ladino  

 
Judeo espanyol
Contador:

Inicio >> Kantadores en Ladino >> M >> Marina Toshich
 
 

Kantadores de la tradisión djudeo-espanyola
Marina Toshich
Muzisiana i kantadera

(Sarajevo – Israel)

Marina Toshich nasió en Sarajevo, Bosnia i Herzegovina (Yugoslavia) en el 1968. De su chika edad fue envolvida en la múzika, i tuvo l'únika oportunidad de ambezarse los kantes de la multi étnika kultura de Sarajevo, ke inkluye las kulturas serba, muzulmana, kroata i djudía. Después de aver terminado el liseo, se fue a Krakow, en Polonia, para estudiar ayá en la Akademia de Arte "Jan Matejko", ande después de 5 anyos resivió el grado de Máster. Poko después de su graduasión en el 1991, tornó a Sarajevo, ma tuvo de fuyirse de ayá a kavza de la gerra. Eya bivió en Israel por 15 anyos. Durante estos anyos Marina se perfeksionó en múzika folklórika de Israel i en múzika del Oriente Medio en la Univesidad de "Bar Ilán", i dezvelopó su arte i los djéneros muzikales. Eya se graduó en la Akademia de Múzika i Bayle "Rubín" en Yerushaláyim, en el departamento de Múzika Araba. Sus kompozisiones en los djéneros de la múzika áraba klásika son interpretados por el "The End of the West Ensemble" (La fin del Ensambl del Oriente). Marina interpretó frekuentemente i interpreta kantigas en ladino en los enkontros de los djudiós de la eks-Yugoslavia, munchas vezes kon la bien konosida artista Betty Klein. Algunos anyos atrás, endjuntos al Departamento de Kultura i Edukasión de la Munisipalidad de Yerushaláyim, tuvo en mas de 40 jardinos de kriaturas performansias en ladino, para azer konoser muestra kultura a las kriaturas. En kantando en ladino, eya tanye el ut. Eya es la sola mujer en Israel ke tanye este instrumento profesionalmente. Marina publikó en el 2009 un livro de estudio de ut en la mas grande kompanía de publikasión de livros i partituras "Mel Bay" en los Estados Unidos. Este livro se vende en todo el mundo, porké es el primer livro de este djénero en lingua inglés. Su sigundo livro, i el por el estudio del ut i el makam fue publikado por las publikasiones "Chitory" en ebreo, i inkluye algunas kompozisiones en ladino. El sigundo livro de ut en ebreo, kon kompozisiones en ladino también, está en preparasión.

El 20 de Agosto 2013 Marina va tener una performansia en ladino endjuntos a Betty Klein, ke enkluye kantigas en ladino entre sus kompozisiones para ut en el prestijozo Festival de ut, ke tendrá lugar en Tel-Aviv, en Tzavta.

Marina tanye el ut en la Mueva Orkestra Andaluza en Ashkelón, en el "Ensemble Golha" de múzika persiana, en el "The End of the West" i en el "Gipsy Han" ensambel de "World Music" (múzika del mundo). Además es miembra del "Forum of women composers in Israel" (El Forum de mujeres kompozitoras en Israel).

A parte del ut Marina Toshich tanye la flauta i el chello oriental.


Matilda Koen-Sarano - 2013

                                                                                                                                                                            
 


+ Añadir nuevo comentario
Traducciones enviadas por usted
Loading Cargando ...
+ Enviar Comentarios

לאדינו         Ladino


Artikolos de Matilda Koen Serano
      
Artikolos de Yehuda Hatsvi
    
Artikolos de Gad Nassi
  
Artikolos de Eliezer Papo
   
Sefaradi Taor

ladino
Fecha y hora
 

La Asosiasion Arkadash | Ladino | לאדינו | judeo espanyol |

אתר זה הוקם ע"י זום ייעוץ ומערכות מידע