a las kuatro sinagogas ke egzisten en Yerushalayim la antigua.

De la kaye ke se yama משמרות הכהונה se abasha a una
plasa grande, ma kuadrada (no redonda), ke esta en la fasada de las kehilot.  
Estas sinagogas son fraguadas algunos tres metros mas abasho del nivel de la kaye.
En realidad, todo el komplexo de los edifisios no son sovresalientes entre las kazas del kuartier, i las ventanas dan a la parte del kurtijo. Tambien la entrada esta un pokito eskondida si komo los fraguadores trataron de eskonderla de la djente de la kaye.

Ay una tradision sovre estas sinagogas ke dize ke son de un karakter modesto (de Anava), i los Yehidim kumplen lo ke dize en Tehilim 130:
שיר המעלות, ממעמקים קראתיך ה'
"Kantar de las suvidas: de las onduras te yamo O, Adonay".

Esta tradision se enkolga sovre un debate en el Talmud ke ayi dizen ke es defendido de azer tefila kuando estas apozado sovre una siya, una kama etc.,
porke "No ay grandeza frente el Dio".


Es kuryozo, ke en Salonik ay un kuartier (ke egziste asta oy) kon el nombre "kuartier Franco", ke ayi biviyan lo mas Djidyos ke vinyeron de Fransia i de Italia, los mas
merkaderes.  La kehila, ke ya no egziste mas, porke se kemo en el fuego grande de 1917, se yamava Kiana. Ayi, la Teva estava metida unos kuantos eskalones abasho del suelo, para kumplir lo de se disho ממעמקים קראתיך.

Sierto ke si me damandash a mi, esto es un perush muy infantil al pasuk.

Es verdad lo ke disheron muestros Hahamim ke "No ay grandeza  frente el Dio", ma es porke tenemos de ser umildes frente el Kriador ; Pero no importa si tengo un boy de 168 santimetros i otro un djugador de Basket-Ball (pelota-sesto) tiene un ayar de 2 metros.     
Bovedas i bavajadas !

En libro de Tehilim ke me desho mi madre, la traduksion de ממעמקים  es:
De frofundas sufriensas te yamo, O, Adonay.

Solo ke sepash, ke en el Talmud, Masehet Shabat 11. 1
eskrive:
כל עיר שגגותיה גבוהים מבית-הכנסת, לסוף חרבה.
"Sivdad ke sus techos son mas enaltesidas de la Kehila,
su destino sera destruksion".

El verdikto de Rambam dize: Kuando se fragua alguna kehila, se la fragua a la altura de la sivdad.

Para enalteser la kaza de nuestro Dio, i para levanter sus disolasiones.
לרומם את בית אלוהינו ולהעמיד את חרבותיו
עזרא ט' ט'

Aun kon todo, vos traigo aki una foto del anyo 1927 de la kehila de los Monastirlis en Salonik. Esta foto ke la tengo en kaza de siempre, se topa también en בקעת הקהילות
al kuadro de Yad vaShem, aki se ve ke la Teva esta un poko mas abasho del suelo.

Tornaremos a Yerushalayim:

La razon mas lojika porke se fraguaron estas sinagogas de Yerushalayim en un nivel mas abasho de la kaye es talvez el miedo ke tuvyeron los judyos de las autoridades musulmanas, no sea ke la kehila sera mas alta de los edifisios ke al derredor.

Los kuatro edifisyos de las sinagogas se fraguaron komo kuatro kazas separadas, i es solo en 1835 ke los lideres de la komunidad Judia lograron resivir un permi para azer renovasiones, i aunar a las kuatro sinagogas basho un techo.   

 

Avlaremos agora un poko sovre la arkitektura Judia.
Asta el anyo 1856, las autoridades Otomanas no desharon a judios o kristyanos  merkar tierra en Yerushalayim. Por kavza de esta restriksion, naturalmente, no pudieron los judios fraguar edifisios komo sinagogas, etc.

Kuando empesaron los sivdadinos ajenos (no Turkos) a fraguar edifisios publikos, los kristyanos ya tuvyeron la eksperiensia i erensia rika de la arkitektura Evropea. Los Judios, mas despues de la epoka de Hordos no se okuparon mucho en arkitektura.
Para resivir alguna permision de fraguar kehila - pasavan los Djudios Me-aMarim, i mucho dinero para sovorno i bakshish.
Entonses, las dos Kehilot ke se fraguaron  en el medio del siglo 19  fueron dos sinagogas Ashkenazis. La una es lo ke se yama
החורבה )1864), i la otra es ישראל תפארת (1872). 


Komo podesh ver en las ojas ke vos desparti, el estilo de la kehila HURVA es muy semejante, kaje imitasion a la mishkita/djami ke fraguo el arkitekto turko Sinan en el siglo 16.


