ladino  

 
Judeo espanyol
Contador:

Inicio >> ARTIKOLOS >> Yehuda Hatsvi >> Los Judios de Sicilia
 

Los Judios de Sicilia / Yehuda Hatsvi


Sicilia es una izla, la izla mas grande en la mar mediterranea. Por kavza de su ubikasion jeografika en el sentro de la mar, fue esta izla konkistada muchas vezes durante la istoria
En realidad, Sicilia nunka fue un Estado independiente.

En tiempos antiguos, antes mas de 3000 anyos fue konkistada por los Fenisios. 200 anyos despues, se konvertio la Sicilia a una kolonia grega.
(Aki nasyo, antes 2300 anyos, el famozo sientista Arkimedes).
En el anyo 241 antes de la kuenta kristiana, fue konkistada, i kaje totalmente  destruida, por los Romanos. Ma, en el anyo 535, despues de la divizion
del Imperio Romano, Sicilia paso basho el dominio de Imperio Bizantiko
Desde el anyo 652 Sicilia sufrio muchos atakos de parte de trivos arabos, asta ke ke en el anyo 965, la izla paso a ser un emirato islamiko

Los Normandos, (trivos del norte de Evropa), konkistaron a la Sicilia en el siglo 11. Durante sus dominio, los normandos enkorajavan imigrasion de povlasion katolika a la izla, ma de la otra parte no kavzaron ningun despojo a los kristianos-ortodoksos, ni a los judio o a los musulmanos.
En el anyo 1282 paso el poder sovre la izla a Pedro III, rey de Aragon.

Aun ke es bien sierto ke judios bivian en Sicilia, al menos desde el exilo del anyo 70, tenemos muy poka dokumentasion sovre la primera epoka (ke realmente es la mas larga). Dunke, avlaremos oy, en partikolar, sovre la vida de los judios sicilianos basho el rejime espanyol. 

En akea epoka, los judios eran rekonosidos komo "vasales" del rey o de siertos barones ke posesavan unas grandes areas de la izla.
Jeneralmete, el vasal no era sivdadino ofisialmente, ma avia una relasion entre el vasal i su senyor, a traves del kual el vasal era ovligado de pagar siertos tributos (al rey o al baron) a kambio de proteksion i permiso de bivir en su territorio.

Los reyes de Aragon se bazavan sovre las "kartas de derechos" firmadas por los governadores anteriores, ma tambien muchas vezes privilijiavan a judios komo, medikos o otros ofisios. Savemos, por egzempio, por los miembros de la famiya de Sela, de la sivdad de Trapani,  ke durante 100 anyos konsedieron al rey varios servisios. Eyos eran ekseptados de pagar dasyos, i indemas eran permetidos de yevar armas, komo tambien fraguar un Kal en el interior de sus kaza.

Es kuriozo ke no topamos en Sicilia nombres de ilustres rabinos o sientifikos judyos. Avian medikos, komersiantes i tambien tradjumanes, ma lo mas de los judios eran artezanos komo fierreros, kondurieros, boyadjis, i otros ofisyos de lavor manual.

El haham mas sovresaliente en Sicilia, era Rabbi Mazliah ben Eliya ben Albasek. El bivio en Palermo basho el dominio musulmano; eskrivio un perush a la Mishna, i era rekonosido komo una autoridad relijioza en toda la komunidad judia de la izla. Ay de notar ke Rabi Mazliah fue un elevo de Rabi Hayi Gaon (939-1038) en Babilonia.

Las moradas de lo mas de los judios eran muy modestas. A vezes una sola kamareta para una famiya. A eksepsion de los rikos, las kondisiones de abitasion eran bastante estrechas. Las kazas eran de un etaj; pokas avian de dos o tres etajes. Las kuzinas i los kurtijos eran kondjuntos para mas de una famiya. La mayorita de los apartamentos eran aliklados.
Normalmente, los judios no mantenian una propreidad direkta de la tierra.
Los duenyos (patrones de kaza) eran, jeneralmente, iglesias, konventos, kristyanos rikos, etc.

No avia sovre los judios restriksiones de rezidensia. Avian kayes o kuartieres
ke aya moravan judios djuntos kon vezinos kristianos, i no se sentiya de nada
ningun aire de antisemitismo sekular (aun ke la iglesia se esforsava a dezazer estas buenas relasiones entre judyos i kristianos) Ma, tambien avian kuartieres ke ayi bivian solamente judios, los ke preferavan morar en un ambiente judio. Los rikos, ke teniyan la posibilidad ekonomika, a vezes merkavan kaza afuera de la sivdad serka de sus vinyas, o kampos agrikulos.

Komo en kualkier lugar en el mundo, en Sicilia tambien, la vida de los judios era konsentrada al derredor de la kehila. Malgrado la ley kanonika de la iglesia, (predominante en toda Evropa, i ke no permitiya fraguar muevas sinagogas, los reyes de Aragon en Sicilia inyoravan esta regla.En las sivdades grandes se fraguaron (o se renovavan) sinagogas, tambien avian
i yeshivot, ke la mas grande de todas era el Bet-Midrash en Palermo.

