ladino  

 
Judeo espanyol
Contador:

Inicio >> ARTIKOLOS >> Gad Nassi >> Masakro en el Dezierto
 

Masakro en el Dezierto  

Gad Nassi

------------------------------------------------------------------------------------------------------------
Un sierto tiempo Djudios bivian en el Dezierto Arabo. Se rakonta ke estos yevavan una vida prospera. De muestros diyas, solo las ruinas en las simas de las kolinas son el uniko vestijo de esta prezensia.
El Profeto del Islam, en sus primeros pasos se avia inspirado de la erensya espirituala de estos Djudios. Ma, en segito, los avia aisado.
Kuanto a las sirkontensias del  aresentamiento de los Djudios en el Dezierto, egzisten diferentes asunsiones – siertas faktualas, otras spekulativas – sin ke estas las rezolven de una manera konkluziva. Ma, un fakto es klaro: el Islam kon sus partikukaridades unikas, deve su egzistensia a estos Djudios.

------------------------------------------------------------------------------------------------------------
Achakes de la konspirasion de los sivdadinos de Meka, Mahome se avia fuyido en el anio 622, de Meka a Yatrib – ke kon el tiempo sera konosido komo Medina.
Las fuentes islamikas remarkan ke los Djudios de Medina observavan la Ley djudia en riguroza akordansia kon el Talmud en los domenos del kazamiento i el divorso, adulterio, las leyes de limpieza, proprietad, orasion, gerra i en otros sujetos. Son deskritos komo observadores del Shabat, i orasionando en la direksion de Yerushalayim.
Despues de aliarse a los trivos arabos de Medina, Mahome, kon el eskopo de konvenserlos a konvertirsen a su relijion, avia kontraktado de mizmo una aliansa kon los Djudios. En este konteksto, estuvo eskuchando sus savios i diskutiendo kon eyos, enrikisiendo de este modo sus konosensyas en sujetos de relijion. Lo ke tuvo una influensia enorma i sentrala sovre las kreyensias, mandamientos i kustumbres ke iva desvelopar en el Islam. 
El arivo de Mahome a Medina
Aspirando a establisir un fondo komun entre la mueva relijion i la relijion djudia, Mahome adopto varias tradisiones del Djudaismo. Entre estas: la orientasion de la orasion verso Yerushalayim, el ayuno ke koresponde al dia de Kipur, la proibision de konsumar karne de sedro i las reglas de degoyo. Mahome se refero en sus sermones a las figuras biblikas komo Noah, Moshe i Korah, kon la esperansa ke de este modo sus argumentos konvenseran sus odiensias de la verasitad de de sus preseptos.
Mahome avia investido grandes esforsos a azer akseptar a  los Djudios de Medina ke el era ultimo profeto del Dio, en la linyada de Moshe i el Kristo, i los yamo a adjuntarsen a su relijion. Portanto, los Djudios le disheron ke, asigun el Talmud, la edad de la profesia ya se avia de muncho antes terminado, i en konsekuensia refuzaron de konoserlo entanto ke un verdadero profeto. Esta aktitud ensanyo a Mahome i izo kulminar su aiso kontra los Djudios.
En konsekensia, los Djudios fueron masakrados o ekspulsados i la orientasion de las orasiones del Islam fueron trokadas verso Meka, al lugar de Yerushalayim. 