Este estilo es konosido komo "neo-Bizantiko", un estilo muy tipiko a las klisas Gregas-ortodoksas, komo por egzempio
המבדיל המבדיל 
la klisa de otro Yohanan, el Yohanan el Baptista ke esta en el kuartier kristyano en Yerushalayim la Antigua.

Naturalmente, el orijin komun de toda la arkitektura Neo-Bizantika es la klisa de Agia sofia en Estambol, ke influenso sovre la arkitektura en todo el Oriente.

Lo mas de las sinagogas, komo ya lo avlimos, fuerron derrokadas por mano de los Jordaneos en 1948.
De un modelo ke izieron en el siglo pasado podemos ver el interior de la Kehila aHURVA.

En las fojas ke tenesh en la mano meti una foto del kuartier Judyo en Yerushalayim la Antigua. En esta foto tiniash de ver la arka de memoria por la kehila de aHurva, ma de tanto eskuridad no se ve nada de la arka, aunke - al menos –
vos kedo la panorama jeneral del kuartier.
Ma, sovre el ekran, estara agora la mizma foto kolorada, i ayi se
ve la plasa i tambien la arka.

En la la foto siguente vamos a ver una parte de lo ke sovrebivio de la kehila Tiferet Yisrael, ke la desharon asi sin ninguna rekonstruksion, komo un monumento para siempre.

Por mankansa de fotos koloradas de los Kales Sefaradis vos trushe yene las fotos de estas sinagogas Ashkenazis, porke son del mezmo estilo i tyenen mucha semejansa.


El estilo de la arkitektura de las sinagogas en el tiempo del Imperio Otomano se ve klaramente en las kuatro kehilot Sefaraditas  en Yerushalayim la Antigua.

El mas antiguo de las kuatro es el Kal Eliyahu aNavi ke ya egziste desde 1586 ma se frguo de muevo en este estilo Neo-Bizantiko en 1835. El edifisio es kuadrado komo un kuti (6.5 metros kuadrados sovre/da a 6.5 metros kuadrados), ma kon kolonas redondas ke apoyan tavan un pandero redondo;  sovre este pandero redondo ay una BOveda media redonda.
El mas ermozo i mas grande de las kuatro sinagogas es el Kal de Yohanan Ben Zakay (8 x 20 metros kuadrados).
Al tiempo tiniya un tavan de madero, ma en la renovasion ke izieron en 1839, el tavan agora tyene  kuatro BOvedas (kupulas) kruzando una a la otra.
Entonses -


En  el sentro de kada BOveda metyeron dekorasion / medalyon en forma ke se yama "rozeta" para evitar ke no pareska, Has-veShalom algun kruz.
Podesh verlo en la primera oja, abasho.
En jeneral, para dekorar a los Kales, ma sin uzar ikonas i dezenyos komo uzan los kristyanos, ay muchos adornos en formas jeometrikas
(komo en los eshemplos ke vos di en la mizma foja).

Sovre el ekran vos do agora una vista del interior de la kehila de Yohanan ben-Zakay. Komo podesh ver, las dos ventanas dekoradas son en realidad el Aron aKodesh.
Arriva, al tavan, se puede kaje notar ke la luz (i el aver) ke viene de afuera, es de las ventanikas elevadas. El dezenyo ke en la foja abasho lo amostra muy klaro.
Dizen ke ventanas semejantes aviyan en la Teva de Noah. Ma yo no las vide por mis ojos…
Tambien lo dudo si alguno de muestra jenerasion vido el kantariko de azeite i el Shofar ke estavan metidos en el  Kal Ben- Zakay en una kornicha de una ventana de arriva, asperando al Mashiah.


En  oja primera vash a topar tambien el formato de la pozision de las kuatro kehilot, i klaro ke agora dos tres palavras sovre el Kal chiko "Kal Sion", el de en medio. Al tiempo era solamente un pasaje estrecho i alargado entre los Kales, i  kuando se aumento la komunidad sefaradita en la sivdad, empesaron uzar este pasaje komo kehila.

El kuarten Kal es el Estamboli, muy semejante al Kal Eliyau aNavi.  Komo ya lo mensioni, es el mizmo estilo komo el del aHurva, Tiferet Yisrael, i tambien de otra Kehila – Porat Yosef
(tambien derrokada en la gerra de 1948). 

El Dio ke mos de Zehut de ver
a Yerushalayim, mas kreser i enfloreser

                                                                                                                                                                            
 


+ Añadir nuevo comentario
Traducciones enviadas por usted
Loading Cargando ...
+ Enviar Comentarios

לאדינו         Ladino


Artikolos de Matilda Koen Serano
      
Artikolos de Yehuda Hatsvi
    
Artikolos de Gad Nassi
  
Artikolos de Eliezer Papo
   
Sefaradi Taor

ladino
Fecha y hora
 

La Asosiasion Arkadash | Ladino | לאדינו | judeo espanyol |

אתר זה הוקם ע"י זום ייעוץ ומערכות מידע