ladino  

 
Judeo espanyol
Contador:

Inicio >> Kantadores en Ladino >> R >> Rahel Alpershtein
 

Kantadores de la tradisión djudeo-espanyola
Rahel Alpershtein
Kantadera i kompozitora

(Tel-Aviv)

Rahel Alpershtein nasió en la Shehunat Hatikva en Tel-Aviv en el 1952, ija de Ketty i Moshe Karako, ke izieron sus aliyá a Israel antes de la fondasión del Estado de Israel, i tiene dos ermanos. Kuando eya estudiava en la sigunda klasa elementar, la famiya pasó a morar en Holón. De kuando era chika a Rahel le plazía kantar. Eya izo parte del koro de la eskola i del movimiento "Tzofim", ande empesó a partisipar a piesas i operetas. Su kariera muzikal profesional empesó en el 1970 en el kuadro de grupos muzikales de la armada: "Tzevet Avay Hativa 7" i "Tzevet Avai Sadnaé Shirión". Kon estos grupos arivó a munchas bazas de Tzaal... asta el Kanal de Suez. Del 1976 Rahel empesó a apareser en varios grupos i fue solista en el grupo "Ha-Nesharim (Las Agilas) i "Ha-Solanim" (Los Solistas). Además fue solista en el grupo "Ha-Psagot" (La Simas), ke aparesió en el programa de televizión "MiMeni"(de Meni Peer) kon la famoza kantiga "Zingarella". En el 1983 eya fue adjuntada al grupo ke inkluía Rony Weiss i otros, i aparesió kon eyos en el programa de "Kdam Eurovizion" (Ante Eurovizión), i en el programa de televizión "He-hatul Shmil" (El Gato Shmil). Kuando el grupo se dezizo Rahel empesó a apareser en toda Israel i en el mundo en varios klubes públikos i privados kon un repertorio muy riko. Eya es una kantadera kon amplitud i enerjía, ke puede interpretar el kanto de alegría komo el kanto de la alma. Del 1980 al 1990 Rahel fue la reyna de los klubes de kanto en Tel-Aviv, komo "Yekev", "Ha-Ratzif", "Ha-Kumkum" i mas, i aparesió en fiestas i evenimientos en Israel i en el mundo. En el 2010 Rahel publikó 3 CDs de kantigas para kriaturas eskritas (palavras i múzika) i interpretadas por eya mizma: "Ha-Mishpahá shelí" (Mi famiya), "Ha-Yom Yom Ulédet" (Oy es el Kumpleanyo)" i "Kan aní gadel" (Akí estó kresiendo). Rahel kanta en ebreo, inglés, espanyol, ladino, turko, fransés, italiano, grego i mas. Eya se emosiona sovre todo en los kantes nostáljikos en su lingua materna, el ladino, i los kantes de su patria, el ebreo de todos los tiempos.

En los últimos tiempos eya dechizó de reprezentar el programa personal "La Kaza Mía", ande konta su kuento personal i ande están interkaladas las kantigas, sovre las kualas se engrandesió en la kaza de sus djenitores, en ladino, en turko, en grego i en ebreo. En este programa Rahel interpreta i kantigas en ladino ke eya mizma kompozó, palavras i múzika. Una de las kantigas ke Rahel eskrivió es "Yo sólo kiji kantar". Aún ke Rahel tuvo varias okaziones de ser kantadera de su chika edad, no pudo realizar este suenyo, porké sus djenitores se opozaron, porké pensavan ke el kantar no es una profesión onorable. Kuando eya tuvo la okazión de entrar en el grupo "Ha-Ahim ve-ha-Ahayot" (Los ermanos i las ermanas), la opozisión de su padre se lo empidió. Rahel es madre de tres (dos ijos kazados) i una ija, i nona de tres inyetos.

Matilda Koén-Sarano, 2013


 
+ Añadir nuevo comentario
Traducciones enviadas por usted
Loading Cargando ...
+ Enviar Comentarios

לאדינו         Ladino


Artikolos de Matilda Koen Serano
      
Artikolos de Yehuda Hatsvi
    
Artikolos de Gad Nassi
  
Artikolos de Eliezer Papo
   
Sefaradi Taor

ladino
Fecha y hora