Kronika de los Djudios de Arabia

Asigun una fuente islamika, la yegada de los Djudios a la Peninsula avia afitado ainda en el empesijo del Egzodo de Ayifto. Antes ke los Ebreos entren a la Tierra de Kanaan en el siglo XIV AEK, Moshe avia mandado a la Arabia ekspedisiones de gerreadores para ke maten a todos los Amalekites ke bivian en Medina. Aunke estos vinsieron a Amalek, eparniaron la vida del ijo del rey para ke Moshe deside de su sorte.
Portanto, kuando la ekspedision abolto, Moshe no estava mas en vida. El puevlo de Israel se ensanyo porke las lejiones no avian matado el prens amalekito i djuro ke los soldados ke avian aboltado de Medina, nunka entraran a Kana'an. No teniendo otro remedio, las lejiones aboltaron a Medina i se aresentaron ayi.(*)
Asigun la inskripsion en Harran del Rey de Babel, Nabonidus 556-539 AEK,  egzilados de Yuda se establisieron en el Norte de Hidjaz en las oazises de Teyma, Dedan, Fadak, Haybar, Yadi i Yatrib (Medina), i formaron ayi postos babileos. Estas notisias koinsidan kon la informasion prokurada por el Rabino Yohannan en el Talmud Yerushalmi: "Ochenta mil saserdetos alumnos entre las fuersas de Nabukadnezar se fuyeron i hueron ande los Ismaelites". Asigun esto, el arivo de los Djudios a la Arabia akontesio en los siglos VII AEK o VI AEK.
Durante el tiempo del Segundo Templo, uvo asigun una leyenda islamika,  una otra onda de imigrasion en Medina. La razon de esta imigrasion fue, las persekusiones seleusides, en la Tierra de Israel, en el siglo II AEK, i asigun una otra version, la razon fue las persekusiones romanas, en el siglo II EK. Djusto kon esto, siertos eskolarios pensan ke la imigrasion ke presedo la destruksion del Segundo Templo, fue el rezultado del desvelopamiento demografiko i politiko del tiempo en Yuda, i no de las persekusiones.
Las fuentes islamikas notan ke los Djudios de Medina eran los desendientes del Trivo de Yosef i de famiyas saserdotales de Aron i de Levites. Los Djudios de Medina avian gozado de una konsiderable influensia polítika i relijiosa. Durante la sejena i la syetena dekada del siglo VI, aktuaron komo governores i kolektores de dasios, asigun era de uzo en el Imperio Persano Sasanido. Esto turo fina ke la kompetision entre el Imperio Bizantino i el Imperio Sasanido ravajo el payis, i en konsekuansa, los Djudios sufrieron en las manos de los Kristianos. En segito, kon el arivo de los trivos arabos Banu Avs i Banu Kazradj, la supremasia de estos Djudios en la administrasion paso a los Arabos.
Djudios del Trivo Banu Kaynuka
Los Djudios gozaron de una una  vida de libertad i de rikeza en el dezierto, i fueron respektados i konsultados por los trivos arabos lokales, ke vieron en eyos un puevlo savio, kon una relijion evoluada i un nivel alto de kultura. Munchas famiyas arabas mandaron sus kreaturas a edukarsen ande los Djudios i adoptaron sus kustumbres.
Los Djudios de Medina se okuparon lo mas del komersio. Los de Banu Kaynuka  lavoraron los metales eran i orfevros; los de Banu Nadir kultivaron datiles; i los Banu Kurayza negosiaron en el vino.
Los Djudios introduizyeron la agrikultura a Medina, kresiendo palmeras de datiles i sereales. Los artizanos djudios fraguaron kastilios en los somitos de las montanyas, aleshando de este modo sus komunidades de las malatias del dezierto. Seando agrikultores de valor, sus plantasiones enfloresieron entanto ke oazises, akordandoles rikeza i onor. Sus nivel kultural i ekonomiko favorizo a la Djudios a dominar politikamente los Arabos.
Aparte de Banu Kaynuka, Banu Nadir i Banu Kurayza – los tres prinsipales Trivos djudios – egzistieron en la Arabia, i trivos djudios chikos komo Banu Avf, Banu Harif, Banu Hisham, Banu Nadjar, Banu Sayda i Banu Shutayba.
Komunidades djudias floresieron de mizmo, en el Kresiente Fertile, en Haybar, Teyma i Fadak (lo ke es oy Arabia Saudita), Edrei (en Yarden), Tadmor (en la Siria), Sura kon Pumpedita (en Irak).
Estas komunidades ekipadas kon kavaleria i armamiento avansado, reprezentaron un poder militar konsiderable. En segito del refuzo de los Djudios de akseptar su revelasion i de submetersen al Islam, fue este poder ke insito a Mahome a desimar a los Djudios de Medina para empidir su uzo kontra su armada.