No savemos mucho sovre el rito de las orasiones entre los judios de Sicilia, indemas siendo ke en esta izla se apanyadizaron judios de muchos varyos paizes.
Kuando los desendientes de los sicilianos vinieron (despues del anyo 1492)   a bivir en el espasio del imperio otomano, eyos se meskalaron durante las jenerasiones kon los sefaradim, ke eran la mayoria de la komunidad judia.

De los uzos i kostumbres de los judios de Sicilia, mos sovro ayinda, asta oy en dia, el "Purim de los Sarahostis". Este Purim espesial se fiesta en la sivdad de Siracusa, i entre desendientes de esta sivdad, en el 18 del mez Shevat.


Es kuriozo, ke afilu despues del anyo 1478, kuando se estabelesyo en Espania la inkizision, autorizada por los reyes katolikos, la prezensia de la inkizision no se sentia deltodo en Sicilia..

Dunke, los judios de Sicilia gozaron una sierta libertad de relijion, i este fato les permitio de mantener una sistema de djuisio, kaje independiente, bazada a la Ley judia. Naturalmente, a vezes kombinava alguna kontradiksion entre el veredikto del Bet-Din judio i el tribunal del reynado.  En kavzo komo este, ganava la regla ke akompanya a los judios durante toda la estoria:                  "dina d'malhuta dina":  "Tenemos ke akseptar la sentensia del reynado". 

Lo mas de informasion ke tenemos en mano sovre los kales i yeshivot es de los muchos dokumentos notariales komo testamentos (sava). Frekuentamente, se dedikava una suma de dinero para sedaka, para alguna yeshiva o para "azeite al kal". Echar "azeite al kal" era, asta pokas dekadas, una kostumbre bien uzada entre los sefaradim.
De los testimonios savemos tambien, a tanto kuidavan los padres a la edukasion de los ijos. Lo vemos, ke despues de deshar los bienes a la dispozision de la mujer (o al marido), se apartava una suma espesial para la edukasion de los ijos ke kedaron guerfanos.
Jeneralmente, los ijos de rikos i los de buena pozision estudiavan kon maestros privados; ma avian i eskolas publikas (de la komunidad) komo tambien eskolas privadas. En todas las eskolas primarias judias se enseniava la legua ebrea.ademas del idioma lokal. Los inisiadores de institusiones de edukasion mas alta, pokos an logrado una reushita .
Ma de toda manera, muy raramente se enkontrava, en la Edad Media, un tal kavzo de algun judyo analfabeto.

En komparezon a otros paizes, la vida de los judios en la izla de Sicilia era simple i kalma. Afilu en los trokamientos de rejimes (komo, por egzempio, en pasando del dominio musulmano al poder del rey de Aragon) no avia fuida masiva de judyos del paiz. Al kontrario, durante todas las epokas, egzistiya una imigrasion, moderada pero konstante, a Sicilia. Viniyan de Katalunia i de Espania, del norte de Afrika, i afilu de los Balkanes. Aun kon todo sera difisil de desidir el orijin de los judios de Sicilia porke los nombres de alkunia, de raiz arabo, de los venidos de la peninsula iberica eran muy semejantes a los nombres de los sicilianos veteranos. De la otra parte, nombres ke indikan, segun kave suponer, ke son de orijin nort-afrikano, tambien eran komun.     La razon es, porke avian judios de Espania ke por varios motivos pasavan     a bivir en nort-afrika, sea por dos-tres jenerasiones o mas.
Podemos dezir ke Sicilia era un krizol, en el kual se mesklaron judios de muchos paizes, de Evropa i de Afrika tambien.


En el mez de Marso 1492 afirmaron los reyes katolikos, Ferdinad i Izabela,   el dekreto de la expulsion de los judios de Espania. El dekreto inkluyo a Sicilia (i otros territoris basho el dominio espanyol).
En akea epoka, los judios de Sicilia kontavan mas de 25000 almas, algunos 5% de la povlasion jeneral. Kon el dekreto de la expulsion, algunos 20% de los judyos desidieron de konvertirsen al keristianizmo, para no despartirsen de sus patria natal. ( Malorozamente, eyos no se imajinavan ke muy serkamente tendran una vida muy amarga devido a la persekusion de parte de la inkizision).

En realidad, el dekreto de la expulsion era komo por kompletar un proseso de evakuasion etnika de todos los judios de Evropa. Este proseso ya avia empesado kon la expulsion de los judios de ingletierra en el siglo 13.

Kon la expulsion de los judyos de Sicilia, i otros territorios espanyoles, se termino una epoka de 1000 anyos de ko-egzistensia de judios kon kristianos.

El exilo de los judios kavzo un shok severo en la ekonomia de Sicilia (komo tambien en la ekonomia de Espania). Ma, esto no mos konforta. 

 

                                                                                                                                                                            
 


+ Añadir nuevo comentario
Traducciones enviadas por usted
Loading Cargando ...
+ Enviar Comentarios

לאדינו         Ladino


Artikolos de Matilda Koen Serano
      
Artikolos de Yehuda Hatsvi
    
Artikolos de Gad Nassi
  
Artikolos de Eliezer Papo
   
Sefaradi Taor

ladino
Fecha y hora