ladino  

 
Judeo espanyol
Contador:

Inicio >> ARTIKOLOS >> Yehuda Hatsvi >> Mashmia Yeshua
 
 

Mashmia Yeshua 

En la tradision de muestro puevlo se notan las tres semanas entre 17 de Tamuz  asta el 9 de Av komo una epoka triste. Afilu los dias de Shabat en este intervalo se yaman "Shabatot de Pureanut/kalamidad)".
No por nada, las Aftarot ke se meldan en estas Shabatot son las de Yermiyahu, el profeta del Horban (la destruksion).
 
Malgrado todo, el puevlo djudyo nunka piedre su esperansa de la Geula, la regmision de la nasyon. Despues de estas semanas, todas las Aftarot ke meldamos, son de Yeshayahu, el profeta ke mos inche los korasones kon
 profesias elevadas de salvasion i liberasion
 
En el livro de Nahum el profeta, topamos su profesia (2,1):
 "Ek, sovre los montes, los pies del ke trae buenas nuevas,
 del ke anunsia la paz".
Una misma profesia sublima, ma kon mas fuersa, i ayinda mas poetika,        la vemos en Yeshayau (52,7): 
 
 "Kuan ermozos son sovre los montes, 
los pies del ke trae alegres nuevas, 
del ke anunsya la paz, del ke trae nuevas de bien, 
del ke publika salvasion, 
del ke dize a Sion:  "Enreina tu Dio!"
 
De este Pasuk, eskojo Don Yitzhak Abarbanel el nombre de su livro "Masmia Shalom" ("Publika salvasion"),  imprimido en Salonik 1526.

Don Yitzhak Abarbanel nasyo en Lisbon en 1437,  i muryo en 1508 en Venezia  (i enterrado en Padua, Italia).
Don Yitzhak tuvo muchos negosyos grandes, i parvino ser  konsejero de reyes; ma, su fama i su importansa estan, de todo, siendo el filozofo i komentador de la Biblia. 
Sus Perushim tan lojikos, i yenos de saviduria, ganaron la  admirasion no solo de los djidyos, ma tambien de muchos savios de los goyim.

Abrabanel, komo el mismo mos testigua, no se profundizo en la Kabala, aun ke el rekonose bien ke las palavras eskritas en la Tora son komo el vestido al puerpo; i el kontenido i el sentido del teksto, son el propio puerpo; empero, tambien ay sovre todo, muchos sekretos en la Ley,ke son en el eskalon de la Neshama (la alma), i ke no siempre alkansamos a komprender a estos sekretos i misterios.
 
En sus komentarios de la Tora, Abrabanel se opoza a vezes a los Derushim ke dyeron muestros savios en el Talmud (en akeyos kavzos ke el Derush kontradikta al sentido  simple del teksto de la Tora. 
Entre otras eksplikasiones sovre el orden de los 24 livros  de la biblia, 
Don Yitzhak Abrabanel djustifika el orden ke fiksaron muestros savios antiguos en la Diaspora:  es dezir, ke despues de los livros de Melahim (Reyes), vienen los  profetas yeshayahu, Yermiyahu, i despues Yehezkel. 
 
Abrabanel lo aksepta, i dize ke ansi konviene djustamente;  ambos por razones de kronolojia, i tambien de parte de sus grada.
(Otros savios, aparte de Abrabanel, ya notaron, por un 
 egzempio, ke komo Yermiyahu empeso sus profesias kuando era muy djoven, su lenguaje no fue tan korriente.

Muestros savios en un estudyo eksterior de la Mishna
(Barayta Bava-Batra 14), disheron ke el livro de Reyes se termina kon la destruksion del templo, i por esto le reviene a Yermiyahu, el profeta del Horban, de segir al livro de Reyes; despues teniya de venir el profeta 
Yehezkel, ke su livro empesa kon profesias de destruksion  i termina kon profesias de konorte. 
Segun los savios de esta Barayta, Yeshayahu, ke es el profeta del konsuelo, tiene de estar en el treser lugar. De todas maneras, esta opinion no fue akseptada por los hahamim ke kanonizaron la biblia (TaNaH) en el fin del segundo siglo.
 
El livriko "Masmia Yeshua" es uno de los muchos livros ke eskrivyo Abrabanel.  Esta kompozision suya fue dedikada para demoler la metoda 
(de Ribi Moshe Ha-kohen i otros), la kual dize ke todas las profesias, i espesialmente en Yeshayahu, ya se afirmaron en el pasado.
 
Abrabanel konta i rekonta todas akeyas Nevuot (profesias)  ke en la Biblia, ke segun el, no se pueden entender en otra manera sino ke son profesias para el FUTURO.
 
En el livro de Yeshayahu topa Don Yitzhak Abrabanel kinze  talas profesias.
Vos do aki dos egzempios de estas profesias ke esperamos ke se realizaran a muestros ojos:

 1)  "Akontesera en la postremeria de los dias, ke sera konfirmado el monte de la kaza de Adonay en la kavesera de los montes" 
(Yeshayahu, kapitolo 2)
 
2) "Konortad, konortad a mi puevlo" (kapitolo 40), 
ke es la Aftara de "Shabat Nahamu", el Shabat  ke viene despues del dia de Tish'a b'Av.

 
El ultimo Pasuk en este kapitolo de Yeshayahu el profeta, mos dize:

 """Los ke esperan a Adonay tendran muevas fuersas; 
levantaran alas komo las agilas, 
korreran i no se kansaran; 
kaminaran i no se fatigaran.""

 

                                                                                                                                                                            
 


+ Añadir nuevo comentario
Traducciones enviadas por usted
Loading Cargando ...
+ Enviar Comentarios

לאדינו         Ladino


Artikolos de Matilda Koen Serano
      
Artikolos de Yehuda Hatsvi
    
Artikolos de Gad Nassi
  
Artikolos de Eliezer Papo
   
Sefaradi Taor

ladino
Fecha y hora
 

La Asosiasion Arkadash | Ladino | לאדינו | judeo espanyol |

אתר זה הוקם ע"י זום ייעוץ ומערכות מידע