La Desimasion de los Djudios de Medina
 
En 624, Mahome ensenyo a sus segidores de trokar de taktika en sembrando el teror en los korasones de los Djudios. La maz famoza viktima de los evenementos de matansina ke desbrocharon fue el poeto djudio i chefe del Trivo Banu Nadir, Ka'b Ibn al-Ashraf. Ka'b era konosido por su elokensia i su sagasitad. Se avia burlado de Mahome i de sus disiplos kon la intision de insitar miembros del Trivo Kuraysh kontra estos. Entonses, asigun el orden de Mahome, un grupo de su djente lo insito a  salir de su kaza en medio de la noche, salto salvajamente enriva de Ka'b i le korto la kavesa. Al dia segiente, Mahome alevanto la kavesa de Ka'b en deklarando: "Alavado ke sea Dio por la muerte de Ka'b", i ordeno: "Matad a kada Djudio ke puederash". 
Kon esto, se deklansho la persekusion de los trivos djudios de Medina:

Banu Kaynuka
El Trivo Banu Kaynuka fue el primer de los tres trivos djudios ke sufrio en las manos de Mahome. Este trivo, ke se avia aktivamente opozado al Islam,  no tenia en su posesion su proprio teritorio, i diferamente de los otros trivos ke lavoravan la tierra, era en mayoria orfevros i artizanes de armas. Bivian konsentrados en la sivdad.
Finalmente, fueron asiejados i por falta de agua i de komanya, los de Banu Kaynuka se entregaron a Mahome, ke se apronto a masakrar todo el trivo. Portanto, un aliado de los trivos arabos, ke aisava a Mahome lo impidio. No tienendo otra alternativa, Mahome se komprometio en desterrandolos de la sivdad i konfiskando sus propriedades. Fueron egzilados a Edrei, lo kes oy la Jordania.

Banu Nadir
En 624, despues de izolar al Trivo Banu Nadir, en segito de una aliansa kon el Trivo arabo Kuraysh, Mahome ordeno al Trivo Banu Nadir de salir de Medina en diez días o enfrentar la muerte, si no akseptaria su profesía. Deklaro ke poederian yevarsen sus pertenensias i ke les permetara de aboltar por la kojeta del datile.
Los Trivos Nadir i Kurayza se yamavan kahinan – kohanim, lo ke apunta a sus asendensia saserdotal. Los de Nadir yevavan nombres en arabo, avlavan su propio dialekto del arabo, i se okupavan del negosio i del kultivo de datiles.
Sus orijinen fue un sujeto de kontroversia. La mayoría de los eskolarios pensan ke arivaron a Yatrib (Medina) de Yuda despues de la revolta djudía kontra Roma (c.70 EK), mientras que otros sostienen que Banu Nadir fue una trivo formado de  proselitos. 
Mahome enkavesando los Musulmanos kontra Banu Kaynuka 
Se avian desidado de kedar en Medina. Portanto, en 626, doz anios despues de la viktoria de Mahome sovre Banu Kaynuka i eyos  fueron derrotados. Despues de aversen rendido a Mahome fueron salvados del masakro, i fueron egzilados a la Sivdad de Haybar, i siertos a la Siria. Sus kampos ansi ke sus propriedades fueron uzurpados. Les fue permetido de tomar sus pertenensias aparte de sus armas. No les fue permetido de aboltar para la kojeta a sus kampos de datiles ke fueron kemados. 
Banu Kurayza
En 627, arivo el torno del Trivo djudio Banu Kurayza. Los de Banu Kurayza eran paryentes del Trivo Banu Nadir. Se yamavan de mizmo ke el Trivo Nadir, kahinan – ke implikava una desendesia de saserdotes. Se okupavan prinsipalmante de agrikultura.
Kuando los adverseros del Islam en Meka, avian enserklado a Medina, estos avian kontraktado una aliansa kon Banu Kurayza, para ke atakan a las fuersas de Mahome. Portanto, kon la deskuvierta de esta aliansa por Mahome, Kurayza se troko en el enemigo del Islam. I, en segito de la retreta de las fuersas de Meka, Mahome atako a Banu Kurayza en enserklando sus fotifikasiones. 
Mahome resiviendo la submission del Trivo Banu Nadir
Los de Banu Kurayza, krenyando de ser masakrados, no fueron prontos a rendersen. Las fuersas de Mahome kontavan 3.000 soldados. Portanto, Mahome no estava ozando atakar a Kurayza, asta ke – asigun una leyenda islamika – el Andjelo Gavriel aparesyo i le revelo ke el destino de Banu Kurayazo ya esta seyado. Teniendo solo 450 soldados entrenados, Banu Kurayza evito un atako en un kampo avierto de batalia, i durante los venteisinko dias no uvieron konfrontamientos sinyifikantes.
Konstatando ke su situasion estava empirando, Ka'b Ibn Asad, el lider de Kurayza propozo tres solusiones: la konversion al Islam; matar a todas las mujeres i las kreaturas i en segito, kombatir los Musulmanes fina la muerte; o emboskar las fuersas de Mahome kon un atako subito en la vispera del dia de Shabat.
Los Djudios rejetaron las tres opsiones. Ofresieron de salir de Medina i de egzilarsen. Mahome no aksepto este ofre i les izo saver ke en kavzo ke se renderan, iva deziniar un mediator para ke deside de sus sorte. Despues ke los Djudios akseptaron este ofre, Mahome komplisito en nominando komo mediator a Sa'd Ibn Mu'ad, ke fue el responsible del asasinato de Ka'b, el lider del Trivo djudio Banu Nadir.  
Ali kon sus soldados masakrando a los kaptivos del Trivo Banu Kurayza
El verdikto de Sa'd fue konsternante: la egzekusion de todo los ombres, la vendida de las kreaturas i la partision de las mujeres entre los Musulmanes komo butino de gerra. Unos 750 ombres – a la eksepsion de 3 ke akseptaron de konvertirsen al Islam – fueron dekapitados en el merkado de Medina. El kapo egzekutor fue Ali, el padre del moveminto shiito del Islam, ke personalmente korto una ventena de kavesas. Los dokumentos islamikos notan ke la sangre de los Djuidos avia koryido komo agua en inondando el merkado de Medina. Algunos mujeres i kreaturas ke fueron vendidos komo esklavos, fueron redimidos por los Djudios de Haybar. Mahome tuvo kargo de de apartar para si a Rayhana, una de las muchachas de Kurayza.
Asigun una fuente islamika, los de Banu Kurayza, antes de sus egzekusion, avian pasado la noche en meldando la Tora.
Ansi, kon unaanglante perfididad ke iva ser markada entanto ke una gloria en la istoria del Islam, arivo a su fin la prezensia djudia en Medina.

La Desimasion en Haybar
 
Haybar fue, en la epoka de Mahome, el maz grande establisimiento djudio en Arabia. A unos 150 kilometros de distansia de Medina, Haybar era situada sovre un plato de montanyas formadas de lavas i de valeyas fertiles. Achakes de los marekajes de malaria, ke kovrian estas valeyas, los Djudios de Haybar moravan en las montanyas, abashando a las valeyas solo durante el dia para lavorar la tierra.
Los establisimientos de Haybar eran arekojidos en el entorno de tres sentros - Natat, Shik i Katiba - dispersados en un area ampla. Kultivaron datiles, uvas, vejetales i granos, de mizmo, elevaron kodreros, vakas, gameyos, kavayos i aznos. Tanbien, se okuparon de ilar, teshar, fabrikar ropas de seda i vistimienta, ansi ke benefisiaron del negosio kon karavanas ke sirkulavan entre la Arabia, Siria i Irak i del negosio kon la 
Siria. De mizmo, se dedikavan a la fabrikasion de instrumentos de metal para el lavoro i armas komo arietes i katapultas, ke eran alkilados a los trivos arabos. Eran konosidos por su dilijensia i sus ospitalidad. Durante la noche uzavan de pozar almenaras en las torres de sus kastilios, giando los ke se pedrieron i para resivirlos en sus kazas. 
La forteresa djudia en Haybar
Miembros del Trivo djudio Banu Nadir de Medina ke reklamavan ser de asendensia saserdotala, posedavan kampos en Haybar, ansi ke forteresas ande guadravan sus armas. Los kastilios de Haybar tenian tuneles i pasajes, ke, en tiempo de gerra rendian posible a los asiejados de aksedar a las fuentes de agua ahuera de los kastilios.
Asigun el istoriador arabo ibn Haldun, kuando el puevlo djudio se avia revoltado, David kon su djente se avia fuyido a Haybar. David se kedo ayi, fina la muerte de su ijo ke avia enkavesado la revolta i avia reynado sovre la Siria, el Libano, la Jordania i Israel. Aunke ibn Haldun no mensiona el nombre del ijo de David, es klaro ke se refera a la revolta de Avshalom kontra David. I, en kavzo ke esta estoria teneria kulakere imprenta de verasidad, se puede deduizir ke la prezensia de los Djudios en Haybar, avia egzistido ainda en los dias del Rey David.
En 628, Mahome se desidio de konkestar a Haybar. Antes de asiejarla, mando asasinos para matar a los lideres del Trivo Banu Nadir, ke se avian refujiado a Haybar, i para terorizar su puevlo. Achakes del manko de koordinasion entre sus fuersas, la muerte de sus lider ibn Mishkam, i la traision de un Djudio ke amostro las entradas sekretas de una de las forteresas, los Djudios fueron vinsidos en un sangliente batalia i fueron forsados a depozar sus armas.
Mahome se komporto kon krueltad verso los Djudios, asasinando a ibn Ahtab, el kapo de los de Banu Nadir, en Medina. El dia mizmo ke los Djudios se rendieron, se kazo kon Safiya, la espoza  del governor de Haybar.
Las ruinas de abitasiones djudias en Haybar
. Mahome avia matado a su  padre, i asasino a su marido abu Hukayk, despues de averlo torturado para ke revela la lokasion de su trezoro.
Los Musulmanos selebraron sus trionfo kon una festividad imperiala. Una de las mujeres de Haybar sakrifisio un kodrero, lo kozyo despues de untarlo kon tosigo, i lo ofresio a Mahome. Uno de los kompanieros de Mahome komio un poko de su karne i murio antes ke Mahome pudo gostarlo, aunke su lengua avia tokado la karne. Se rakonta ke Mahome avia sufrido de los efetos del tosigo asta el dia de su muerte.
Achakes ke a los Musulmanos faltavan abilidades agrikoles, Mahoma fue importunado por la idea ke, sin la prezensia djudia, Haybar kedaria dezolada i no abasteseria sus produktos a Hidjaz. En konsekuensia, permitio a una grande parte de los Djudios, de kedarsen en sus tierras i lavorarlas, kon la kondision ke entregaran maz de la meatad de todos de sus produktos, inkluido un dasyo – djizya. De este modo, los Djudios se trokaron en un klasa inferiora, konosida komo dimmi. I ansi, fue establisido i el estatuo de la populasion non-Musulmana biviendo basho la proteksion del Islam.
Despues ke kaptivos de gerra i esklavos de otros payizes fueron yevados a Haybar, el Kalif Omar ke segio a Mahome, desidio de ekspulsar a los Djudios de Haybar, kon el preteksto ke antes de murir, Mahome avia ordenado ke doz relijiones no puederian egzistir endjuntos en Hidjaz.
En konsekuensa, la grande parte de los Djudios de Haybar fueron ekspulsados. Una parte de estos se establisio en Vadi alKura i Teyma, ma la mayoria de estos arivo a  lo largo de la valeya de Jordania, de Yeriho asta la Valeya de de Sanur en el Norte de la Samaria. Nombres komo Tel Haybar i Hirbat Haybar en esta valeya, ansi ke una leyenda araba sovre un rey djudio i su prinsesa, ke bivieron en estos lugares, son probablamente el testimonio de estos ekspulsados.

La konkesta de Fidak
Despues de Haybar, los Musulmanes atakaron a Fidak, otro establisimiento djudio, no muy leshos de Haybar. Despues de aver observado el destino de los Djudios de Haybar, Fidak no eskojo la lucha. Firmo un tratado de paz kon los Musulmanes en los mismos términos de Haybar.

La dezolasion de Hidjaz
 
Una fuente bizantina reporta ke despues ke los Djudios abandonaron sus kampos i kitaron el Norte de Arabia, los oazises floresientes de Hidjaz se trokaron en un dezierto dezolado. La agua koryo indolamente, i el terreno fertil i luziozo se troko en marekajes de malaria. Jeografos musulmanes lamentaron la devastasion de Hidjaz en sus eskritos, relatando ke Teyma fue destruido, Vadi alKura se dezolo, Fidak desparesio i ke mizmo sus ruinas no egzistian maz. I sulinyaron ke despues de la ekspulsion de los Djudios, kon sus kastilios en ruinas i dezaziendosen, el payiz se troko en una solombra de su antigua esplendor.
Un chiko numero de establisimientos djudios kontinuaron a permaneser fina el siglo X, grasias a los pokos Djudios bastante mazalozos de ser permitidos de kedarsen. La karga tributarya djizye, obligo gradualmente a la mayoria de estos a emigrar a las komunidades djudias de los payizes vizinos. Para evitar este dasio akablante, impozado a los dimmis, los ke kedaron, se konvertieron al Islam.
-----------------------------------------------------------------------------
(*) Esta leyenda asemeja a la version biblika de la gerra entre Shaul i Amalek, i parese ser la kompilasion de esta version, kon akea de la primera gerra entre Amalek i Israel. La Biblia nota ke aunke su viktoria, la abstension de Shaul de matar a Agag, el Rey de los Amalekites kon toda su desendensia, avia ensanyado el Profeto Samuel. De otra parte, se save ke la primera gerra entre Israel i los Amalekites avia akontesio en segito del egzodo de Ayifto. Konosido entanto ke un puevlo del Dezierto de Negev, los Amelekites avian atakado a Israel, en el Norte de la Peninsula de Sinay.
Ay de akodrar de mizmo, ke el Primer Livro de las Kronikas nota ke miembros del Trivo Shimon hueron al Monte Seir, i mataron a los Amelekites sobrebivientes, i se aresentaron ayi. Seir pudiendo ser el Oeste del Negev. Asigun esta mizma fuente, la desimasion kompleta de los Amalekites avia akontesido durante el reyno de Hezkiyau.
----------------------------------------------------------------------------------------------------------------------------------------



 




 

                                                                                                                                                                            
 


+ Añadir nuevo comentario
Traducciones enviadas por usted
Loading Cargando ...
+ Enviar Comentarios
+ Enviar contenidos sugeridos

לאדינו         Ladino


Artikolos de Matilda Koen Serano
      
Artikolos de Yehuda Hatsvi
    
Artikolos de Gad Nassi
  
Artikolos de Eliezer Papo
   
Sefaradi Taor

ladino
Fecha y hora